މިނިވަން ވިޔަފާރީގެ އެއްބަސްވުން: ކުދި ވިޔަފާރިތަކަށް ބޭނުންވާ ސާމާނު ހޯދުމަށް ލުޔެއް

ރާއްޖޭގެ ކުދި އަދި މެދު ފަންތީގެ ވިޔަފާރިތަކަށް ދިމާވާ އެންމެ ބޮޑު އެއް ގޮންޖެހުމަކީ މަސައްކަތްތަކަށް ބޭނުންވާ އާލަތްތައް އަގުބޮޑުވުމާއި އަދި ރާއްޖެއިން ފަސޭހައިން އެ މަސައްކަތްކުރުމަށް ބޭނުންވާ ސާމާނު ނުލިބުމުގެ މައްސަލައެވެ. މިފަދަ ގިނަ މައްސަލަތަކައް ރާއްޖެއާއި ޗައިނާ ދެމެދު ޤާއިމްކޮށްފައިވާ މިނިވަން ވިޔަފާރީގެ އެއްބަސްވުމުން ހައްލު ލިބިގެންދެއެވެ.

ރާއްޖޭގައި އަތްތެރި މަސައްކަތްތައް ކުރާ ފަރާތްތައް އިތުރުވަމުން އަންނަ އިރު، ފަންނުވެރިންނަށް އޮތް އެންމެ ބޮޑު ގޮންޖެހުމަކީ މަސައްކަތްކުރުމަށް ބޭނުންވާ ސަމާނު ހޯދުމަށް ދިމާވާ ދަތިތަކެވެ. ރާއްޖެއިން ބޭރުން ގެންނަން ބަލާއިރު އަގުބޮޑުވުމެވެ.
ޗައިނާ-ރާއްޖެ މިނިވަން ވިޔަފާރީގެ އެއްބަސްވުމާއި އެކު ފަހިވެގެންދާ ފުރުސަތުތަކުގެތެރޭގައި އަތްތެރި މަސައްކަތްތައްކުރާ ފަރާތްތަކަށް ބޭނުންވާ ތަކެތި އަދި އެމަސައްކަތް ކުރުމަށް ބޭނުންވާ ވަސީލަތްތަކުން ޑިއުޓީ މާއާފްވެގެންދިޔުން ހިމެނެއެވެ. އިޤްތިސާދީ ތަރައްޤީއާއި ވިޔަފާރިއާބެހޭ ވުޒާރާއިން ވިދާޅުވީ ފޮޓޯގްރަފީ ފަދަ އުފެއްދުންތެރި މަސައްކަތްކުރާ ފަރާތްތަކަށް ބޭނުންވާ ސާމާނުންވެސް ޑިއުޓީ މާޢަފްވެގެންދާނެ ކަމަށެވެ.

ރާއްޖޭގެ ކުދި އަދި މެދުފަންތީގެ މަސައްކަތް ކުރާ ފަރާތްތަކަށް ލުއިތަކެއް ލިބިގެންދާއިރު، އިމާރާތްކުރުމުގެ ސިނާޢަތަށްވެސް ބޮޑު ލުޔެއް މި އެއްބަސްވުމުގެ ސަބަބުން ލިބިގެންދާނެ ކަމަށް އިޤްތިޞާދީ ތަރައްޤީއާބެހޭ ވުޒާރާއިން ވިދާޅުވެއެވެ. އެގޮތުން އިމާރާތްކުރުމުގެ މަސައްކަތަށް ބޭނުންވާ ސާމާނުން ޑިއުޓީ މަޢާފުވެގެންދެއެވެ. މީގެއިތުރުން ފަރުނީޗަރު ފަދަ ތަކެތިންވެސް މި އެއްބަސްވުމުގެ ދަށުން ޑިއުޓީ މަޢާފްވެގެންދާ ކަމަށް އެ ވުޒާރާއިން ވަނީ ހާމަކޮށްފައެވެ.

ރާއްޖެއަށް އެތެރެކުރާ ގިނަ މުދާތަކަކުން އެއްބަސްވުމުގެ ދަށުން ޑިއުޓީ މައާފްވާއިރު، ރާއްޖެއިން ބޭރުކުރާ މަހަށްވެސް ޑިއުޓީ މަޢާފްވެގެންދާނެއެވެ. މިއާއެކު ރާއްޖޭގެ މަސްވެރިކަމުގެ ސިނާޢަތަށް ކުރިއެރުންތަކެއް ލިބިގެންދާނެ ކަމަށް ސަރުކާރުން ވިދާޅުވެއެވެ.

ރާއްޖެއާއި ޗައިނާއާ ދެމެދު ސޮއިކޮށްފައިވާ މިނިވަން ވިޔަފާރީގެ އެއްބަސްވުމަށް އަމަލުކުރަން ފަށާފައިވާއިރު، ޗައިނާއިން މުދާ ގެންނަން ބޭނުންވާ ފަރާތްތަކަށް ބޭނުންވާ މައުލޫމާތު މޯލްޑިވްސް ކަސްޓަމްސް ސާވިސްގެ ވެބްސައިޓުގައި މިހާރު ވަނީ އާއްމުކޮށްފައެވެ. އެގޮތުން ޓެރިފް ރޭޓުތައް މިހާރު ކަސްޓަމްސް ވެބްސައިޓުން ބަލާލެވޭނެއެވެ.

ކަސްޓަމްސް އިން ވިދާޅުވީ، ވެބްސައިޓުގައި އާންމުކޮށްފައިވާ މިނިވަން ވިޔަފާރީގެ އެއްބަސްވުމުގެ ލުއިތައް ބޭނުންވާ ފަރާތްތަކުން އެ ލުއިތައް ހޯދުމަށް، ސެޓިފިކެޓް އޮފް އޮރިޖިން ބޭނުންވާނެ ކަމަށެވެ. އެގޮތުން އެ ސެޓްފިކެޓް ހުށަހެޅައިގެން ނޫނީ، މިނިވަން ވިޔަފާރީގެ އެއްބަސްވުމުގެ ދަށުން ލިބޭ ޑިއުޓީގެ ލުއިތައް ނުލިބޭނެ ކަމަށް ކަސްޓަމްސް އިން ވިދާޅުވެއެވެ.

އަދި ރާއްޖެއިން ބޭރުކުރާ މުދަލަށްވެސް ކަސްޓަމްސްއިން ދޫކުރާ ސެޓްފިކެޓް އޮފް އޮރިޖިން، ޗައިނާގެ އިދާރާތަކަށް ހުށަހަޅަން ޖެހޭނެ ކަމަށާއި ސެޓްފިކެޓް ހޯދުމަށް ބޭނުންވާ އެޕްލިކޭޝަން މިހާރު ކަސްޓަމްސްގެ ވެބްސައިޓުން ލިބޭނެ ކަމަށް ކަސްޓަމްސްއިން ވިދާޅުވެއެވެ.

ސަރުކާރުން ވިދާޅުވެފައިވާގޮތުގައި މިހާރުވެސް ދިވެހިރާއްޖެއާއި ޗައިނާއާ ދެމެދު 700 މިލިއަން ޑޮލަރުގެ ވިޔަފާރި ދަނީ ކުރެވެމުންނެވެ. އަދި މިނިވަން ވިޔަފާރީގެ އެއްބަސްވުމަށް އަމަލު ކުރަން ފެށުމާއެކު މި އަދަދު 1 ބިލިޔަން ޑޮލަރަށް އަރާނެ ސަރުކާރުން ލަފާކުރައްވައެވެ.