ސްރީ ލަންކާއާ ދެކޮޅަށް އޮސްޓްރޭލިއާ ކުޅޭ ޓެސްޓް މެޗުތަކުގެ ކެޕްޓަންކަން ސްޓީވް ސްމިތަށް ދީފިއެވެ. މި ގޮތަށް ނިންމީ ޓީމުގެ ކެޕްޓަންކަން ކުރަމުންދާ ތަޖުރިބާކާރު ކުޅުންތެރިޔާ ޕެޓް ކަމިންސްގެ އަންހެނުން ވިހެއުމުން، އޭނާ މި ވަގުތު އާއިލާގެ ގާތުގައި ހުންނަން ބޭނުންކަމަށް ބުނުމުންނެވެ.
އުމުރުން 35 އަހަރުގެ ސްމިތަކީ 2018 ވަނަ އަހަރު ބޯޅައިގެ މިސްރާބު ބަދަލުކުރުމަށް ބޯޅައިގެ ބައްޓަމަށް މަކަރު ހެދުމުގެ ކުށުގައި 2 އަހަރަށް ސަސްޕެންޑްކުރި ކުޅުންތެރިއެކެވެ. ނަމަވެސް އޭނާ އަންނަނީ ފަހުން އެނބުރި އައިސް މޮޅު ކުޅުމެއް ދައްކަމުންނެވެ.
އެންމެ ފަހުގެ ވޯލްޑް ކަޕުގައިވެސް މޮޅު ކުޅުމެއް ދެއްކި ކަމިންސް މި މެޗުތަކުގައި ނުކުޅެން ނިންމީ އޭނާގެ ދެވަނަ ދަރިފުޅާއެކު ހުންނަން ބޭނުންވުމުންނެވެ. އޭނާ ނުކުޅޭއިރު ހެޒްލޭވުޑް ވަނީ ފަޔަށް ލިބިފައިވާ އަނިޔާ ރަނގަޅުނުވާތީވެ މި މެޗުގައި ނުކުޅެން ނިންމާފައެވެ.
އެކަމަކު ސްޕިން ބޯޅަ އުކާ އޯލް-ރައުންޑަރ ކޫޕާ ކޮނޮލީ ވަނީ ފުރަތަމަ ފަހަރަށް ޓެސްޓް މެޗެއް ކުޅެން މި މެޗަށް ނަގާފައެވެ. އުމުރުން 21 އަހަރުގެ ކުޅުންތެރިޔާ މިހާތަނަށް ކުޅުނީ އެއް ދުވަހުގެ ދެ މެޗާއި ޓީ20 ގެ ދެ މެޗެވެ. މިއިން އެއްވެސް ފޯމެޓެއްގައި އޭނާއަށް ވިކެޓެއް ނެގިފައެއް ނުވެއެވެ.
ލަންކާ އާއި އޮސްޓްރޭލިއާގެ ފުރަތަމަ ޓެސްޓް މެޗު އޮންނާނީ މި މަހުގެ 29 ގައި ލަންކާގައެވެ.