އިންޑޮނީޝިޔާގެ ރައީސް ޕްރަބޮވޯ ސުބިއަންތޯގެ ރިޔާސީ ވަޢުދާ އެއްގޮތަށް، އެ ޤައުމުގެ ދިރިއުޅޭ އާބަދީގެ ހަތަރު ބައި ކުޅަ އެއްބައި މީހުންނަށް ހިލޭ ކާނާ ދިނުމުގެ ބިޔަ މަޝްރޫޢު ފަށައިފިއެވެ. އިންޑޮނީޝިޔާގެ 20 ސަރަޙައްދެއްގައި އެ މަޝްރޫޢު ފަށާފައި ވަނީ، ސްކޫލް ކުދިންނާއި މާބަނޑު މީހުންނަށް އިސްކަން ދީގެންނެވެ. ކާނާ ތައްޔާރުކުރުމަށް ވިހި ބަދިގެ ޙާއްޞަކޮށް، ފުރަތަމަ ދުވަހު އެކަނިވެސް 570،000 މީހުންނަށް ހިލޭ ކާންދިނުމަށް ވަނީ ރާވައިފައެވެ.
ރައީސް ޕްރަބޯވޯގެ ރިޔާސީ ވަޢުދުގެ ދަށުން، ކުރިއަށް އޮތް ފަސް އަހަރުގެ ތެރޭގައި ޖުމްލަ 280 މިލިޔަން މީހުންގެ އާބާދީއެއް އޮންނަ އިންޑޮނީޝިޔާގެ 82.9 މިލިޔަން މީހުންނަށް ހިލޭ ކާނާ ދިނުމަށް ވަނީ ރާވައިފައެވެ. މި މަޝްރޫޢުއަށް ފަސް އަހަރުގެ ތެރޭގައި 28 ބިލިޔަން އެމެރިކާ ޑޮލަރު ހޭދަވާނެ ކަމަށް ވަނީ ލަފާކޮށްފައެވެ. ދައުލަތުގެ މާލިއްޔަތުން އެފަދަ ބޮޑު ހޭދައަށް ކުރާތީ، އިޤްތިޞާދީ މާހިރުން ވަނީ ކަންބޮޑުވުންފާޅު ކޮށްފައެވެ. އިންޑޮނީޝިޔާގެ ސަރުކާރުން ރާވާފައިވަނީ އަންނަ މާޗް މަހާ ހަމައަށް، ހިލޭ ކާނާ ދިނުމުގެ މަޝްރޫޢު ތިން މިލިޔަން މީހުންނާ ހަމައަށް އިތުރުކުރުމެވެ.
ކާނާ ތައްޔާރުކުރުމާއި، ބެހުމުގައި ސަރުކާރުގެ މުވައްޒަފުންގެ އިތުރުން އެ ޤައުމުގެ ސިފައިން ވެސް ޙަރަކާތްތެރިވާ ގޮތަށް ވަނީ ރާވައިފައެވެ. ހުޅަނގުގެ ބައެއް ޕްރައިމަރީ ސްކޫލްތަކުގައި ބެހި ކާނާގެ ޓްރޭތަކުގައި، ބަތާއި ތެލުލި ކުކުޅާއި ޓޯފޫ އަދި ބީންސް ވަނީ ހިމަނައިފައެވެ. މި ނާސްތާ ޕްރޮގްރާމުގައި ކިރު ވެސް ހިމަނަން ރޭވި ނަމަވެސް، ކާނާ ޓްރޭގައި ކޮންމެ ދުވަހަކު ކިރު ނުހިމެނޭނެ ކަމަށް ސަރުކާރުން ވަނީ ބުނެފައެވެ. މި މަޝްރޫޢުގެ ދަށުން ކިރު ފޯރުކޮށްދިނުމަށް ކިރު އުފެއްދުމުގެ ޤާބިލުކަން އިތުރުކުރަން އިންޑޮނީޝިޔާއިން ވަނީ އޮސްޓްރޭލިޔާއިން ގެރި ވެސް އެތެރެކޮށްފައެވެ.