ވިއްސާރައިގައި ލިބުނު ގެއްލުންތައް ވަޒަންކުރުމަށް އެންޑީއެމްއޭގެ ޓީމުތައް ގޭބިސީތަކަށް ޒިޔާރަތްކުރަނީ

މާލެއަށް ކުރި ވިއްސާރައިގައި އާންމުންގެ ގޭބިސީތަކަށް ލިބުނު ގެއްލުން ދެނެގަތުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން އާދިއްތަ ދުވަހު ގެތަކަށް ޒިޔާރަތްކުރަމުންދާނެކަމަށް އެއޮތޯރިޓީން ވިދާޅުވެއްޖެއެވެ.

ބުރާސްފަތި ދުވަހާއި ހުކުރު ދުވަހު މުޅި ރާއްޖެއަށް ކުރި ވިއްސާރައިގައި އެންމެ ބޯކޮށް ވާރޭވެހުނުކަމަށް ރިކޯޑުކުރެވިފައިވަނީ މާލެއަށެވެ. ބޯކޮށް ވާރޭވެހުމުގެ ސަބަބުން މާލޭގައި ފެންބޮޑުވެ ޢާއްމުންގެ ގޭބިސީތަކަށާއި ފިހާރަތަކަށްވެސްވަނީ ބޮޑެތި ގެއްލުންތަކެއްވެފައެވެ.

ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވިދާޅުވީ، މި ވިއްސާރައިގައި 36 ގޭބިސީއަކަށް ގެއްލުންވުމުގެ ސަބަބުން ވަގުތީ ބޯހިޔާވަހިކަން އެފަރާތްތަކަށް ފޯރުކޮށްދީފައިވާކަމަށެވެ. ވަގުތީ ބޯހިޔާތަކުގައި ތިބި މީހުންނަށް އެފުރުސަތު ދީފައިވަނީ 2 ދުވަހުގެ މުއްދަތަކަށްކަމަށާއި، ގެއްލުން ލިބިގެން ރިޕޯޓުކޮށްފައިވާ ގޭބިސީތަކުގެ ޙާލަތު ވަޒަންކުރުމަށް އާދިއްތަ ދުވަހު އެންޑީއެމްއޭގެ ފަރާތުން ގޭބިސީތަކަށް ޒިޔާރަތްކުރާނެކަމަށެވެ.

އެންޑީއެމްއޭއިން ވިދާޅުވީ، ވަގުތީ ބޯހިޔާވަހިކަން ފޯރުކޮށްދީފައިވާ ފަރާތްތަކުން، އެފަރާތްތަކުން ދިރިއުޅެމުން އައިތަން އާއްމު ޙާލަތަކަށް ގެނައުމުގެ މަސައްކަތް ކުރަމުންކަމަށެވެ. އަދި ލިބިފައިވާ ގެއްލުންތައް ގޭގައި ދިރިއުޅޭ ފަރާތްތަކުން ދެނެގަނެ އެކަން އެންޑީއެމްއޭގެ ޓީމުތަކަށް ކިޔައިދެވޭނެ ވަގުތު ދިނުމަށްފަހު، އާދިއްތަ ދުވަހުގެ އެސެސްމަންޓަށްފަހު އެފަރާތްތަކަށް ބޭނުންވަނީ ކޮންކަހަލަ އެހީތެރިކަމެއްތޯ ބަލާނެކަމަށް އެންޑީއެމްއޭއިން ވިދާޅުވެއެވެ.

މާލެއަށް ކުރި ވިއްސާރާގައި ފެންބޮޑުވުމުގެ ސަބަބުން ވަގުތީ ބޯހިޔާވަހިކަން ފޯރުކޮށްދެވުނު ފަރާތްތަކުން ދަނީ އެފަރާތްތަކުގެ ދިރިއުޅެމުންއައި ތަން އާންމު ހާލަތައް ގެނައުމަށް މަސައްކަތްކުރަމުން.

— NDMA Maldives (@NDMAmv) January 4, 2025

އެންޑީއެމްއޭއިން ވިދާޅުވީ، ބައެއް ގޭބިސީތަކުގައި ކައްކާކެވޭނެ ގޮތެއް ނެތްކަމަށާއި، އަދި ބައެއް ގޭބިސީތަކުގެ ފަރުނީޗަރުތަކަށް ބޮޑެތި ގެއްލުންވެގެން ރިޕޯޓުކޮށްފައިވާކަމަށެވެ. އެހެންކަމުން މިހުރިހާކަމެއް ދެނެގަތުމުގެ މަސައްކަތް އާދިއްތަ ދުވަހުކުރުމަށް ހަމަޖެހިފައިވާކަމަށް އެންޑީއެމްއޭއިން ފާހަގަކުރައްވައެވެ.

އެއޮތޯރިޓީން ވިދާޅުވީ، ވިއްސާރައިގައި އަތޮޅުތަކުގެ ރަށްތަކުން ގެއްލުންވެގެން ރިޕޯޓުކޮށްފައިވާ ރަށްރަށުގެ ކައުންސިލްތަކުން ގޭބިސީތަކަށް ލިބުނު ގެއްލުން ދެނެގަތުމުގެ މަސައްކަތް ކުރަމުން އަންނަކަމަށެވެ. މޫސުމީ ވިއްސާރައިގައި ޢާއްމު ރައްޔިތުންގެ ގޭބިސީތަކަށާއި މުދަލަށް ލިބެމުންދާ ގެއްލުން އަހަރުން އަހަރަށް އިތުރުވަމުންދާކަމަށް އެންޑީއެމްއޭއިން ވިދާޅުވެއެވެ.

ހަފްތާ ބަންދާއި ދިމާކޮށް ރާއްޖޭގެ ބޮޑުބަޔަކަށް ވިއްސާރަކޮށްފައިވަނީ ރާއްޖެ ހިމެނޭ ސަރަޙައްދުގައި އުފެދިފައިވާ ކޮޅިގަނޑެއްގެ ސަބަބުންކަމަށް މޫސުމާ ބެހޭ ޤައުމީ އިދާރާއިން ވިދާޅުވެއެވެ. އަދި މިވިއްސާރަ އަލިކުރާނެކަމަށް ބެލެވެނީ އަންނަ ހޯމަ ދުވަހުން ފެށިގެންކަމަށް މެޓު އޮފީހުން ލަފާކުރައްވައެވެ.