އިންޑިއާގެ އެހީގައި ކުރިއަށްދާ މަޝްރޫޢުތަކާއެކު ފެނިގެންދަނީ ދެޤައުމުގެ ގުޅުން ވަރުގަދަކަން: ޚާރިޖީ ވަޒީރު

ރާއްޖެއާއި އިންޑިއާއާއި ދެމެދު ތަރައްޤީގެ މުހިއްމު ގިނަ މަސައްކަތްތަކެއް ކުރަމުންދާކަމަށާއި އޭގެއިން ފެނިގެންދަނީ ދެޤައުމުގެ ދެމެދުގައި އޮތް ގާތްގުޅުންކަމަށް ޚާރިޖީ ވަޒީރު ޑރ. ޢަބްދުﷲ ޚަލީލު ވިދާޅުވެއްޖެއެވެ.

ވަޒީރު މިހެން ވިދާޅުވީ، އިންޑިއާއަށް މިހާރުކުރައްވަމުންގެންދަވާ ރަސްމީ ދަތުރުފުޅުގެ ތެރެއިން ބައިނަލްއަޤުވާމީ ޓީވީ ޗެނަލްއެއްކަމުގައިވާ ވިއޯންއަށް ދެއްވި އިންޓަރވިއުއެއްގައެވެ.

ވިއޯންއަށް ދެއްވި އިންޓަރވިއުއެއްގައި ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވީ، ރާއްޖެއާއި އިންޑިއާއާއި ދެމެދު އޮތީ ޒަމާންވީ ގާތްގުޅުމެއްކަމަށެވެ. އަދި އެގުޅުން ދެމެހެއްޓުމުގައި ދެޤައުމުންވެސް އެންމެ އިސްކަމެއްދެނީ ދެޤައުމުގެ ދެމެދުގައި އޮތް އިޙްތިރާމާއި އިތުބާރުކަމަށް ވަޒީރު ފާހަގަކުރެއްވިއެވެ.

މިގޮތުން އަވައްޓެރި ޤައުމުތަކުގެ ތެރެއިން އިންޑިއާއިން ރާއްޖެއަށް ޚާއްސަ އިސްކަމެއްދެއްވާކަން ރާއްޖެއިން ޤަބޫލުކުރާކަމަށާއި، އެކަން އެންމެ ބޮޑަށް ހާމަވާ ކަންތައްތަކަކީ މިހާރުވެސް ރާއްޖޭގައި އިންޑިއާގެ އެހީތެރިކަމާއެކު ކުރިއަށްދާ ތަރައްޤީގެ އެތައް މަޝްރޫޢެއްކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ، ރައީސުލްޖުމްހޫރިއްޔާގެ "މޯލްޑިވްސް ފަސްޓް" ސިޔާސަތުގެ ދަށުން ހުރިހާ ޤައުމަކާވެސް ގުޅިގެން މަސައްކަތްކުރަން ރާއްޖެއިން ބޭނުންވާކަމަށެވެ. އަދި އެހެން ޤައުމުތަކާއެކު ބާއްވާ ގުޅުމަކުން ރާއްޖެއާއި އިންޑީއާއާ ދެމެދު އޮތް ޒަމާންވީގުޅުމަށް ހީނަރުކަމެއް ނާންނާނެކަމަށް ވަޒީރު ވިދާޅުވިއެވެ.

"ރާއްޖޭގައި މިހާރުވެސް އެތައް މަޝްރޫޢެއް އެބަ ކުރިއަށްދޭ އިންޑިއާގެ އެހީތެރިކަމާއެކު. މިގޮތުން 400 މިލިއަން ޑޮލަރުގެ ކަރަންސީ ސްވަޕްގެ މަސައްކަތް ރައީސްގެ ދަތުރުފުޅަށްފަހު ވަގުތުންވަނީ ފެށިގެން ގޮސްފައި. މީގެއިތުރުން ކަރަންސީ ސެޓަލްމަންޓްގެ މަސައްކަތްވެސްދަނީ ކުރަމުން، ހަމައެއާއެކު 60 މިލިއަން ޑޮލަރުގެ އިޖުތިމާޢީ އެކި އިތުރު ޕްރޮގްރާމްތަކުގެ މަސައްކަތްވެސް އެބަކުރިއަށްދޭ" ވަޒީރު ވިދާޅުވިއެވެ.

ޚާރިޖީ ވަޒީރު ވިދާޅުވީ، ތަރައްޤީގެ އިތުރުން ސަލާމަތީ ދާއިރާއިންވެސް ދެޤައުމު ގުޅިގެން ސަރަޙައްދީ ސުލްޙަ ދެމެހެއްޓުމަށް މަސައްކަތް ކުރައްވަމުންދާކަމަށެވެ. ވަޒީރު ވިދާޅުވީ، ތިލަމާލޭ ބްރިޖް މަޝްރޫޢަކީ މިވަގުތު ރާއްޖޭގައި ކުރިއަށްދާ އެންމެ ބިޔަ އެއް މަޝްރޫޢުކަމަށާއި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމަށް ވަޑައިގަތުމަށްފަހު މިމަސައްކަތް އަވަސްކުރުމަށް ދެޤައުމުގެ އިސްވެރިންގެ މެދުގައި އެކިފަހަރުމަތިން މަޝްވަރާތައް ކުރިއަށްގެންދަވާފައިވާކަމަށެވެ.

ބޯހިޔާވަހިކަމުގެ މަޝްރުޢުގެ ދަށުން 4000 ހައުސިންގ ޔުނިޓު ތަރައްޤީކުރުމުގެ މަސައްކަތްކުރިއަށްދާކަންވެސް ވަޒީރު ފާހަގަކުރެއްވިއެވެ. ހަމައެއާއެކު އިންޑިއާގެ ފާހަގަކޮށްލެވޭ ތަރިންގެ މެދުގައި ރާއްޖެއަކީ ފަތުރުވެރިކަމުގެ މުހިއްމު މަންޒިލެއްކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ، އިންޑިއާއަކީ ރާއްޖޭގެ ތަރައްޤީގެ މުހިއްމު ބައިވެރިއެއްކަމަށާއި އެކަން އެގޮތުގައި އޮންނާނެކަމަށް ޤަބޫލުކުރައްވާކަމަށެވެ. އަދި އިންޑިއާއަކީ އަމިއްލަ ތަރައްޤީއާއެކު އަވައްޓެރި ޤައުމުތަކުގައި މުހިއްމު ހިއްސާއެއް ދަމަހައްޓާ ޤައުމެއްކަން ވަޒީރުވަނީ ފާހަގަކުރައްވާފައެވެ.

ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާރިޖީ ސިޔާސަތު ބިނާވެފައިވަނީ "މޯލްޑިވްސް ފަސްޓް" މި ސިޔާސަތުގެ ދަށުން ރާއްޖޭގެ މިނިވަންކަމާއި އިސްތިޤުލާލަށް ބުރޫނާރާނެހެން ހުރިހާ ޤައުމަކާވެސް ގުޅިގެން މަސައްކަތް ކުރުމުގެ މައްޗަށް ކަމަށެވެ. މިގޮތުން އިންޑިއާއާއެކު އޮތްގުޅުންވެސް އިތުރު ހަރުފަތަކަށް ޖެހެމުންދާކަމަށާއި، ދެ ޤައުމުގެ ގުޅުމަށްވެސް ކުރިއަށްއޮތީ އުންމީދީ ދުވަސްތަކެއްކަން ވަޒީރު ފާހަގަކުރެއްވިއެވެ.