އެކްސިޑެންޓު ހިނގީ ޓެކްސީ ޑްރައިވަރަށް ސިއްޙީ ކުއްލި ހާލަތެއް ދިމާވެގެން: އެމްއޭސީއެލް
-
މިއެކްސިޑެންޓުގައި 2 މީހަކަށް އަނިޔާވި
-
ޓެކްސީ ދުއްވަން އިން މީހާއަށް ހޮސްޕިޓަލުގައި ދަނީ ފަރުވާދެމުން
ވެލާނާ އިންޓަރނޭޝަނަލް އެއަރޕޯޓުގައި ޓެކްސީއަކާއި ޕިކަޕެއް ޖެހި އެކްސިޑެންޓް ހިނގަން މެދުވެރިވީ، ޓެކްސީ ދުއްވަން އިން މީހާއަށް ދިމާވީ ސިއްޙީ ކުއްލި ހާލަތެއްގެ ސަބަބުން ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން ވިދާޅުވެއްޖެއެވެ.
މިއަދު ހެނދުނު 9:40 އެހާކަށްހާއިރު، ހިނގި މިއެކްސިޑެންޓާ ގުޅޭގޮތުން ވެލާނާ އިންޓަނޭޝަނަލް އެއަރޕޯޓު ހިންގާ، އެމްއޭސީއެލްއިން ވިދާޅުވީ މިއެކްސިޑެންޓް ހިނގީ ދުއްވާފައިދިޔަ ޓެކްސީއެއް ކޮންޓްރޯލް ނުވެ ގޮސް ކުރިމަތިން ދުއްވާފައި ދިޔަ ޕިކަޕެއްގައި ޖެހިގެންނެވެ.
އެމްއޭސީއެލްއިން ވިދާޅުވީ މި އެކްސިޑެންޓް ހިނގަން މެދުވެރިވީ ޓެކްސީ ދުއްވަން އިން ޑްރައިވަރަށް ދިމާވި ސިއްޙީ ކުއްލި ހާލަތެއްގެ ސަބަބުންކަމަށް މިހާތަނަށް ބެލިބެލުމުން ލަފާކުރެވޭ ކަމަށެވެ. މިޙާދިސާ ހިނގިގޮތް އިތުރަށް ބަލަމުންދާކަމަށްވެސް އެމްއޭސީއެލްއިން ވިދާޅުވެއެވެ.
މިއެކްސިޑެންޓާ ގުޅިގެން ދިވެހި ފުލުހުންގެ ޚިދުމަތުން ވިދާޅުވީ، އެއަރޕޯޓުގައި ކާރަކާއި ޕިކަޕެއް ޖެހި އެކްސިޑެންޓެއް ހިނގާފައިވާ ކަމަށެވެ. އަދި މިއެކްސިޑެންޓުގައި ކާރު ޑްރައިވަރަށް އަނިޔާވެގެން ހުޅުމާލެ ހޮސްޕިޓަލަށް ގެންގޮސް ފަރުވާދެމުން އަންނަކަމަށް ފުލުހުން ވިދާޅުވިއެވެ.
މީގެ އިތުރުން އެކްސިޑެންޓް ހިނގި ވަގުތު ކާރުގެ ފަހަތުގައި އިން މީހަކަށްވެސް އަނިޔާވެގެން އެއަރޕޯޓް ކްލިނިކްގައި ފަރުވާ ދީފައިވާ ކަމަށް، ފުލުހުން ވިދާޅުވިއެވެ. އެމީހާއަށް އެހާ ބޮޑު އަނިޔާއެއް ވެފައި ނުވެއެވެ.
ފުލުހުން ވިދާޅުވީ މި އެކްސިޑެންޓުވި ދެ އުޅަނދަށްވެސް ބޮޑެތި ގެއްލުންތަކެއް ލިބިފައިވާ ކަމަށެވެ. އަދި މިމައްސަލަ ފުލުހުން ތަހުޤީޤު ކުރަމުންދާ ކަމަށްވެސް ވިދާޅުވިއެވެ.