ގިނަ އަދަދެއްގެ ފަތުރުވެރިންނާއި އެކު ބަހާމާސްގެ ކުރޫޒް ޝިޕެއް ރާއްޖެއަށް

ގިނަ އަދަދެއްގެ ފަތުރުވެރިންނާއެކު ކްރޫޒް ޝިޕެއް މާލެއަށް ބަނދަރުކޮށްފިއެވެ.

މޯލްޑިވްސް އެސޯސިއޭޝަން ފޯ ޔޮޓް އޭޖެންޓްސް، މާޔާއިން ބުނީ މި ކުރޫޒް ޝިޕުން 212 ފަތުރުވެރިން ރާއްޖެއަށް ޒިޔާރަތްކުރި ކަމަށެވެ.

މޯލްޑިވްސް އެސޯސިއޭޝަން ފޯ ޔޮޓް އޭޖެންޓްސް، މާޔާއިން ބުނީ ބުރާސްފަތި ދުވަހު ރާއްޖެ އައިސްފައިވަނީ ބަހާމާސްއިން "ކްރިސްޓަލް ސިމްފޮނީ" ނަމަކަށްކިޔާ ކުރޫޒް ޝިޕެއް ކަމަށެވެ. މި ބޯޓު ރާއްޖެ އައިސްފައިވަނީ ސީޝެލްސްއިންނެވެ. އަދި މިއަދު ސްރީ ލަންކާއަށް ފުރުމަށްވަނީ ހަމަޖެހިފައެވެ.

މާޔާއިން ބުނީ މި ކުރޫޒް ޝިޕަކީ މި ސީޒަންގައި މާލެއަށް ބަނދަރުކުރި 4 ވަނަ ކުރޫޒު ޝިޕް ކަމަށެވެ. މިދިޔަ މަހުގެ 30 ވަނަ ދުވަހުވެސް ސީޝެލްސްއިން ދެ ކްރޫޒު ޝިޕެއް ވަނީ ރާއްޖެ އައިސްފައެވެ. މި ދެ ކުރޫޒު ޝިޕްގައި 3000 އަށްވުރެ ގިނަ ފަތުރުވެރިން ރާއްޖެ އައިސްފައިވެއެވެ.

ރާއްޖޭގެ ފަތުރުވެރިކަމުގެ ސީޒަން ނިމުމުގެ ކުރިން އިތުރު 12 ކްރޫޒް ޝިޕް ރާއްޖެ އައުމަށް ތާވަލުކުރެވިފައިވާކަމަށްވެސް މާޔާއިން ހާމަކުރެއެވެ.

ކުރޫޒު ޝިޕްތަކުގެ މެދުގައި ރާއްޖޭގެ މަޤްބޫލުކަން އިތުރުވަމުންދާއިރު، ރާއްޖެއަށް އަންނަ ފަތުރުވެރިންގެ އަދަދަށްވެސް ބޮޑު ކުރިއެރުމެއް ވަނީ ލިބިފައެވެ. ފަަތުރުވެރިކަމާބެހޭ ވުޒާރާގެ ތަފާސްހިސާބުތައް ދައްކާގޮތުން އަހަރުގެ ފުރަތަމަ 7 ދުވަސްތެރޭ ރާއްޖެއަށް ވަނީ 43،000 އަށްވުރެ ގިނަ ފަތުރުވެރިން ވަނީ އައިސްފައެވެ. މި އަދަދަކީ މިދިޔަ އަހަރުގެ މި މުއްދަތާއި އަޅާ ބަލާއިރު %9.7 އިތުރު އަދަދެކެވެ.