އީއައިއޭ ނުހަދައި މެޝިނަރީ ބޭނުންކޮށްގެން ވެލި ނަގާނަމަ ފިޔަވަޅު އަޅާނަން: އީޕީއޭ

އާންމު ރައްޔިތުންގެ ޒަރޫރީ ބޭނުންތަކަަށް ވެލި ނަގަން ކަނަޑައަޅާފައިވާ ސަރަހައްދުތަކުން މެޝިނަރީ ބޭނުންކޮށްގެން ވެލިނަގާނަމަ ފިޔަވަޅު އަޅާނެކަމަށް އެންވަޔަރަންމަންޓަލް ޕްރޮޓެކްޝަން އެޖެންސީ، އީޕީއޭއިން ވިދާޅުވެއްޖެވެ.

އީޕީއޭއިން މިހެން ވިދާޅުވީ ވެލިނެގުމަށް ކަނޑައަޅާފައިވާ ސަރަޙައްދުތަކުން އުސުލޫތަކާއި ޚިލާފަށް ގިނަ އަދަދަކަށް ވެލި ނަގާ ކަމުގެ ޝަކުވާ އެއެޖެންސީއަށް ލިބުމާގައި ގުޅިގެންނެވެ.

އީޕީއޭއިން ވިދާޅުވީ އާންމު ރައްޔިތުންގެ ޒަރޫރީ ބޭނުންތަކަަށް ވެލި ނެގުމަށް ކަނަޑައަޅާފައިވާ ސަރަހައްދުތަކަކީ މެޝިނަރީ ބޭނުން ނުކޮށް ހަމައެކަނީ ޒަރޫރީ ބޭނުމަށް ވެލިނެގުމަށް ކަނޑައަޅާފައިވާ ސަހަރައްދުތަކެއްކަމަށެވެ.

އެހެންނަމަވެސް އުސުލޫތަކާއި ޚިލާފަށް އެފަދަ ސަރަހައްދުތަކުން ގިނަ އަދަދަކަށް ވެލި ނަގާ ކަމުގެ ޝަކުވާ އެ އެޖެންސީއަށް ލިބެމުންދާކަމަށާއި، މެޝިނަރީ ބޭނުންކޮށްގެންނާއި ފިޔަފާރި އުސޫލުން އެކި އެކި ބޭނުމަށް ވެލި ނަގަމުންދާކަން ވެސް އެ އެޖެންސީއަށް ފާހަގަވެފައިވާކަމަށެވެ.

ކޮންމެ އަތޮޅެއްގައިވެސް މެޝިނަރީ ބޭނުންނުކޮށް ރައްޔިތުންގެ ޒަރޫރީ ބޭނުމަށް ވެލި ނެގުމަށް ވަކި ޚާއްސަ ސަރަހައްދުތަކެއް ކަނޑައަޅާފައިވާއިރު، މެޝިނަރީ ބޭނުންކޮށްގެން ފަޅުފުންކުރުމާއި ވެލިނެގުމުގެ މަސައްކަތަކީ ތިމާވެއްޓަށް އަސަރުފޯރާނެ މިންވަރު ބަޔާންކުރާ ރިޕޯޓް ހެދުމާއި ބެހޭ ގަވާއިދުގެ ދަށުން އީ.އައި.އޭ މަރުހަލާ ފުރިހަމަކޮށްގެން ކުރިއަތް ގެންދެވޭ މަސައްކަތެއްކަމަށެވެ.

އެގޮތުން މެޝިނަރީ ބޭނުންކޮށްގެން ވެލި ނަގަން ޖެހިއްޖެ ހިންދެއްގައި އަތޮޅު ކައުންސިލާއި، ކަމާއި ގުޅޭ އެހެން ސަރުކާރުގެ އިދާރަތަކާއިއެކު މަޝްވަރާކޮށް އެކަމަށް ޚާއްސަ ފަޅެއް ކަނޑައަޅައި ތިމާވެއްޓަށް އަސަރުފޯރާނެ މިންވަރު ބަޔާންކުރާ ރިޕޯޓް ހެދުމާއި ބެހޭ ޤަވައިދާ އެއްގޮތައް އީއައިއޭ މަރުހަލާ ފުރިހަމަ ކުރެއްވުމަށް އީޕީއޭއިން ވަނީ އެދިފައެވެ.

އީޕީއޭއިން ވަނީ އެ އެޖެންސީއިން ތަންފީޒުކުރަމުންދާ ޤަވައިދުތަކާއި އުސޫލުތަކާއި އެއްގޮތައް މަސައްކަތްތައް ކުރިއަތްގެންދިޔުމަށް އިލްތިމާސްކުރައްވައި ޤަވައިދުތަކާއި އުސޫލުތަކާއި ޚިލާފަށް އަމަލުކުރާ ފަރާއްތަކާއި މެދު އެ އެޖެންސީއިން ފިޔަވަޅު އަޅަމުންގެންދާނެކަން ހާމަކުރައްވާފައެވެ.

ރާއްޖޭގެ ރަށްތަކުން އާންމުން ވެލި ނެގުން ހުއްޓާލައި މިހާރު އެކަންކަން ބެލެހެއްޓުމުގެ ޒިންމާ މަތިކޮށްފައިވަނީ ލާމަރުކަޒީ ޤާނޫނުގެ ދަށުން ކައުންސިލްތަކާއެވެ. ކައުންސިލްތަކުން އެކަންކަން ބެލެހެއްޓުމުގައި އީޕީއޭގެ ހުއްދަ ލިބި ކަނޑައެޅިފައިވާ ސަރަހައްދުތަކުން އާންމުންނަށް ޒަރޫރީ ބޭނުންތަކަށް ވެލި ލިބޭނެ އިންތިޒާމު ހަމަޖައްސައިދެއެވެ.