2024: ދަތުރުފަތުރުގެ ނިޒާމުގައި ހުރި ދުވަސްވީ މައްސަލަތައް ހައްލުކުރުމަށް އަވަސް ފިޔަވަޅުތަކެއް އެޅި

ރާއްޖޭގެ އެއްގަމާއި، ކަނޑާއި ވައިގެ ދަތުރުފަތުރުގެ ކަންކަން ޒަމާނާއި އެއްގޮތަށް ބައްޓަންކޮށް ހަރުދަނާކޮށް ތަރައްޤީކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު އަމާޒެކެވެ. މި އަމާޒަށް ވާސިލުވުމަށް މި ނިމުނު 2024 ވަނަ އަހަރަކީ މުހިންމު މަސައްކަތްތަކެއް ކުރެވުނު އަހަރެކެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާއި ހަވާލުވެވަޑައިގަތުމަށްފަހު ފެށްޓެވި އެންމެ މުހިންމު އެއް މަސައްކަތަކީ ދަތުރުފަތުރުގެ ނިޒާމުގެ ތެރޭގައި ޒަމާންތަކެއް ވަންދެން މޫލާފައި ހުރި މައްސަލަތައް ހައްލު ކުރެއްވުމުގެ މަސައްކަތެވެ. އެގޮތުން ޒަމާނުއްސުރެ ހައްދެއްނެތި ޤާނޫނާއި ޤަވާއިދާ ޚިލާފަށް ދޫކުރަމުން އައި ގަރާޖު ސިޓީގެ މައްސަލަ ކޮންޓްރޯލް ކުރެއްވިއެވެ. އަދި މާލޭގެ އެއްވެސް ސަރަހައްދަކުން ޕާކިން ސްލޮޓް ކުއްޔަށް ނުވަތަ އެނޫންވެސް ގޮތަކަށް ދިނުން ހުއްޓާލެއްވިއެވެ. މިއީ މާލޭގެ މަގުތަކުގައި އާންމު ބޭނުމަށް އޮންނަ ޖާގަ ކުޑަވެ، މަގުތައް ބޭނުންކުރުމުގައި ދަތިވުމުން ސަރުކާރުން ނިންމެވި ނިންމެވުމެކެވެ.

މާލެ ސަރަޙައްދުގެ މަގުތަކުގެ ރައްކާތެރިކަމާއި އަމާންކަން ކަށަވަރުކުރުމަށް ފެށި "މާލެ ފަހި" ޕްރޮގްރާމަކީ ގްރޭޓަރ މާލެ ސަރަޙައްދުގެ މަގުމަތީގައި ދުއްވާ އުޅަނދުތައް ގިނަވުމުގެ ސަބަބުން ދިމާވެފައިވާ ތޮއްޖެހުމުގެ މައްސަލައަށް ހައްލެއް ހޯދުމަށް ސަރުކާރުން ފެށްޓެވި ޕްރޮގްރާމެކެވެ. މި ޕްރޮގްރާމް ބެހެނީ ޖުމްލަ 3 ބަޔަކަށެވެ. އެއީ ޤާނޫނާއި ގަވާއިދުގެ ތެރެއިން ވެހިކަލް ރަޖިސްޓްރީކުރުމާއި އުޅަނދުގެ ޢަދަދު ކޮންޓްރޯލްކުރުމާއި ޕަބްލިކް ޓްރާންސްޕޯޓްގެ ވަޞީލަތްތައް އިތުރަށް ހަރުދަނާކޮށް ތަރައްޤީކުރުމާއި މަގުތަކަކީ ދަތުރުފަތުރާއި ހިނގައި ބިނގާވެއުޅެން ރައްކާތެރި އަދި ފަސޭހަ އަމާން ތަންތަނަށް ހެދުމެވެ.

ޤާނޫނާއި ގަވާއިދުގައި ބަޔާންކޮށްފައިވާ އިޖުރާއަތްތައް ފުރިހަމަނުކޮށް ވެހިކަލްތައް ގަރާޖުތަކަށް ރަޖިސްޓްރީކޮށްދިނުމުގެ ސަބަބުން، އާދަޔާ ޚިލާފަށް މާލޭގެ ސަރަހައްދަށް އުޅަނދުތައް ގިނަވެ، ގްރޭޓަރ މާލެ ސަރަހައްދުގެ މަގުތަކުގެ ހާލަތު އާންމު ދިރިއުޅުމަށް ދަތިވާ ހާލަތަކަށް ދިޔައެވެ. މި މައްސަލަ ހައްލުކުރުމުގެ ގޮތުން ރަޖިސްޓްރޭޝަނަށް ހުށައަޅާ އުޅަނދުތަކުގެ ރަޖިސްޓްރޭޝަން ޕްރޮސެސްކުރުމުގެ ކުރިން ޤާނޫނުގައިވާ ގޮތުގެ މަތިން ގަރާޖުގެ ޞައްހަކަމާއި އަދި ކޮންސެންޓް ވެރިފިކޭޝަން ފުރިހަމަ ކުރަން ވަނީ ފަށާފައެވެ.

މާލެ ސިޓީ ކައުންސިލުން ގަރާޖެއްގެ ގޮތުގައި ރަޖިސްޓްރީކޮށްދޭ ޖާގަ އަދި އިކޮނޮމިކް މިނިސްޓްރީން ވިޔަފާރީގެ ގޮތުގައި ރަޖިސްޓްރީ ކޮށްދެވޭ ތަންތަން އެއް ވިއުގައެއްގެ ތެރެއިން ޓްރާންސްޕޯޓް މިނިސްޓްރީއާއި މާލެ ސިޓީ ކައުންސިލާއި އިކޮނޮމިކް މިނިސްޓްރީއާއި ދެމެދު މަޢުލޫމާތު ވަގުތުން ވަގުތަށް ހިއްސާ ކުރެވޭނެ އިންޓަރގްރޭޓަޑް އިންފޮރމޭޝަން ސިސްޓަމެއް ޤާއިމްކުރުމަކީވެސް ކުރެވުނު މުހިންމު މަސައްކަތެކެވެ. މި ސިސްޓަމުގައި ގަރާޖެއްގެ ގޮތުގައި ހުރި ތަނެއް ވިޔަފާރިއަކަށް ރަޖިސްޓްރީކުރަން އިކޮނޮމިކް މިނިސްޓްރީއަށް ހުށަހަޅައިފިނަމަ އެއީ މިހާރުވެސް ގަރާޖެއްގެ ގޮތުގައި ރަޖިސްޓްރީވެފައިވާ ތަނެއްކަން އެނގިގެން ދާނެއެވެ.

އެއްގަމުގައި ދުއްވާ އިންޖީނުލީ އުޅަނދު ރަޖިސްޓްރީކުރުމުގެ ގަވާއިދުގައި ބަޔާންކޮށްފައިވާ އުމުރަށް ނުފެތޭ އެއްގަމު އުޅަނދެއް، ރޯޑް ވެހިކަލެއްގެ ގޮތުގައި ރާއްޖެ އެތެރެކުރުން މަނާކުރެވޭނެގޮތަށާއި ގަރާޖު ނުވަތަ ގުދަން ކުރެވޭނެ ފެސިލިޓީއެއް އޮތުމުން ނޫނީ އިމްޕޯޓް ނުކުރެވޭނެ ގޮތަށް ޤާނޫނު އިސްލާހުކުރުމަށްވެސް ސަރުކާރުންވަނީ ނިންމަވާފައެވެ.

ބޮޑު އަގުގައި ޑޮމެއިންތައް ވިއްކުމާއި، ހަރުދަނާ ނިޒާމެއްގެ ތެރެއިން ޑޮމެއިންގެ ރިކޯޑްތައް ބެލެހެއްޓިފައި ނެތުމަކީވެސް މި ދާއިރާގައި އޮތް ބޮޑު މައްސަލައެކެވެ. މިމައްސަލަ ހައްލުކޮށް، ހަރުދަނާ ނިޒާމެއްގެ ތެރެއިން މިކަން ފެށުމަށް ސަރުކާރުން ވަނީ މަސައްކަތް ފަށާފައެވެ. ޑޮމެއިން ޚިދުމަތަކީ ދިވެހިންގެ މެދުގައި ވަކިން ޚާއްސަކޮށް ޒުވާނުންގެ މެދުގައި ނުހަނު މަޤުބޫލުކަން ލިބިފައިވާ ޚިދުމަތެކެވެ. އެގޮތުން ސެކިއުރިޓީ ޕީޗާސްތަކާއެކު ޑޮމެއިންގެ ސެޓްފިކެޓާއި ރަޖިސްޓްރީ މިހާރު ވަނީ ދޫކުރަން ފަށާފައެވެ.

ރާއްޖޭގެ ސިއްޙީ ނިޒާމު ހަރުދަނާކޮށް ސިއްޙީ ކުއްލި ފަރުވާގެ ޚިދުމަތް ފުޅާކުރެއްވުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ މުހިއްމު ވަޢުދުފުޅެކެވެ. މި ސަރުކާރުން ވަނީ ރާއްޖޭގައި ކުއްލި ފަރުވާގެ ޚިދުމަތް ފުޅާކޮށް ބަލި މީހުން އުފުލުމުގެ ނިޒާމަށް އިންޤިލާބީ ބަދަލެއް ގެނުވާނެ ޚިދުމަތެއްގެ ގޮތުގައި އެއަރ އެމްބިއުލާންސްގެ ޚިދުމަތް ތަޢާރަފުކުރައްވާފައެވެ.

މި ޚިދުމަތުގެ އިތުރުންވެސް ރާއްޖޭގެ އޭވިއޭޝަން ދާއިރާ ހަރުދަނާ ކުރުމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ވަނީ ގިނަ މަސައްކަތްތަކެއް ކުރައްވާފައެވެ.

އެގޮތުން ބޯޓު ދަތުރުކުރާ ފަރާތްތަކަށް ދޫކުރުމަށް ލާޒިމްކުރާ ސީފެއަރާޒް އައިޑެންޓިޓީ ޑޮކިއުމަންޓް މި ސަރުކާރުގެ ފުރަތަމަ 7 މަސް ދުވަހުގެ ތެރޭގައި ވަނީ ދޫކުރަން ފަށާފައެވެ. އަދި ބައިނަލްއަޤްވާމީ ދަތުރުތަކުގައި މޯލްޑިވިއަންގެ ޤާބިލްކަން ފުޅާކޮށް އިތުރަށް ހަރުދަނާ ކުރުމަށް ޖީޑީއެސް އިންޓެގްރޭޝަން ތަންފީޒުކުރަން ވަނީ ފަށާފައެވެ. އެތެރޭގެ އުދުހުންތަކުގެ ފްލައިޓްގެ އަދަދު އިތުރުކޮށް ޤައުމީ އެއަރލައިނުން ވައިޑް ބޮޑީ އެއަރކްރާފްޓް އޮޕަރޭޝަން ތައާރަފުކުރުމުގެ މަސައްކަތްވެސް މިދިޔައަހަރުތެރޭގައި ފަށާ ރާއްޖޭގެ ފުރަތަމަ ވައިޑް ބޮޑީ މަތިންދާ ބޯޓު މިހާރުވަނީ ރާއްޖެ ގެނެސްފައެވެ.