އަޠުހަރު މަރުވި މައްސަލާގައި ދެ ފުލުހަކަށް ދައުވާކުރަން ޕީޖީއަށް ފޮނުވައިފި

މާލޭގައި އަންހެނަކު ރަހީނުކުރި މައްސަލައާ ގުޅިގެން ފުލުހުންގެ ބެލުމުގެ ދަށުގައި ހުއްޓާ މަރުވި އާދަމް އަޠުހަރު މަރުވި މައްސަލާގައި ދެ ފުލުހަކަށް ދައުވާކޮށް ދިނުމަށް އެދި ޕީޖީ އޮފީހަށް ފޮނުވައިފިއެވެ.

މިދިޔަ އޯގަސްޓު މަހުގެ 29 ވަނަ ދުވަހު، މާލޭގައި އަންހެނަކު ރަހީނުކުރި މައްސަލާގައި ށ. މިލަންދޫ، ހެޕީލޭންޑް، އަހްމަދު އަޠުހަރު ފުލުހުންގެ ބެލުމުގެ ދަށަށް ވަނީ ގެންގޮސްފައެވެ. އަދި ފުލުހުންގެ ބެލުމުގެ ދަށުގައި ހުއްޓާ އޭނާ މަރުވީ މިދިޔަ ސެޕްޓެމްބަރުމަހުގެ ދެވަނަ ދުވަހުއެވެ. އޭނާ ފުލުހުންގެ ބެލުމުގެ ދަށުގައި ހުއްޓާ މަރުވި މައްސަލަ، އޭރު ކަމާބެހޭ އިދާރާތަކުން ވަނީ ތަހުޤީޤުކުރަން ފަށާފައެވެ. ފުލުހުންވަނީ އެ ތަހުޤީޤަށް ފުރިހަމަ އެއްބާރުލުން ދޭނެ ކަމަށް އޭރު ވިދާޅުވެފައެވެ.

މީގެ ތެރެއިން އެޗްއާރްސީއެމްއިން ކުރި ތަހުޤީޤަށް ފަހު ދެ ފުލުހެއްގެ މައްޗަށް ދައުވާކުރަން ޕްރޮސެކިއުޓަރ ޖެނެރަލް އޮފީހަށް ވަނީ ފޮނުވާފައެވެ. އެޗްއާރްސީއެމުން ވަނީ މިކަން ޕީއެސްއެމް ނިއުސްއަށް ކަށަވަރުކޮށްދީފައެވެ. ނަމަވެސް މިކަމުގެ އެއްވެސް ތަފްސީލެއް އެއިދާރާއިން ހާމަކޮށްފައެއް ނުވެއެވެ.

މިމައްސަލަ ތަހުޤީޤުކުރަން ފެށުމާއި ގުޅިގެން އެޗްއާރްސީއެމްއިން އޭރު ނެރުނު ބަޔާނުގައި، ކޮމިޝަނުން ބަލާ ކަންކަމުގެ ތެރޭގައި ފުލުހުންގެ ބެލުމުގެ ދަށަށް ގެނައުމަށް ބާރުގެ ބޭނުންކޮށްފައިވާ ގޮތާއި ފުލުހުންގެ ބެލުމުގެ ދަށަށް ގެނައުމުގައި އޭނާއަށް ލިބުނު އަނިޔާތަކަށް ފަރުވާދޭން ފުލުހުން ޢަމަލުކުރިގޮތުގެ އިތުރުން، އޭގެ ފަހުން އޭނާއަށް ސިއްޚީ ފަރުވާ ފޯރުކޮށްދިނުމުގައި ޢަމަލުކޮށްފައިވާ ގޮތް ބަލާނެކަމަށް އެޗްއާރުސީއެމްއިން އޭރު ވިދާޅުވިއެވެ.

މީގެ އިތުރުން ފުލުހުންގެ ބެލުމުގެ ދަށުގައި އަޠުހަރު ހުއްޓައި ސެޕްޓެމްބަރު 1 ގައި ދިމާވި ހާދިސާ ހިނގި ވަގުތުން ފެށިގެން އެކަން އެ ކޮމިޝަނުގެ ސަމާލުކަމަށް ފުލުހުން ގެނެސްފައިވާ ކަމަށް އެޗްއާރްސީއެމުން އޭރު ވަނީ ހާމަކޮށްފައެވެ. އެއާއެކު އެ ކޮމިޝަނުގެ ރެޕިޑް ރެސްޕޮންސް ޓީމުން ކަމާއި ގުޅުންހުރި މައުލޫމާތުތައް އެއްކޮށް، ޖަލުގައި ހިނގި ކަންކަންވެސް ބަލަމުންދާ ކަމަށް ވިދާޅުވިއެވެ.

އަޠުހަރުގެ މަރުގެ މައްސަލާގައި ފުލުހުން އެއްބާރުލުން ދޭނެ ކަމަށް ވިދާޅުވެފައިވާއިރު، އޭނާ މަރުވި ސަބަބު ދެނަގަތުމަށް ޕޯސްޓްމޯޓަމްވެސް ވަނީ ހަދާފައެވެ.