މަސްތުވާތަކެތީގެ ވަބާގައި ޖެހިފައި ތިބޭ މީހުންނަށް ފަރުވާދޭ ކައުންސިލަރުން ތަމްރީނުކުރަނީ

މަސްތުވާތަކެތީގެ ވަބާގައި ޖެހިފައި ތިބޭ މީހުންނަށް ފަރުވާދޭ ކައުންސިލަރުން ތަމްރީނުކުރުމުގެ މަސައްކަތްތަކާ ގުޅޭގޮތުން ނެޝަނަލް ޑްރަގް އެޖެންސީން މަޝްވަރާކުރައްވައިފިއެވެ.

މި މަޝްވަރާތައް ކުރައްވާފައިވަނީ ނެޝަނަލް ޑްރަގް އެޖެންސީއާއި ސިއްޙަތާ ބެހޭ ވުޒާރާ އާއި އެލައިޑް އިންޝުއަރެންސާ ދެމެދުއެވެ. މަސްތުވާތަކެތީގެ ވަބާގައި ޖެހިފައި ތިބޭ މީހުންނަށް ފަރުވާދޭ ކައުންސިލަރުން ތަމްރީންކުރުމުގެ ބޭނުމަކީ ރާއްޖޭގެ ހުރިހާ ރަށެއްގައިވެސް މަސްތުވާތަކެތީ ވަބާގައި ޖެހިފައި ތިބޭ މީހުންނަށް ފަރުވާދޭ ކައުންސިލަރުން އިތުރުކުރުމެވެ.

މަސްތުވާތަކެތީގެ ވަބާގައި ޖެހިފައި ތިބޭ މީހުންނަށް ފަރުވާދޭ ކައުންސިލަރުން ތަމްރީންކުރުމުގެ މިޕްރޮގްރާމު އޮންލައިންކޮށް ކުރިއަށްގެންދިޔުމަށް ނިންމާފައިވާއިރު ބައެއް ބައިތައް ކްލާސްތަކަށް ހާޒިރުވެގެންވެސް ކުރިއަށްގެންދިޔުމަށް ނިންމާފައިވާ ކަމަށް އެންޑީއޭގެ ޗެއަރޕާސަން ލުބްނާ ޒާހިރު ވިދާޅުވިއެވެ.

ނެޝަނަލް އިންސްޓިޓިއުޓް ފޯރ ރިސާޗް އެންޑް އެޑިކްޝަންސް ސްޓަޑީޒްއިން ވޭތުވެދިޔަ 12ވަރަކަށް އަހަރު ދުވަހުގެ ތެރޭގައި އެއްވެސް މަސައްކަތެއް ހިންގާފައިނުވާކަން ފާހަގަކުރައްވާ ލުބްނާ ވިދާޅުވީ މިއިންސްޓިޓިއުޓްގެ މަސައްކަތްތައް ފުޅާ ކުރުމަށް މަސައްކަތް ފަށްޓަވާފައިވާ ކަމަށެވެ.

ނެޝަނަލް އިންސްޓިޓިއުޓް ފޯރ ރިސާޗް އެންޑް އެޑިކްޝަންސް ސްޓަޑީޒްގެ މަސައްކަތްތަކުގެ ތެރޭގައި މަސްތުވާތަކެތީގެ މައްސަލައިގެ ހާލަތު ދެނެގަތުމަށް ހަދަންޖެހޭ ދިރާސާގެ މަސައްކަތް ހިމެނޭ ކަމަށާއި މިދިރާސާގައި އެންޑީއޭގައި ހުރި ޑާޓާގެ ބޭނުން މިއަހަރުގެ ތެރޭގައި ހިފާނެ ކަމަށް ލުބްނާ ވިދާޅުވިއެވެ.

"އިރާދަކުރެއްވިއްޔާ މި މަސައްކަތުގެ ދަށުން ރާއްޖޭގެ ހުރިހާ ރަށެއްގައިވެސް އެޑިކްޝަން ކައުންސިލަރުން ބިނާކުރާނަން." އެންޑީއޭގެ ޗެއަރޕާސަން ލުބްނާ ޒާހިރު ވިދާޅުވިއެވެ.

މަސްތުވާތަކެތީގެ ވަބާގައި ޖެހިފައި ތިބޭ މީހުންނަށް ފަރުވާދޭ ކައުންސިލަރުން ތަމްރީކުރުމުގެ މަސައްކަތް ފަށަން ތައްޔާރުވަމުން އަންނައިރު ފަރުވާއަށް އެއްބާރުލުން ނުދޭ މީހުންނާ މެދު ޤާނޫނީ ފިޔަވަޅު އެޅުމުގެ މަސައްކަތްވެސް އެންޑީއޭއިން ވަނީ ފަށްޓަވާފައެވެ.

ޑްރަގް ފަރުވާއަށް އެއްބާރުލުން ނުދޭ މީހުންނާ މެދު ޤާނޫނީ ފިޔަވަޅު އެޅުމާއި، ފަރުވާގެ ނިޒާމު ހަރުދަނާ ކުރުމަށް އެންޑީއޭގެ ބޯޑާއި ޑްރަގް ކޯޓާ ދެމެދު މަޝްވަރާކުރެއްވީ އޮކްޓޯބަރ މަހުގެ 17ވަނަ ދުވަހުއެވެ. މި މަޝްވަރާގައި ވަނީ ޑްރަގް ކޯޓުގެ ދަށުން ފަރުވާއަށް ޙުކުމް ކުރެވި ފަރުވާ ތަންފީޛު ކުރަން ފެށުމަށްފަހު އެއްބާރުލުން ނުދޭ ފަރާތްތަކަށް ޤާނޫނީ ފިޔަވަޅު އެޅުމާއި، ފަރުވާގެ ނިޒާމު އިތުރަށް ހަރުދަނާކުރުމަށް ނިންމާފައެވެ.

ދިވެހިރާއްޖޭގައި މަސްތުވާތަކެތި ބޭނުންކުރާ 7500 ވަރަކަށް މީހުން އުޅޭ ކަމަށް ދިރާސާތަކުން ދައްކައެވެ.