ކުރިއަށް 24 ގަޑިއިރު ރާއްޖޭގެ އުތުރާއި މެދު ރާއްޖެތެރެއަށް މޫސުން ގޯސްވާނެ

ރާއްޖެއަށް މިހާރު ކުރަމުންދާ ވިއްސާރައިގައި ކުރިއަށް އޮތް 24 ގަޑިއިރު އުތުރާއި މެދު ރާއްޖެތެރެއަށް މޫސުން ގޯސްވާނެކަމަށް މޫސުމާއި ބެހޭ ޤައުމީ އިދާރާއިން ވިދާޅުވެއްޖެއެވެ.

ރާއްޖެއަށް މިހާރު ކުރަމުންދާ ވިއްސާރައަކީ ސްރީލަންކާގެ އިރު ދެކުނުގައި އުފެދިފައިވާ ސާކިއުލޭޝަނެއްގެ ސަބަބުން ކުރަމުންދާ ވިއްސާރައެކެވެ. އަދި މިހާރު އެ ސާކިއުލޭޝަންގެ ބާރު ދަށްވަމުންދާކަމަށް މެޓް އޮފީހުން ވިދާޅުވެއެވެ.

މޫސުމާ ބެހޭ ޤައުމީ އިދާރާއިން ވިދާޅުވީ ކުރިއަށް އޮތް 24 ގަޑިއިރު އުތުރާއި، މެދުރާއްޖެތެރޭގެ އެކި ހިސާބުތަކަށް ވިއްސާރަ ކުރާނެ ކަމަށެވެ. އަދި ބައެއް ރައްތަކަށް ބޯކޮށް ވާރޭވެހޭނެ ކަމަށާއި، ދެކުނުގެ އެކި ހިސާބަށް ކެރީގެ އަސަރު ފޯރާނެ ކަމަށެވެ.

މެޓް އޮފީހުން ވިދާޅުވީ، ދެކުނުގެ އަތޮޅުތަކަށް ހުޅަނގާއި ހުޅަނގު އުތުރުން، އެހެނިހެން ހިސާބުތަކަށް އިރު އުތުރާއި، އިރުން، ގަޑިއަކު 8 މޭލާއި، 18 މޭލާއި ދެމެދު ބާރުމިނުގައި ވައިޖެހޭނެ ކަމަށްވެސް ލަފާ ކުރެވޭ ކަމަށް މެޓުން މައުލޫމާތު ދެއްވައެވެ. އަދި ވިލާގަނޑުގައި ގަޑިއަކު 35 މޭލަށް ވައިގަދަވުން އެކަށީގެންވާ ކަމަށްވެސް މެޓުން ވިދާޅުވެއެވެ.

ކަނޑު އާދައިގެ ވަރަކަށް ގަދަވާނެ ކަމަށާއި، އަދި ވިލާގަނޑުގައި ގަދަވުން އެކަށީގެންވާ ކަމަށްވެސް މެޓުން ވިދާޅުވެއެވެ. މި ވިިއްސާރަ އަލިވާނެކަމަށް ބެލެވެނީ އަންނަ ހޯމަ ދުވަހުން ފެށިގެންކަމަށް މޫސުމާއި ބެހޭ ޤައުމީ އިދާރާއިން ވިދާޅުވެއެވެ.

"އަޅުގަނޑުމެންނަށް ލަފާކުރެވޭ ގޮތުގައި މިހާރު މި ކުރަމުންދާ ވިއްސާރަ މިހާރު ކޮންމެސް ވަރަކަށް މަޑުޖެހިފައިމި ވަނީ. އެހެންނަމަވެސް ވިއްސާރަ ކެރިއަށް ބަދަލުވެ އާދިއްތަ ނޫނީ ހޯމައިންވެސް ރަނގަޅުވާކެމަަށް ބެލެވެނީ" މެޓް އޮފީހުން ވިދާޅުވިއެވެ.

މޫސުމާއި ބެހޭ ޤައުމީ އިދާރާއިން ވިދާޅުވީ، ރާއްޖެއަށް މިހާރު ކުރަމުންދާ ވިއްސާރައާއި މީގެ ކުރިން ކުރާ ވިއްސާރައާއި ކޮންމެސް ވަރެއްގެ ތަފާތެއް އެބަހުރިކަމަށެވެ. އެގޮތުން ކުރިން ފެންބޮޑު ނުވާވަރަށް މި ފަހުން ކުރާ ވިއްސާރައިގައި ފެން ބޮޑުވާކަންވެސް ފާހަގަވާކަމަށް މެޓް އޮފީހުން ވިދާޅުވެއެވެ.