ރަޝިޔާ-ޔޫކްރެއިން ހަނގުރާމައިގައި މިހާތަނަށް މަރުވެފައިވާ ޢާންމުންގެ އަދަދު 12,300އަށްވުރެ މައްޗަށް އުފުލިފައިވާ ކަމުގައި އދން ހާމަކޮށްފިއެވެ. ރަޝިޔާ-ޔޫކްރެއިން ހަނގުރާމަ ފަށާފައި ވަނީ 2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހުއެވެ. އިސްވެ ޔޫކްރެއިނަށް ސިފައިން ފޮނުވައި ހަނގުރާމަ ފަށާފައި ވަނީ ރަޝިޔާއިންނެވެ.
އެ ހަނގުރާމައިގައި މަރުވެފައިވާ ޢާންމުންގެ އަދަދު 12,300އަށްވުރެ މައްޗަށް އުފުލިފައިވާ ކަން ހާމަކުރައްވާފައި ވަނީ އދގެ އިންސާނީ ޙައްޤުތަކާ ބެހޭ އިދާރާގެ ވެރިޔާގެ ނައިބު ނަދާ އަލް-ނާޝިފެވެ. ހަނގުރާމައިގެ ދަށުން ދުރު-ރާސްތާ ހަތިޔާރު ބޭނުން ކޮށްގެން ދެ ޤައުމުން ދެމުންދާ ޙަމަލާ ބަދަލު ކުރުން އިތުރު ކޮށްފައިވާ އޭނާ ފާހަގަ ކުރެއްވިއެވެ. އެ ޙަމަލާތަކުގައި މަރުވަމުންދާ ޢާންމު ރައްޔިތުންގެ އަދަދު އެތަކެއް ގުނައަކަށް އިތުރުވެފައިވާ ކަން ވެސް އޭނާ ފާހަގަ ކުރެއްވިއެވެ.
ޔޫކްރެއިންގެ އިރުމަތީގެ ބިންތަކަށް އަރައިގަނެފައިވާ ރަޝިޔާގެ ސިފައިން ދަނީ ކުރިއެރުންތަކެއް ހޯދަމުންނެވެ. އަދި، އިތުރު ބިންތަކަށް އަތްގަދަ ކުރަމުންނެވެ. ޔޫކްރެއިންގެ އިރުމަތީ ދޮންބާސްގައި އޮތް ލުހާންސްކާއި ދޮންޏެސްކުގެ ބޮޑު ސަރަޙައްދެއް މިހާރު ވެސް އޮތީ ރަޝިޔާގެ އަތްދަށުގައެވެ. އަދި، އެ ސަރަޙައްދުގައި ޔޫކްރެއިންގެ ސިފައިން ހަރަކާތްތެރިވަމުންދާ ހިސާބުތަކާއި، އެހެން ރަށްތަކަށް އަމާޒުކޮށް ދުރު-ރާސްތާ ހަތިޔާރު ބޭނުން ކޮށްގެން ދެމުންދާ ޙަމަލާތައް އިތުރު ކުރަމުންދާ ކަމުގައި މަސްރަޙު ދިރާސާ ކުރާ ފަރާތްތަކުން ހާމަކުރިއެވެ.
ނާޝިފް ވިދާޅުވީ، އެ ޙަމަލާތަކާ އެކު ޢާންމުން މަރުވަމުންދާ ނިސްބަތް %30 އިންސައްތަ އުފުލިފައިވާ ކަމުގައެވެ. މި ގޮތުން، 2024ވަނަ އަހަރުގެ ސެޕްޓެންބަރު މަހާއި ނޮވެންބަރު މަހާ ދެމެދު ރަޝިޔާއިން ދީފައިވާ ޙަމަލާތަކުގައި ޔޫކްރެއިންގެ ޢާންމުންގެ 574 މީހުން މަރުވެފައިވާ ކަން ކަށަވަރު ކުރެވިފައިވާ ކަމުގައި އޭނާ ވިދާޅުވިއެވެ. އެއީ، އޭގެ ކުރީ އަހަރާ އަޅައިބަލާއިރު %30 އިތުރު އަދަދެކެވެ.
މިއާ އެކު، ރަޝިޔާ-ޔޫކްރެއިން ހަނގުރާމަ ފެށި ފަހުން މަރުވެފައިވާ ކަން ކަށަވަރު ކުރެވިފައިވާ ޢާންމުންގެ އަދަދު 12,300އަށް އުފުލިފައިވާ ކަން ހާމަކުރައްވައި ނާޝިފް ވިދާޅުވީ އޭގެ ތެރޭގައި 650އަށްވުރެ ގިނަ ކުޑަކުދިން ހިމެނޭ ކަމުގައެވެ. ނަމަވެސް، ޙަޤީޤަތުގައި ހަނގުރާމައިގައި މަރުުވެފައިވާ ޢާންމުންގެ އަދަދު އެއަށްވުރެ އިތުރުވާނެ ކަމަށް ބެލެވޭ ކަމުގައި އދން އެތަކެއް ފަހަރަކު ބުނެފައިވާ ކަން ފާހަގަ ކޮށްލަން ޖެހެއެވެ.
ޔޫކްރެއިންގެ ދޮންބާސްގެ އިތުރުން އެ ޤައުމުގެ އިރުދެކުނުގައި އޮތް ޒަޕޮރީޜިޔާގެ ބައެއް ސަރަހައްދުތައް ވެސް އޮތީ ރަޝިޔާ ސިފައިންގެ ބާރުގެ ދަށުގައެވެ. އަދި، އެންމެ ދެކުނުން އޮތް ކްރައިމިޔާއަކީ 2014ވަނަ އަހަރު ރަޝިޔާއިން ވެރިވެގަނެފައިވާ ބިމެކެވެ.
ރަޝިޔާއާ ކުރިމަތިލުމުގެ ގޮތުން ޔޫކްރެއިނުން ވެސް ވަނީ ރަޝިޔާއަށް ސިފައިން ފޮނުވާފައެވެ. މި ގޮތުން، ރަޝިޔާގެ ހުޅަނގުގައި އޮތް ކޫރްސްކަށް ޔޫކްރެއިންގެ ބޮޑު ލަޝްކަރެއް ފޮނުވާފައިވާއިރު، އެ ސިފައިން ވަނީ ކޫރްސްކުގެ ބައެއް ރަށްތަކާއި އަވަށްތަކަށް އަތްގަދަ ކޮށްފައެވެ. އެ މީހުން ބަލިކޮށް، ފައްސައިލުމަށް ރަޝިޔާގެ އަސްކަރިއްޔާއިން ދަނީ މަސައްކަތް ކުރަމުންނެވެ. މި ކަމުގައި، އުތުރު ކޮރެޔާގެ ސިފައިން ބައިވެރިވަމުންދާ ކަމުގައި ޔޫކްރެއިނާއި އެމެރިކާގެ އިތުރުން ހުޅަނގުގެ ބާރުތަކުން ތުހުމަތު ކުރެއެވެ.