ހައްޖު ކޯޕަރޭޝަނާއެކު ޢުމްރާއަށް ގިނަ އަދަދެއްގެ ތުއްތު ކުދިން; ދައްކުވައިދެނީ އިތުބާރު
-
ޑިސެމްބަރުމަހު 822 މީހުން ޢުމްރާއަށް
-
ގިނަ އަދަދެއްގެ ތުއްތު ކުދިން ހިމެނޭ
މިދިޔަމަހު މޯލްޑިވްސް ހައްޖު ކޯޕަރޭޝަންގައި ޢުމްރާއަށް ދިޔަ މީހުންނާއެކު ގިނަ އަދަދެއްގެ ތުއްތު ކުދިން ބައިވެރިވެފައިވާކަމަށް އެ ކޯޕަރޭޝަނުން ވިދާޅުވެއްޖެއެވެ.
ހައްޖު ކޯޕަރޭޝަނުން ވިދާޅުވީ، މިކަމުން ދައްކުވައިދެނީ ދިވެހި ރައްޔިތުން އެ ކޯޕަރޭޝަންއަށް ކުރަމުންދާ އިތުރުބާރުކަމަށެވެ.
2024 ޑިސެމްބަރ އުމްރާ ދަތުރަކީ މިހާތަނަށް އެންމެ ގިނަ އަދަދެއްގެ މީހުން މޯލްޑިވްސް ހައްޖު ކޯޕަރޭޝަންގެ ހަވާލުގައި ޢުމްރާއަށް ދިޔަ ފަހަރެވެ. އެގޮތުން 822 މީހުން ވަނީ އެ ކޯޕަރޭޝަންގެ ހަވާލުގައި ޢުމްރާއަށް ގޮސްފައެވެ.
ޙައްޖު ކޯރޕަރޭޝަނުން ވިދާޅުވީ ޑިސެމްބަރ ޢުމްރާ ދަތުރުގައި އާއިލާތަކާއެކު ގިނަ އަދަދެއްގެ ތުއްތު ކުދިން ބައިވެރިވެފައިވާކަމަށެވެ. އަދި މިކަމުން ދައްކުވައިދެނީ ދިވެހި ޢާއިލާތަކުން ޙައްޖު ކޯރޕަރޭޝަނަށް އިތުބާރުކޮށް އެ ކޯޕަރޭޝަނުން ކުރަމުންދާ މަސައްކަތް ބަލައިގަންނަ މިންވަރުކަމަށް އެ ކޯޕަރޭޝަނުން ވިދާޅުވެއެވެ.
ޙައްޖު ކޯރޕަރޭޝަންގެ އެހެން ޢުމްރާ ދަތުރުތަކެކޭ އެއްފަދައިން މި ދަތުރުގައިވެސް ދަތުރުގައި ބައިވެރިވި ތުއްތު ކުދިންނަށް ޚާއްޞަކޮށްގެން ވަނީ ދީނީ މަޢުލޫމާތުތަކާއެކު ކުޑަކުދިންގެ ހަވީރެއް ބާއްވާފައެވެ.
ކުޑަކުދިންގެ ދީނީ ހަވީރު ބާއްވާފައިވަނީ މައްކާގައި ހިފާފައި ހުންނަ އަލަބަލަދުއް ޠައްޔިބް އަޖްޔާދު ހޮޓަލުގައެވެ.
ހައްޖު ކޯޕަރޭޝަނުން ވިދާޅުވީ، އެ ކޯޕަރޭޝަންގެ އަމާޒަކީ ޚިދުމަތް ހޯދާ ފަރާތްތަކުގެ ހިޔާލަށް ބަލައި މުސްތަޤްބަލުގައި ކޯޕަރޭޝަނުންދޭ ޚިދުމަތްތައް އިތުރަށް ރަނގަޅުކުރުންކަމަށެވެ.