މިރިހި އައިލެންޑް ރިސޯޓު ކައިރީ އޮތް ސަފާރީއަކުން ކަނޑަށް ވެއްޓުނު މީހަކު ހޯދަން ފަށައިފި

އދ. މިރިހި އައިލެންޑް ރިސޯޓު ކައިރީ އޮތް ސަފާރީއަކުން ވެއްޓުނު މީހަކު ގެއްލިގެން ހޯދަން ފަށައިފިއެވެ.

ޤައުމީ ދިފާޢީ ބާރުން ވިދާޅުވީ މިރިހި އައިލެންޑް ރިސޯޓް ކައިރީގައި އޮތް "ނޯތު 07" ސަފާރީއިން ދިވެއްސަކު ކަނޑަށް ވެއްޓި ގެއްލިގެން އުޅޭކަމުގެ މަޢުލޫމާތު ލިބިފައިވާ ކަމަށެވެ. އެހެންކަމުން ކޯސްޓް ގާޑްގެ ޑައިވަރުންގެ ޓީމަކާއެކު މާލޭ އޭރިއާ ކޯސްޓްގާޑް ސެކަންޑް ސްކޮޑްރަންއިން މިހާރު ސަފާރީ އޮތް ސަރަހައްދަށް ގޮސް ހަރަކާތްތެރިވަމުންދާކަމަށް ޤައުމީ ދިފާއީ ބާރުން ވިދާޅުވިއެވެ.

މިރިހި އައިލެންޑް ރިސޯޓް ކައިރީގައި އޮތް "ނޯތު 07" ސަފާރީއިން ދިވެއްސަކު ކަނޑަށް ވެއްޓި ގެއްލިގެން އުޅޭކަމުގެ މަޢުލޫމާތު އެމްއާރުސީސީއަށް ލިބުމާ ގުޅިގެން، ޑައިވަރުންގެ ޓީމަކާއެކު ސަފާރީ އޮތް ސަރަހައްދަށް ދިއުމަށް މާލޭ އޭރިއާ ކޯސްޓްގާޑް ސެކަންޑް ސްކޮޑްރަންއިން ދަނީ ދަރުރުކުރަމުން. pic.twitter.com/aVy7ItzbIM

— Maldives National Defence Force (@MNDF_Official) January 10, 2025

މިކަމާ ގުޅިގެން ދިވެހި ފުލުހުންގެ ޚިދުމަތުން ވިދާޅުވީ ގެއްލިގެން ހޯދަމުންދަނީ ނ. ހޮޅުދޫ، ސީ ވިޑް، އުމުރުން 35 އަހަރުގެ އަލީ އަރުޝާދު ކަމަށެވެ.

ފުލުހުން ވިދާޅުވީ ރޭގެ ވަގުތެއްގައި ސަފާރީގެ ޑެކް މަތީ ހުއްޓާ އަލީ އަރުޝާދު ކަނޑަށް ވެއްޓުނުތަން ތަން ސަފަރީގެ ސީސީޓީވީ ފުޓޭޖްއިން ފެނިފައިވާ ކަމަށެވެ. އަދި އޭނާ ހޯދުމަށް ސިފައިންނާއި ފުލުހުން ހަރަކާތްތެރިވަމުންދާކަމަށްވެސް ވިދާޅުވިއެވެ.

މިދިޔަ މަހުގެ ތެރޭގައިވެސް އައްޑޫން މާލެއަށް ދަތުރުކުރަމުންދިޔަ ބޯޓަކުން ބިދޭސީއަކު ގެއްލިގެން ހޯދަމުގެ މަސައްކަތް އެމްއެންޑީއެފުން ފެށިއެވެ. ނަމަވެސް އަދި މިހާތަނަށް އެމީހާ ފެނިފައިނުވެއެވެ.