ދައުލަތުގެ އިދާރާތަކާއި މުޖުތަމަޢު ގުޅުވައިދިނުމުގައި ޖަމްޢިއްޔާތަކުގެ ދައުރު މުހިންމު: މެޑަމް ސާޖިދާ

ދައުލަތުގެ އިދާރާތަކާއި މުއައްސަސާތަކާ މުޖުތަމަޢު ގުޅުވައިދިނުމުގައި މަދަނީ ޖަމްޢިއްޔާތަކުން މުހިންމު ދައުރެއް އަދާކުރާކަމަށް ރައީސުލްޖުމްހޫރިއްޔާގެ އަނބިކަނބަލުން، ސާޖިދާ މުޙައްމަދު ވިދާޅުވެއްޖެވެ.

މެޑަމް ސާޖިދާ މުޙައްމަދު މިހެން ވިދާޅުވީ މަމްސް އެއިޑްގެ 6 ވަނަ އަހަރީ ގާލާ އެންޑް ފަންޑްރައިސިންގް ޙަފްލާ ޝަރަފުވެރިކޮށްދެއްވާ ދެއްކެވި ވާހަކަފުޅުގައެވެ.

ވިލާ ކޮލެޖްގެ ކިއު އައި ކެމްޕަހުގައި ބޭއްވި މި ރަސްމިއްޔާތުގައި ވާހަކަފުޅުދައްކަވަމުން މެޑަމް ސާޖިދާ ވިދާޅުވީ މުޖްތަމަޢުގައި ވަރަށް މުހިންމު ދައުރެއް އަމިއްލަ ޖަމްޢިއްޔާތަކުން އަދާކުރާ ކަމަށެވެ. މިގޮތުން، ދައުލަތުގެ އިދާރާތަކާއި މުއައްސަސާތަކަށް ވާސިލު ނުވެވި ތިބޭ މީހުންނާ ހަމަޔަށް ވާސިލުކޮށް ދިނުމުގައި އެންމެ ބޮޑު ދައުރެއް އަދާކުރެވޭނީ ޖަމްޢިއްޔާތަކަށްކަން ފާހަގަކުރެއްވިއެވެ.

"އެންޖީއޯތަކަކީ ވަރަށް މުހިންމު ބައެއް. ދައުލަތުގެ މުއައްސަސާތަކުގެ ތެރޭގައި. އަޅުގަނޑުމެން ސަރުކާރުގެ އިތުރުން އެންޖީއޯތަކުން މިކުރެވޭ މަސައްކަތަކީ އަޅުގަނޑުމެންގެ މުޖްތަމަޢުގައި މި ނުދެއްކި ހުރި ވާހަކަތައް ދައްކައި ސަރުކާރުގެ މުއައްސަސާތަކާއި މީހުންނާއި ގުޅުވާ ދިނުން. މިކަމުގައި އެންޖީއޯތަކުގެ ދައުރު ވަރަށް ބޮޑު." މެޑަމް ސާޖިދާ ވިދާޅުވިއެވެ.

މެޑަމް ސާޖިދާ ވަނީ ކޮންމެ ސަރުކާރަކުންވެސް ޖަމްޢިއްޔާތަކާ ގުޅިގެން މަސައްކަތް ކުރުމުން ލިބޭނެ ފައިދާތަކުގެ މައްޗަށް އަލިއަޅުވައިލައްވާފައެވެ.

އެކަމަނާގެ ވާހަކަފުޅުގައި ވަނީ މުޖްތަމަޢުގެ ތެރެއިން ފެންނަ ނޭދެވޭ ކަންތައްތައް ހުއްޓުވައި، އެންމެންގެ ލާބައަށް މަސައްކަތް ކުރުމުގައި ޖަމްޢިއްޔާތަކުން އަދާކުރާ ދައުރަށް ބައްލަވައިލައްވައިފައެވެ. އެގޮތުން އަންހެނުންނަށް ކުރާ އަނިޔާތަކާއި، ކުރިމަތިވާ ގޮންޖެހުންތަކުން ސަލާމަތްކޮށްދީ، އަންހެނުން ބާރުވެރިކުރުވުމުގެ ވާހަކަ ދައްކާއިރު، ޢަމަލީ ގޮތުން މިކަން ހާޞިލްކުރެވޭނީ މިފަދަ ޖަމްޢިއްޔާތަކަށް މުޖްތަމަޢުގައި ދެވޭ މަގާމާއި ހަައިސިއްޔަތު ވަރުގަދަ ކޮށްގެންކަމުގައި ވިދާޅުވިއެވެ.

"އަންހެނުން ބާރުވެރިކުރުވަން ޖެހޭ. އެހެންނޫންނަމަ އަޅުގަނޑުމެން މި ބޭނުންވާ އެއްބައިވަންތަކަމާއި އެކުވެރިކަމާއި މުޖްތަމައުގެ މި ހަމަޖެހުން ގަނައުމުގައި ހިޔެއްނުވޭ ކުރިއަށް ދެވޭނެ ހެނެއް. އަޅުގަނޑުގެ އުންމީދަކީ މި ފަދަ ގިނަ އެންޖީއޯތަކެއް އުފެދުން" މެޑަމް ވިދާޅުވިއެވެ.

މި ޙަފްލާގައި، މަމްސް އެއިޑު އުފެދި، މި ވޭތުވެދިޔަ 6 އަހަރު ދުވަހުގެ ތެރޭގައި ޖަމްޢިއްޔާއިން ކުރި މުހިންމު މަސައްކަތްތަކުގެ ވީޑިއޯ ޕްރެޒެންޓޭޝަނެއް ދައްކާފައިވެއެވެ. އަދި މަމްސް އެއިޑަށް އެކި ގޮތްގޮތުން އެހީތެރިވެދެއްވާ ސްޕޮންސަރުންނާއި ޕާޓްނަރުންގެ އަގުވަޒަންކުރިއެވެ.

2025ވަނަ އަހަރުގެ މުހިންމު ޙަރަކާތެއްގެ ގޮތުގައި، "ފަންޑް ރެއިޒަރ ފޮރ ހޯޕް ފޮރ މަމްސް ކެމްޕެއިން" ވެސް މި ޙަފްލާގަައި އިފްތިތާޙު ކުރިއެވެ. އަދި މަމްސް އެއިޑުން މިއަހަރަށް ކަނޑައެޅި "2025 އިމްޕެކްޓް ޕާޓްނަރުން" ވެސް އިޢުލާނު ކުރިއެވެ.

މަމްސް އެއިޑަށް ކޮށްދިން ޚިދުމަތް ފާހަގަކޮށް، އެ ޖަމްޢިއްޔާގެ 5 މެންބަރަކަށް މި ޙަފްލާގަައި ދިން ހަނދާނީ ފިލާ އެ ފަރާތްތަކާ ޙަވާލުކޮށް ދެއްވީވެސް ރައީސުލްޖުމްހޫރިއްޔާގެ އަނބިކަނބަލުންނެވެ.