ޤައުމީ އެއަރލައިން، މޯލްޑިވިއަންއަށް ކުރިއެރުން ނުލިބި އޮތީ ކުރިން ގެންގުޅުނު ސިޔާސަތުތަކުގެ ސަބަބުންކަމަށާއި، ނަމަވެސް މި ސަރުކާރުން އެކަން ބަދަލުކޮށް، ޤައުމީ އެއަރލައިނަށް ބޮޑެތި ކުރިއެރުންތަކެއް ގެނެސްދެއްވާނެކަމަށް ދަތުރުފަތުރާއި މަދަނީ އުދުހުންތަކާބެހޭ ވަޒީރު މުހައްމަދު އަމީން ވިދާޅުވެއްޖެއެވެ.
ޤައުމީ އެއަރލައިނަށް ފުރަތަމަ ފަހަރަށް ގެނައި ވައިޑް ބޮޑީ މަތިންދާބޯޓު އިފްތިތާޙުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ވަޒީރު މުހައްމަދު އަމީން ވަނީ މީގެކުރިން މޯލްޑިވިއަންގެ މާޒީއަށާއި، ސަރުކާރުން އެ ކުންފުންޏާމެދު ގެންގުޅުއްވާ ތަސައްވުރަށް އަލިއަޅުއްވާލައްވާފައެވެ.
ދަތުރުފަތުރާއި މަދަނީ އުދުހުންތަކާބެހޭ ވަޒީރު މުހައްމަދު އަމީން ވިދާޅުވީ ރާއްޖެއަކީ ގިނަ އަދަދެއްގެ ފަތުރުވެރިން ޒިޔާރަތްކުރާ ޤައުމަކަށްވުމުން ދުރު މަންޒިލްތަކަށް ޤައުމީ އެއަރލައިން މެދުވެރިކޮށް ދަތުރުތައް ކުރެވިދާނެ ކަަމަށެވެ. ނަމަވެސް، މިހާތަނަށް އައިރުވެސް ދުރު ރާސްތާތަކަށް ދަތުރުތައް ފެށިފައިނުވަނީ މީގެ ކުރީ ސަރުކާރުތަކުން ގެންގުޅުނު ސިޔާސަތުތަކުގެ ސަބަބުންކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ 2018 ވަނަ އަހަރު ޕީޕީއެމްގެ ސަރުކާރު ނިމުނުއިރު އައިލެންޑް އޭވިއޭޝަނަކީ ފައިދާވާ، ހިންގުން ހަރުދަނާ ކުންފުންޏެއް ކަމަށެވެ. ނަމަވެސް ނިމިދިޔަ އެމްޑީޕީގެ ސަރުކާރުގައި ގެންގުޅުނު ސިޔާސަތުތަކުގެ ޤައުމީ އެއަރލައިނަށް ބޮޑެތި ގެއްލުންތަކެއް ލިބިފައިވާކަން ވަޒީރު ފާހަގަކުރެއްވިއެވެ.
"ސީ ޕްލޭންގެ ގިނަ ކޮންޓްރެކްޓްތަކެއް އޮތީ ހުއްޓިފައި. ކުންފުނީގައި އޮތް އެންމެ ރަނގަޅު އެއަރބަސް 2022 ވަނަ އަހަރު ގެނައި ބޯޓު އޮތީ ދޫކޮށްލާފައި. ބޭނުންކުރަމުންދިޔަ ޑޭޝް 1 މަރުކޭޝްގެ ބޯޓުތަކުގެ ތެރެއިން ސްޕެއަރ ނަގަމުން ގޮސް، 4 ބޯތު އޮތީ ބޭނުންނުކުރެވޭ ހާލަތުގައި. މިލިޔަނުން ދޫކޮށްފައިހުރި ދަރަނިތައް ހޯދޭތޯ އަޅުގަނޑުމެން ބަލަމުންމިދަނީ. ރަނގަޅަށް ނުބެލެހެއްޓުމުގެ ނަތީޖާއަކީ އެތައް ބޮޑު ދަރަންޏަކުން ދެރުން" ވަޒީރު ވިދާޅުވިއެވެ.
ވަޒީރު ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމާއި ހަވާލުވެވަޑައިގަތުމަށްފަހު ޤައުމީ އެއަރލައިން ތަރައްޤީކޮށް، ކުރިއެރުވުމަށް ގިނަ މަސައްކަތްތަކެއް ފައްޓަވާފައިވާކަމަށެވެ. އެގޮތުން ކުންފުނީގެ ދަރަނިތައް ޚަލާސްކޮށް، ފައިދާވާ ކުންފުންޏަކަށް އައިލެންޑް އޭވިއޭޝަން ހައްދަވާނޭކަމަށް ވަޒީރު ވިދާޅުވިއެވެ.
"ކުންފުނި ހިންގުމުގެ ނިޒާމަށް ގެނެވޭ ބަދަލުތަކާއެކު ކުންފުނި ރިކަވަރކުރެވޭނެ. ކޮންމެ ފްލީޓަކަށްވެސް އިތުރު ބޯޓެއް ހޯދުމަކީ އަމާޒެއް. އެއަރލައިނަކީ ރިސްކު ބޮޑު ޚަރަދު ބޮޑު އޮޕަރޭޝަނެއް. އެއަރލައިންގެ ސަބަބުން ޤައުމަށް ލިބޭނެ އިކޮނޮމިކް ކޮންޓްރިބިޔުޝަން" ވަޒީރު ވިދާޅުވިއެވެ.
ވަޒީރު ވިދާޅުވީ ޤައުމީ ވައިޑް ބޮޑީ އެއަރކްރާފްޓެއް ގެނެސް، އެއަރލައިނުން ދުރު މަންޒިލްތަކަށް ދަތުރުތައް ފެށުމަކީ ރައީސްގެ ވަޢުދެއްގެ އިތުރުން ދާއިރާގައި ހިމެނޭ އެތައް ބައެއްްގެ އުންމީދެއްކަމަށެވެ. އަދި މޯލްޑިވިއަނަށް އިތުރުކުރެވިގެންދާ ވައިޑް ބޮޑީ އެއަރކްރާފްޓާއެކު ފަތުރުވެރިންގެ އަންނަ އަދަދު އިތުރުވެ، ސީޕްލޭން އޮޕަރޭޝަންތަކާއި އެތެރޭގެ އުދުހުންތައްވެސް އިތުރުވެ، އިޤްތިޞާދީގޮތުން ފައިދާތަކެއް ލިބިގެންދާނެކަން ވަޒީރު ފާހަގަކުރެއްވިއެވެ.
ޤައުމީ އެއަރލައިން މޯލްޑިވިއަން ހިންގާ އައިލެންޑް އޭވިއޭޝަން ކުންފުނި ޤާއިމްކުރެވިގެންދިޔައީ 2000 ވަނަ އަހަރުއެވެ. އަލަށް ގެނެވުނު ވައިޑް ބޮޑީ އެއަރކްރާފްޓާއެކު އެ އެއަރލައިންގައި މިހާރު 25 މަތިންދާބޯޓު އޮންނާނެއެވެ. ޤައުމީ އެއަރލައިންގައި ވައިޑް-ބޮޑީ ނުހިމަނައި 24 މަތިންދާބޯޓު އައިލެންޑް އޭވިއޭޝަންގެ ފްލީޓުގައި އޮވެއެވެ.