މިިދިޔަ އަހަރު ސަރުކާރުން ދިވެހި ވޮލީބޯޅައަށް ވަރަށް ބޮޑު އެހީތެރިކަމެއް ވެދީފައިވާ ކަމަށް ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ ރައީސް މުޙައްމަދު ލަތީފް ވިދާޅުވެއްޖެއެވެ. ލަތީފް މިހެން ވިދާޅުވީ ޓީވީއެމް އިން ގެނެސްދިން މި ހަފުތާގެ "ހޭޔަންބޯ" ޕްރޮގްރާމުގައި ބައިވެރިވަޑައިގެން ދެއްކެވި ވާހަކަފުޅުގައެވެ.
ޓީވީއެމްގެ "ހޭޔަންބޯ" ޕްރޮގްރާމުގައި ލަތީފް، އޭނާގެ ވޮލީބޯޅައިގެ ތަޖުރިބާ ހިއްސާކުރައްވަމުން ވިދާޅުވީ ނިމިދިޔަ އަހަރު ރާއްޖޭގައި ބައިނަލްއަގުވާމީ ތިން މުބާރާތެއް ބޭއްވުމަކީ ވޮލީއަށް ލބުނު ބޮޑު ކާމިޔާބެއް ކަމަށެވެ. އަދި އެފަދަ މުބާރާތްތައް ރާއްޖޭގައި ބާއްވައި، ދިވެހި ޓީމުން ދައްކާ ކުޅުމުގެ ސަބަބުން ހާމަވެގެން ދަނީ ރާއްޖޭގެ ވޮލީ ކުރިއެރުވުމަށް ކުރަމުންދާ މަސައްކަތްތައް ކަމަށްވެސް ވިދާޅުވިއެވެ.
"އަޅުގަނޑާ އެއްކޮށް ވަރަށް ބޮޑު ޓީމެއް މަސައްކަތްކުރޭ. އަޅުގަނޑު ފްރަންޓްލައިނުގައި ހުރިކަމުގައި ވިޔަސް، މި ކަހަލަ ދުވެހެއްގައި އެބޭފުޅުންގެ ހަނދާން އާކުރަންވެސް ޖެހޭނެ." ލަތީފް ވިދާޅުވިއެވެ.
ލަތީފް ވިދާޅުވީ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ގެ ރައީސްކަމުގެ މަގާމަކީ ދިވެހި ވޮލީއަށް ލިބުނު މަގާމެއް ކަމަށާއި، އެއީ އޭނާ ވެގެން ލިބުނު މަގާމެއް ނޫން ކަމަށެވެ. އަދި އެއީ ރާއްޖޭގެ ސަރުކާރުން ކުރި އިވެންސްޓްމަންޓުގެ ނަތީޖާ ކަމަށްވެސް ވިދާޅުވިއެވެ. މީގެ އިތުރުން އޭޝިއަން ވޮލީބޯލް ކޮންފެޑެރޭޝަން (އޭވީސީ) ގެ އެގްޒެކްޓިވް ނައިބު ރައީސަކަމުގެ މަގާމުވެސް ލިބިގެންދިޔައީ އެކުގައި މަސައްކަތްކުރި ދިވެހި ޓީމުގެ ސަބަބުން ކަމަށް ލަތީފް ވަނީ ވިދާޅުވެފައެވެ.
އޭވީސީ ބޯޑުގައި މަސައްކަތްކުރުމުގެ ފުރުސަތު ލަތީފަށް ލިބިވަޑައިގެންފައިވާއިރު، އޭނާ އަންނަނީ ކާވާގެ ރައީސްގެ މަގާމު ދެވަނަ ދައުރަކަށް ފުރުއްވަމުންނެވެ. މިއީ ރާއްޖޭގެ ފަރާތެއް އޭވީސީ އެގްޒެކެޓިވް ކޮމިޓީން ފުރުސަތު ލިބުނު ފުރަތަމަ ފަހަރެވެ.