ޤަވާއިދާއި ޚިލާފަށް އުޅެމުންދިޔަ 5613 އަށްވުރެ ގިނަ ބިދޭސީން މިދިޔަ އަހަރު ޑިޕޯޓްކޮށްލި

ރާއްޖޭގައި ޤަވާއިދާ ޚިލާފަށް މަސައްކަތް ކުރަމުންދާ ބިދޭސީންގެ ތެރެއިން 5600 އަށްވުރެ ގިނަ ބިދޭސީން މިދިޔަ އަހަރު ޑިޕޯޓްކޮށްފައިވާކަމަށް މޯލްޑިވްސް އިމިގްރޭޝަނުން ވިދާޅުވެއްޖެއެވެ.

އިމިގްރޭޝަނުން ވަނީ ޤަވާއިދާއި ޚިލާފަށް އުޅެމުންދާ ބިދޭސީން ހޯދުމަށް މިދިޔަ އަހަރު ގިނަ ރެއިޑް އޮޕަރޭޝަންތަކެއް ކުރިއަށް ގެންގޮސްފައެވެ.

ރާއްޖޭގައި ޤާނޫނާއި ޤަވާއިދާ ޚިލާފަށް މަސައްކަތް ކުރަމުންދާ ބިދޭސީންގެ މައްސަލަ ހައްލުކުރުމަކީ ސަރުކާރުގެ އަމާޒެކެވެ. އެގޮތުން މިމައްސަލަ ހައްލުކުރުމަށް ތަންފީޒީ އިދާރާތައް ގުޅިގެން މިދިޔަ އަހަރު ވަނީ މަސައްކަތް ފަށާފައެވެ.

މިމަސައްކަތުގެ ދަށުން ތަންފީޒީ އިދާރާތަކާއި ސަރުކާރުގެ ވުޒާރާތައް ހިމެނޭހެން ހާއްސަ ޓާސްކްފޯހެއް ވަނީ އެކުލަވާލާފައެވެ. އަދި އިމިގްރޭޝަނަށް ބިދޭސީންގެ މައްސަލަތައް ރިޕޯޓް ކުރުމަށް "އިމިގްރޭޝަން ވޮޗް" ގެ ނަމުގައި ހާއްސަ ޕްލެޓްފޯމެއް ވަނީ ތަޢާރަފްކޮށްފައެވެ. މިއާއެކު ޤަވާއިދާއި ޚިލާފަށް ބިދޭސީން މަސައްކަތް ކުރަމުންދާ ތަންތަން ބަލާ ފާސްކޮށް، އެތަންތަނުގައި މަސައްކަތް ކުރަމުންދާ ބިދޭސީން އިމިގްރޭޝަންގެ ބެލުމުގެ ދަށަށް ގެނައުމުގެ މަސައްކަތް ފެށިއެވެ.

ބިދޭސީން ޑީޕޯޓްކުރުމުގެ މަސައްކަތުގެ ދަށުން ސަރުކާރުން މިދިޔަ އަހަރު ކަނޑައެޅީ ރާއްޖޭގައި ޤަވާއިދާ ޚިލާފަށް އުޅޭ ބިދޭސީންނާއި ޤަވާއިދާއި ޚިލާފަށް ވިޔަފާރިކުރަމުންދާ ބިދޭސީން ހިމެނޭގޮތަށް 5000 ބިދޭސީން އަނބުރާ ފޮނުވާލުމުގެ އަމާޒެކެވެ.

މި އަމާޒު ހާސިލްކޮށްފައިވާއިރު، އިމިގްރޭޝަނުން ހިއްސާކުރި ތަފާސް ހިސާބުތައް ދައްކާގޮތުން މިދިޔަ އަހަރު މުޅި ޖުމްލަ 5613 ބިދޭސީން ވަނީ އަނބުރާ ޤައުމަށް ފޮނުވާލާފައެވެ. މީގެތެރޭގައި ހިމެނެނީ ޤަވާއިދާ ޚިލާފަށް އުޅެމުންދިޔަ ބިދޭސީންނާއި ޤަވާއިދާ ޚިލާފަށް މަސައްކަތް ކުރަމުންދިޔަ ބިދޭސީންނެވެ. އަދި މީގެތެރެއިން ގިނަ މީހުންނަކީ އިމިގްރޭޝަނުން ހިންގި އޮޕަރޭޝަންތަކުގައި އެ އިދާރާގެ ބެލުމުގެ ދަށަށް ގެނައި މީހުންނެވެ.

މިދިޔަ ޖުލައިމަހު އިމިގްރޭޝަނުން ތަޢާރަފްކުރި އިމިގްރޭޝަން ވޮޗްގެ ތަފާސް ހިސާބުތައް ދައްކާގޮތުން މިދިޔަ އަހަރު ޖުމްލަ 1161 ރިޕޯޓް އެ ޕްލެޓްފޯމް މެދުވެރިކޮށް އިމިގްރޭޝަނަށް ހުށަހަޅާފައިވާއިރު، އޭގެ ތެރެއިން 1061 މައްސަލައެއް ބަލާފައިވާކަމަށް އިމިގްރޭޝަނުން ވިދާޅުވިއެވެ.

އިމިގްރޭޝަން ވޮޗަށް އެންމެ ގިނައިން ހުށައަޅާފައިވަނީ ބިދޭސީ މަސައްކަތްތެރިން ޤާނޫނާއި ޤަވާއިދާއި ޚިލާފަށް ވިޔަފާރިކުރާ މައްސަލަތައްކަމަށް އިމިގްރޭޝަނުން ވިދާޅުވިއެވެ. އެގޮތުން އެފަދަ 239 މައްސަލަ ހުށައަޅާފައިވާއިރު ދެން އެންމެ ގިނައިން ހުށަހެޅުނީ ވޯކް ވިސާގެ މައްސަލަތަކެވެ. އެގޮތުން ވޯކް ވިސާގެ 239 މައްސަލައެއް ހުށަހެޅުނުކަމަށް އިމިގްރޭޝަނުން ވިދާޅުވިއެވެ.
މީގެ އިތުރުން ހަށިވިއްކުމުގެ 65 މައްސަލައަކާއި ވަޒީފާއަށް ފިލުމުގެ 41 މައްސަލައަކާއި ޓޫރިސްޓް ވިސާއާ ޚިލާފުވި 14 މައްސަލައަކާއި އެމްޕްލޯޔަ ސްޕޮންސާއާ ޚިލާފުވި 12 މައްސަލައަކާއި ވިސާގެ ބޭނުން ނަހަމަގޮތުގައި ބޭނުންކުރި 12 މައްސަލައަކާއި އެކި ބާވަތުގެ ކުށް ކުރުމުގެ 11 މައްސަލަ އަދި މަސްތުވާތަކެތި ބޭނުންކުރުމާއި ވިޔަފާރި ކުރުމުގެ 10 މައްސަލައެއް ހުށައެޅުނުކަމަށް އިމިގްރޭޝަނުން ވިދާޅުވެއެވެ.

ރާއްޖޭގައި ޤަވާއިދާޢި ޚިލާފަށް އުޅެމުންދާ ބިދޭސީން ފޮނުވާލުމުގެ އިތުރުން، ޤަވާއިދުގެ ތެރެއަށް ވަންނަން ބޭނުންވާ ބިދޭސީންނަށް އެފުރުސަތުވެސް ސަރުކާރުން ދަނީ ފޯރުކޮށްދެމުންނެވެ. އަދި ރާއްޖޭގައި އުޅެމުންދާ ބިދޭސީންގެ ބަޔޯމެޓްރިކް ޑޭޓާ އެއްކޮށް، ނިޒާމީ ގޮތުން މިމައްސަލަ ހައްލުކުރުމަށް ދިމާވެފައި ހުރި ގޮންޖެހުންތައް ހައްލުކުރުމަށް ސަރުކާރުން ދަނީ މަސައްކަތް ކުރަމުންނެވެ.