މިދިޔަ ޑިސެމްބަރު މަހު ރާއްޖޭގައި ބޭއްވި އޭޝިއަން ޓެނިސް ފެޑެރޭޝަން (އޭޓީއެފް) ގެ ދެ މުބާރާތްވެސް ނިމިގެންދިޔައީ ވަރަށް ކާމިޔާބުކޮށް ކަމަށް ޓެނިސް އެސޯސިއޭޝަން އޮފް މޯލްޑިވްސްގެ ނައިބު ރައީސް އިގްނާޒް މަންސޫރު ވިދާޅުވެއްޖެއެވެ.
ޕީއެސްއެމް އިން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަދައްކަވަމުން އިގްނާޒް ވިދާޅުވީ ބައިނަލްއަގުވާމީ މިންގަނޑުތަކާ އެއްގޮތަށް، އެ މިންގަނޑަށް ފަތޭ ރެފުރީންނާއެކު މުބާރާތް ބޭއްވުމަކީ ލިބުނު ބޮޑު ކާމިޔާބެއް ކަމަށެވެ.
އޭޓީއެފް މުބާރާތެއް ރާއްޖޭގައި ބޭއްވިގެންދިޔައީ އެފަދަ މުބާރާތެއް ބާއްވަން މަސައްކަތްކުރަމުން އަންނަތާ ދުވަސްތަކެއް ފަހުންކަން އިގްނާޒް ފާހަގަކުރެއްވިއެވެ. މީގެ ކުރިން ބައިނަލްއަގުވާމީ ކުޅުންތެރިން ހިމަނައިގެން ދެ މުބާރާތެއް ރާއްޖޭގައި ބޭއްވިފައިވުމާއެކު، މި ފަހަރުގެ އޭޓީއެފް މުބާރާތް ރާއްޖޭގައި ބޭއްވިދާނެކަމުގެ ޔަގީންކަން ލިބިގެންދިޔަ ކަމަށާއި، 2023 ވަނަ އަހަރުގެ ތެރޭގައި އޭޓީއެފް މުބާރާތެއް ރާއްޖޭގައި ބޭއްވޭނެކަމުގެ ފެހި ސިގްނަލް ބައިނަލްއަގުވާމި ފެޑްރޭޝަންތަކުން ދިން ކަމަށްވެސް އިގްނާޒް ވިދާޅުވިއެވެ.
"މިދިޔަ އަހަރު އަޅުގަނޑުމެންނަށް ޔަގީންކަން ލިބިއްޖެ އޭޓީއެފްގެ މުބާރާތް ބޭއްވޭނެކަން. އެ ހިސާބުން ވަރަށް ގިނަ ވޮލެންޓިއަރުންނާއެކު އަޅުގަނޑުމެން މުބާރާތުގެ މަސައްކަތް ފެށިން." އިގްނާޒް ވިދާޅުވިއެވެ.
އިގްނާޒް ވިދާޅުވީ މުބާރާތުގެ ކާމިޔާބީ ފާހަގަކުރަނީ އިންސާފުކުރި ރެފުރީންގެ ކޮމެންޓުތަކަށް ބެލުމަށްފަހު ކަމަށާއި، އެގޮތުން މުބާރާތުގެ ރޭވުންތެރިކަމާއި، ކަންކަން އިންތިޒާމުކުރުމުގައި ރާއްޖެގެ ޓެނިސް އެސޯސިއޭޝަނުން ގެންގުޅުނު އުސޫލުތައް ވަރަށް ހިތްހަމަޖެހޭ ކަމަށް ފާހަގަކޮށްފައިވާ ކަމަށެވެ. އަދި ރާއްޖެއިން ބޭރުން މުބާރާތުގައި ވާދަކުރި ކުޅުންތެރިންވެސް، މުބާރާތުގެ ރޭވުންތެރިކަމާ މެދު ވަރަށް ބޮޑަށް ހިތްހަމަޖެހުނު ކަމަށް އިގްނާޒް ވިދާޅުވިއެވެ.
އިގްނާޒް ވިދާޅުވީ މުބާރާތުގައި ވާދަކުރި ދިވެހި ކުޅުންތެރިންގެ ފަރާތުން ރަނގަޅު ކުޅުމެއް ފާހަގަކުރެވުނު ކަމަށާއި، ޚާއްސަކޮށް މުބާރާތުގައި ކާމިޔާބު ހޯދި ރާއްޖޭގެ އާރާ އާސާލް އާޒިމްގެ ފަރާތުން މޮޅު ކުޅުމެއް ފެނިގެންދިޔަ ކަމަށެވެ. މުބާރާތުގެ ދެ ކެޓެގެރީއަކުން ޗެމްޕިއަންކަން ހޯދި އާރާ ބުނީ މުބާރާތަށް ތައްޔާރުވީވެސް ކާމިޔާބު ހޯދޭނެކަމުގެ ހުވަފެން ދެކިގެން ކަމަށެވެ. އެގޮތުން މުބާރާތުގައި ދެވޭނެ އެންމެ ދުރަށްދިޔުމުގެ އަޒުމު ކަނޑައެޅި ކަމަށާއި، އެއީ ކާމިޔާބު ހޯދުމުގެ އެންމެ ބޮޑު އަސްލުކަމަށް އާރާ ފާހަގަކުރިއެވެ.
ރާއްޖޭގައި މިދިޔަ އަހަރުގެ ފަހުކޮޅު ބޭއްވި އޭޓިފް ޖޫނިއަރ ފުރަތަމަ މުބާރާތުގައި 31 ކުޅުންތެރިން އަދި ދެވަނަ މުބާރާތުގައި 39 ކުޅުންތެރިން ވަނީ ވާދަކޮށްފައެވެ. އަދި މުބާރާތުގައި އޭޝިއާ ބައްރުގެ ކަޒަކިސްތާނާއި، ޗައިނާ އާއި، އިންޑިއާގެ ކުޅުންތެރިން ހިމެނެވެ. މީގެ އިތުރުން އިންގްލަންޑް އަދި ބްރެޒިލްގެ ކުޅުންތެރިންވެސް ވަނީ ވާދަކޮށްފައެވެ.