ރައްޔިތުންނަށް ދަތިކުރަން އެއްވެސް ކަމެއް ނުކުރާނަން، ކޮންމެ ކަމެއްވެސް ކުރާނީ ރައްޔިތުންގެ ހައްޤުގައި: ރައީސުލްޖުމްހޫރިއްޔާ

ރައްޔިތުންނަށް ދަތިކުރަން އެއްވެސް ނިންމުމެއް ނިންމަވާފައިވާ ނުވާނޭކަމަށާއި، ކޮންމެ ނިންމެވުމެއްވެސް ނިންމަވާފައިވާނީ ރައްޔިތުންނާއި ޤައުމުގެ މުސްތަޤްބަލަށްޓަކައިކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ ހުވަދު އަތޮޅުގެ ބައެއް ރަށްރަށަށް ކުރައްވަމުން ގެންދަވާ ދަތުރުފުޅުގެ ތެރެއިން ގދ.ވާދޫއަށް ވަޑައިގެން އެ ރަށު ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.

ރައްޔިތުންނަށް ދަތިކުރުމަށް ސަރުކާރުން އެއްވެސް ނިންމުމެއް ނިންމަވާފައި ނުވާނޭކަމަށާއި، ސަރުކާރުގެ ކޮންމެ ނިންމެވުމަކީވެސް ޤައުމާއި ރައްޔިތުންގެ ހައްްޤުގައި ނިންމަވާފައިވާ ނިންމެވުންތަކެއްކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ވާދޫ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވީ ތަރައްޤީއަކީ މައުނަވީ އަދި ރައްޔިތުންނަށް އޭގެ އިހުސާސް ކުރެވޭ އެއްޗަކަށް ހެއްދެވުމަށް ސަރުކާރުން މަސައްކަތް ކުރަމުންގެންދަވާނެކަމަށެވެ. އޭގެތެރެއިން އެއް މަސައްކަތަކީ ރާއްޖޭގައި ޒަމާނުއްސުރެ ހަރުލާފައިވާ ރައްޔިތުންގެ ދުޅަހެޔޮކަމަށް ނުރައްކާ އޮތް ވަބާތަކާއި އާދަތަކުން ޤައުމު ސަލާމަތްކުރުންކަމަށެވެ. އަދި އެކަންކަމުން ޤައުމު ސަލާމަތްކުރުމަށް ސަރުކާރުން އުނދަގޫ ނިންމެވުންތަކެއް ނިންމަވަމުންދާކަން ރައީސުލްޖުމްހޫރިއްޔާ ފާހަގަކުރެއްވިއެވެ.

ރައީސުލްޖުމްހޫރިއްޔާ ވިދާޅުވީ އެ ނިންމެވުންތަކަކީ ރައްޔިތުންނަށް ދަތިކުރުމަށް ނިންމަވާ ނިންމެވުންތަކެއް ނޫންކަމަށާއި އެއީ ޤައުމުގެ އުޖާލާ މުސްތަޤުބަލަށްޓަކައި ނިންމަވާ ނިންމެވުންތަކެއްކަމަށެވެ. އަދި އެފަދަ ހުރިހާ ނިންމެވުމެއްގައި ހުރިހާ ރައްޔިތުންގެ އެއްބާރުލެއްވުން ބޭނުންވާކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

"އަޅުގަނޑުމެންނަކީ އަޅުގަނޑުމެންގެ މުޖުތަމަޢުން ގޯސްކަމެއް ފެނުމުން އެކަމަކަށް ނޫނެކޭ ބުނަންކެރޭ ބަޔަކަށް ވާންވީ. ޒަމާންތަކެއް ވަންދެން ވަކިކަމެއް ގޯސްކޮށް ހިނގުމަކީ ދެންހަމަ އެގޮތަށް ދޫކޮށްލައިގެން ތިބެންޖެހޭނެކަމެއް ނޫންކަން އެބަޖެހޭ އަޅުގަނޑުމެންގެ ހިތުގައި ކަނޑައަޅާ ޢަމަލުން ދައްކަން. ސަރުކާރު މިއޮތީ އެގޮތުގައި، އެހެންވީމަ ވަރަށް އުނދަގޫ ބައެއް ނިންމުންތައް މިވިސްނުމުގައި ކުރިއަށް އޮތް މުސްތަޤުބަލަށްޓަކައި އަޅުގަނޑުމެންގެ ޖީލުތައް ސަލާމަތްކޮށްދީ ވަށާޖެހޭ ތަރައްޤީ، ޙަގީގީ މާނައިގައި ތަރައްޤީ ވެފައިވާ ދިވެހިރާއްޖެއަކަށް ހަދައިދިނުމަށް ނިންމުންތަކެއް ނިންމަމުން މިދަނީ" ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ދިވެހީންނަކީ މުޖުތަމަޢުގައި ހުރި ނޭދެވޭ ކަންކަމާއި ދެކޮޅަށް ވާހަކަދައްކަން ކެރޭ ބަޔަކަށް ވާންޖެހޭނެކަމަށެވެ. އަދި ގޯސްކަންކަމަކީ ގޯހެއްކަމުގައި ޤަބޫލުކޮށް ރަނގަޅުމަގު އިޚްތިޔާރުކުރާ ބަޔަކަށްވުމަށް ރައީސުލްޖުމްހޫރިއްޔާ އެދިވަޑައިގެންނެވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި ޤައުމުގެ ތަރައްޤީގައި ފިރިހެނުންނެކޭ އެއްގޮތަށް އަންހެނުންގެ ބައިވެރިވުން މުހިއްމުކަންވެސް ފާހަގަކުރެއްވިއެވެ. އެގޮތުން މީގެކުރިން އަންހެނުން އައްޔަންކޮށްފައި ނުވާ ދައުލަތުގެ ބައެއް އިސް މަޤާމުތަކަށް އެމަނިކުފާނުގެ ސަރުކާރުން އަންހެނުން އައްޔަންކޮށްފައިވާކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި ޤައުމުގެ ތަރައްޤީގައި އަންހެނުންނަށާއި ފިރިހެނުންނަށްވެސް ހަމަހަމަ ފުރުސަތު ލިބޭކަން ކަށަވަރުކުރައްވާނެކަމަށް އެމަނިކުފާނު ވިދާޅުވިއެވެ.