ރާއްޖޭގެ ތާރީޚުގައި އެންމެ ގިނަ ކާގޯ އެތެރެކުރީ ނިމުނު އަހަރު: އެމްޕީއެލް

ރާއްޖޭގެ ތާރީޚުގައި މިހާތަނަށް އެންމެ ގިނަ މުދާ އެތެރެކޮށްފައިވަނީ މިދިޔަ އަހަރުކަމަށް މޯލްޑިވްސް ޕޯޓްސް ލިމިޓެޑްގެ ޗީފް އެގްޒެކެޓިވް އޮފިސަރ މުޙައްމަދު ވަޖީހު އިބްރާހިމް ވިދާޅުވެއްޖެއެވެ.

އެމްޕީއެލްގެ ސީއީއޯ މުޙައްމަދު ވަޖީހު އިބްރާހިމް ވިދާޅުވީ މިދިޔަ އަހަރު 66،387 ކޮންޓެއިނަރުގެ ކާގޯ ރާއްޖެ އެތެރެކޮށްފައިވާކަމަށެެވެ.

އެމްޕީއެލްގެ ތަފާސް ހިސާބުތަކުން ދައްކާގޮތުން މިދިޔަ އަހަރު 66387 ކޮންޓެއިނަރު ރާއްޖެ އެތެރެކޮށްފައިވާއިރު، 131262 ފްރައިޓް ޓަނުގެ ޖެނެރެލް ކާގޯ އެތެރެކޮށްފައިވެއެވެ. ޖެނެރަލް ކާގޯއަކީ ކޮންޓެއިނަރުގައި ބަންދުކޮށްގެންނާއި، ނުކުށް ގެންނަ ލުއި މުދަލެވެ.

2023 ވަނަ އަހަރުގެ ތަފާސް ހިސާބަށް ބަލާއިރު، ރާއްޖެ އެތެރެކޮށްފައިވަނީ 62،092 ކޮންޓެއިނަރެވެ. އަދި 117،068 ފްރެއިޓް ޓަނުގެ ޖެނެރަލް ކާގޯއެވެ. އެހެންކަމުން ނިމުނު 2024 ވަނަ އަހަރާއި އޭގެ ކުރީ 2023 ވަނަ އަހަރާ އަޅާބަލާއިރު، އެތެރެކުރި ކޮންޓެއިނަރުތަކުގެ އަދަދު 7 އިންސައްތަ އިތުރެވެ. އަދި އެތެރެކުރި ޖެނެރެލް ކާގޯގެ ވޮލިޔުމް 29 އިންސައްތަ ފްރެއިޓް ޓަނު އިތުރެވެ.

ތަފާސްހިސާބުތަކަށް ބަލާއިރު މިދިޔަ އަހަރާ އެންމެ ގާތަށް ކޮންޓެއިނަރު ރާއްޖެ އެތެރެކޮށްފައިވަނީ 2018 ވަނަ އަހަރުއެވެ. އެއީ 63،002 ކޮންޓެއިނަރެވެ. އަދި އެ އަހަރު އެތެރެކޮށްފައިވަނީ 123،669 ފްރެއިޓް ޓަނުގެ ކާގޯއެވެ.

ވަޖީހު ވިދާޅުވީ މިދިޔަ އެމްޑީޕީގެ ސަރުކާރުގައި ހޭދަވި 5 އަހަރުގެ ތަފާސްހިސާބަށް ބަލާއިރު، ކޮންޓެއިނަރު ރާއްޖެއަށް އެތެރެކުރެވޭ މިންވަރުހުރީ އެވްރެޖް މިންވަރެއްގައި ކަމަށެވެ. އެހެންކަމުން ޤައުމުގެ އިޤުތިޞާދަށް މާބޮޑު ކުރިއެރުމެއް މިދިޔަ ސަރުކާރުގައި އައިސްފާނުވާކަމަށް ވަޖީހު ވިދާޅުވިއެވެ.

ވަޖީހު ވިދާޅުވީ ތާރީޚުގައިވެސް އެންމެ ގިނަ އަދަދަކަށް ކާގޯ އެތެރެކުރެވެނު އަހަރަކަށް 2024 ވަނަ އަހަރުވުމުން ދޭހަކޮށްދެނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމުގެ ފުރަތަމަ އަހަރުވެސް، ރާއްޖޭގެ އިޤުތިޞާދަށް ބޮޑު ކުރިއެރުމެއް އައިސްފައިވާކަން ކަމަށެވެ.

ވަޖީހު ވިދާޅުވީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދުތަކުގެ ތެރޭގައި ހިމެނޭ ގިނަ ޕްރޮޖެކުޓުތަކެއް މިއަހަރު ފެށިގެން ދިއުމުން ރާއްޖޭގެ އިޤުތިޞާދަށް ބޮޑެތި ކުރިއެރުންތަކެއް މިއަހަރުވެސް ލިބޭނެ ކަމަށެވެ.

"އިޤުތިޞާދަށް އަންނަ ކުރިއެރުމާއެކު ރާއްޖެ އަންނަ ކާގޯގެ އަދަދު ވަރަށްބޮޑު ތަނުން އިތުރުވެގެންދާނެތީ، ޕޮރޮޖެކުޓުތަކަށް ދަތިނުވާ ގޮތަށް ކާގޯ މެނޭޖުކުރުމަށްޓަކައި އެމްޕީއެލްއިން މިދަނީ ތައްޔާރު ވަމުން." ސޯޝަލް މީޑިޔާގައި ޙިއްސާކުރެއްވި ޕޯސްޓެއްގައި ވަޖީހު ވިދާޅުވިއެވެ.

ރާއްޖެއަށް އެތެރެކުރާ ކޮންޓެއިނަރުގެ އަދަދު އިތުރުވުމާއެކު ކޮންޓެއިނަރު ބެހެއްޓޭނެ އަދަދު އިތުރުކުރުމަށް މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަސައްކަތް ސަރުކާރުން ދަނީ ކުރަމުންނެވެ. މީގެ އިތުރުން މާލެ ވިޔަފާރި ބަނދަރު ފުރެމުންދާތީ އެކި ބާވަތްތަކުގެ ކާގޯ ހިމެނޭ ކޮންޓެއިނަރު ބަނދަރުގައި ބެހެއްޓޭނެ ދުވަސްތަކުގެ އަދަދު މަދުކުރުމަށް ނިންމާފައިވާކަން އެމްޕީއެލްގެ ސީއީއޯ ވަޖީހު ވަނީ ހާމަކުރައްވާފައެވެ.

މިހާރު މާލޭ ވިޔަފާރި ބަނދަރުގައި އެއްފަހަރާ ބެހެއްޓޭނީ 2،200 ކޮންޓެއިނަރެވެ.

މޯލްޑިވްސް ކަސްޓަމްސް ސަރވިސްގެ ތަފާސްހިސާބަށް ބަލާއިރު ޢާންމުކޮށް ރާއްޖެއަށް އެތެރެކުރަނީ އެކި ބާވަތްތަކުގެ ތެލާއި ކާބޯތަކެތީގެ އެކި ބާވަތްތަކާއި މެޝިނަރީއާއި މެކޭނިކަލް އާލާތާއި އިލެކްޓްރޯނިކް އާލާތްތަކެެވެ. ރާއްޖެއަށް އެތެރެކުރެވޭ މުދާ މާލޭ ވިޔަފާރި ބަނދަރުގެ އިތުރުން ރާއްޖޭގެ އެކި ސަރަހައްދުތަކުގައިހުރި 5 ބަނދަރަކަށް ބާލައެވެ.