ގެދޮރުވެރިޔާ މަޝްރޫޢުގެ 4 ޓަވަރުގެ މަސައްކަތް އަންނަ މަހު ނިމޭނެ

ގެދޮރުވެރިޔާ މަޝްރޫޢުގެ ދަށުން ތަރައްޤީކުރަމުންދާ 4000 ހައުސިންގ ޔުނިޓުގައި ހިމެނޭ 4 ޓަވަރުގެ މަސައްކަތް އަންނަ މަހުގެ ތެރޭގައި ނިމޭނެކަމަށް ފަހި ދިރިއުޅުން ކޯޕަރޭޝަން އެފްޑީސީން ވިދާޅުވެއްޖެއެވެ. އެފްޑީސީން ވިދާޅުވީ، ހުރިހާ ޓަވަރުތަކެއްގެ މަސައްކަތް މިއަހަރުގެ ޖޫން މަހުގެ ތެރޭގައި ނިންމާލެވޭނެކަމަށް ލަފާކުރެވޭކަމަށެވެ.

މާލެ ސަރަޙައްދުގައި އޮތް ބޯހިޔާވަހިކަމުގެ މައްސަލަ ހައްލުކުރުމަށް، ނިމިދިޔަ ދައުރުގެ ތެރޭގައި ފެށި ބޯހިޔާވަހިކަމުގެ މަޝްރޫޢު "ގެދޮރުވެރިޔާ"ގެ ދަށުން 4000 ހައުސިންގ ޔުނިޓު ހުޅުމާލޭ ދެވަނަ ފިޔަވަހީގައި ދަނީ ތަރައްޤީކުރަމުންނެވެ. ފަހި ދިރިއުޅުން ކޯޕަރޭޝަން އެފްޑީސީން، އިންޑިއާގެ 2 ކުންފުންޏަކާ ހަވާލުކޮށްގެން މިމަސައްކަތް ކުރިއަށްގެންދާއިރު މީގެތެރެއިން ކޭޕީއެލްއިން ތަރައްޤީކުރަމުންދާ "އަމާން އުދަރެސް"ގެ 16 ޓަވަރުގެ ތެރެއިން 4 ޓަވަރެއްގެ މަސައްކަތް އަންނަ ފެބްރުއަރީ މަހުގެ ދެވަނަ ހަފްތާގެ ނިޔަލަށް ނިންމާލެވޭނެކަމަށް އެފްޑީސީންވަނީ ކޮންޓްރެކްޓަރާ ހަވާލާދީ ވިދާޅުވެފައެވެ.

އެފްޑީސީން ވިދާޅުވީ ފެބްރުއަރީ މަހު "އަމާން އުދަރެސްގެ" 11، 12، 13، އަދި 14 ވަނަ ޓަވަރުގެ މަސައްކަތް ނިމޭނެކަމަށެވެ. އަދި މި 4 ޓަވަރުގައި މާރިޗު މަހުގެ ތެރޭގައި ދިރިއުޅުމަށް ބޭނުންވާ ހުރިހާ ވަޞީލަތްތަކެއް ގާއިމުކޮށް ދިރިއުޅެވޭ ފެންވަރަށް ތައްޔާރުކުރެވޭނެކަމަށް އެކޯޕަރޭޝަނުން ވިދާޅުވެއެވެ. އަދި ބާކީ ހުރި ޓަވަރުތަކުގެ މަސައްކަތްވެސް އަންނަ ޖޫން މަހުގެ ނިޔަލަށް ނިންމާލުމަށް، މަސައްކަތް ކުރަމުން އަންނަކަމަށް އެފްޑީސީން ވިދާޅުވެއެވެ.

2021 ވަނަ އަހަރު އިންޑިއާގެ ކަލްޕަތާރޫ ޕްރޮޖެކްޓްސް އިންޓަރނޭޝަނަލް ލިމިޓެޑް، ކޭޕީއައިއެލްއާއި ނެޝަނަލް ބިލްޑިންގްސް ކޮންސްޓްރަކްޝަން ކޯޕަރޭޝަން، އެންބީސީސީއާއި ހަވާލުކޮށްގެން 32 ޓަވަރުގެ މަޝްރޫޢެއް އަންނަނީ ހިންގަމުންނެވެ. މީގެތެރެއިން ކޭޕީއެލްއިން ތަރައްޤީކުރަމުންދަނީ "އަމާން އުދަރެސް"ގެ 16 ޓަވަރެވެ. އަދި އެންބީސީސީން ތަރައްޤީކުރަމުންދަނީ އަމާން ދޯދި"ގެ 16 ޓަވަރެވެ. މީގެތެރޭގައި ހިމެނެނީ 3 ކޮޓަރިއާއި 2 ކޮޓަރީގެ އެޕާޓްމަންޓްތަކެކެވެ.

ގެދޮރުވެރިޔާ ސްކީމްގެ ދަށުން ފްލެޓު ލިބޭ 4000 މީހުންގެ ލިސްޓުގައި ހުރި ކަންބޮޑުވުންތަކާ ގުޅިގެން އެންޓި ކޮރަޕްޝަން ކޮމިޝަން، އޭސީސީންދަނީ މިމައްސަލަ ތަޙުގީގުކުރަމުންނެވެ. ގެދޮރުވެރިޔާ ސްކީމްގެ ދަށުން ފްލެޓަށް އެދި 20607 މީހުން ކުރިމަތިލިއެވެ. އެގޮތުން ފުރަތަމަ އެކުލަވާލާ އިޢުލާންކުރީ 4000 ފްލެޓް ލިބޭ މީހުންގެ ލިސްޓަށް ޝަކުވާއަށް ހުޅުވާލުމުން 7500އަށްވުރެ ގިނަ މީހުން ކަންބޮޑުވުން ފާޅުކޮށް ޝަކުވާ ހުށައެޅިއެވެ. މިލިސްޓްގައި ކޮރަޕްޝަނަށް މަގުފަހިވާ ކަންތައްތައް ހިމެނޭކަމަށް ބުނެ 300 އަށްވުރެ ގިނަ މީހުންވަނީ އޭސީސީއަށްވެސް މައްސަލަ ހުށައަޅާފައެވެ. އޭސީސީން މި ލިސްޓާ ގުޅޭ ތަޙުޤީޤު ހިންގާ ހާމަކުރިގޮތުގައި، 4000 ފްލެޓްގެ ލިސްޓަށް ހޮވި %59.6 މީހުންގެ ޝަރުތު ހަމައެއް ނުވެއެވެ. އެއްވެސް މައްސަލައެއް ނެތްކަމަށް ނިންމީ %20.7 ފޯމުގައެވެ.

ފްލެޓް ލިސްޓް މައްސަލަ މިހެން އޮތް އިރު ހުޅުމާލެ ދެވަނަ ފިޔަވަހީގައި ތަރައްޤީ ކުރާ ފްލެޓްތަކުގެ މަސައްކަތް ނިންމާ މިތަންތަނަށް މީހުންނަށް ވަދެވޭނެ އިންތިޒާމު ހަމަޖެއްސުމުގެ މަސައްކަތް ކަމާ ގުޅޭ މުއައްސަސާތަކާ ގުޅިގެން ފަހި ދިރިއުޅުން ކޯޕަރޭޝަނުން ގެންދަވަނީ ކުރައްވަމުންނެވެ.