އުމްރާއަށް މީހުން ގެންދަންވާނީ އެ ޒިންމާ އަދާކުރެވޭނެކަން ޔަގީންކޮށްގެން

ކޮންމެ އަހަރަކުވެސް އުމްރާއަށް މީހުން ގެންދިއުމަށް ގިނަ ކުންފުނިތަކަކުން ހަރަކާތްތެރިވެއެވެ. އެގޮތުން، މިހާތަނަށް 50 ކުންފުންޏަކަށް އިސްލާމީ ކަންތައްތަކާބެހޭ ވުޒާރާއިން ވަނީ އުމްރާއަށް މީހުން ގެންދިއުމުގެ ހުއްދަ ދޫކޮށްފައެވެ.

ރާއްޖޭން އުމްރާގެ އަޅުކަން އަދާކުރަންދާ ދިވެހީންގެ އަދަދު ދަނީ ދުވަހަކަށްފަހު ދުވަހެއް އިތުރުވަމުންނެވެ. އިސްލާމީ ކަންތައްތަކާ ބެހޭ ވުޒާރާއިން ވިދާޅުވެފައިވާގޮތުގައި މިދިޔަ ޑިސެންބަރު މަހު އެކަނިވެސް 6،300 އަށްވުރެ ގިނަ ދިވެހިން ވަނީ އުމްރާގެ އަޅުކަން އަދާކުރުމަށް މައްކާއަށް ގޮސްފައެވެ. އެއީ ހުއްދަދީފައިވާ 50 ކުންފުންޏަށް ހަމައަށް ބަހާލާނަމަވެސް ކުންފުންޏެއްގެ ހަވާލުގައި ދަތުރުކުރި 125 އަށްވުރެ ގިނަ މީހުންނެވެ.

އާންމު ދަތުރެއްގައިވެސް މީހަކު ގެންދިއުމަކީ ކޮނޑުގައި އެޅުވޭ ވަރަށް ބޮޑު ޒިންމާއެކެވެ. އެ މީހެއްގެ ދަތުރުގެ ޒިންމާއާއި ހުރުމާއި ކެއުމާއި ބުއިމާއި އެމީހަކު ނަގާ ޕެކޭޖެއްގައި ހިމެނޭ ހުރިހާ ކަމެއް ޒިންމާދާރުކަމާއެކު ފުރިހަމަ ކުރުމަކީ އެކަމަކާ ހަވާލުވާ ބަޔަކަށް މަޖުބޫރުކަމެކެވެ. މިއީ އާންމު ޗުއްޓީ ދަތުރެއްގެ ވާހަކައަށްވާއިރު އުމްރާފަދަ މާތް އަޅުކަމެއްގައި މީހުން ގެންދާ ފަރާތްތަކުން މިކަންކަމަށް އިތުރަށް ވިސްނަން ޖެހެއެވެ.

ރާއްޖޭގައި އާންމުކޮށް މީހުން އުމްރާއަށް ދަނީ ބޮޑެތި ޗުއްޓީތަކާ ދިމާކޮށެވެ. މި ދުވަސްވަރު ގިނަބަޔަކު އުމްރާއަށް ދާއިރު މީހުން ގެންދާ އެކި ކުންފުނިތަކާ ގުޅޭ ޝަކުވާތައް ސޯޝަލް މީޑިއާގައި އިތުރުވެއެވެ. ކޮންމެވެސް ގްރޫޕެއްގެ ހަވާލުގައި އުމްރާާއަށް ދާ ދިވެހިންތަކެއް ހާލުގައި ޖެހިފައިވާ ޚަބަރެއް އަޑު ނީވޭ ފަހަރެއް ނާދެއޭ ބުނުން ދޮގަކަށް ނުވާނެއެވެ.

ރާއްޖޭގައި އުމްރާއަށް މީހުން ގެންދާ ކުންފުނިތަކުން އަމަލުކުރަންޖެހޭ އުސޫލެއް ހަދާފައިވާއިރު އެ އުސޫލާ އެއްގޮތަށް އަމަލުނުކުރެވެންވީ އެއްވެސް ސަބަބެއް ނެތެވެ. އެ އުސޫލުގައިވާގޮތުން، ކޮންމެ ކުންފުންޏަކުންވެސް އުމްރާގެ ދަތުރުތަކަށް ފައިސާ ނެގުމަށްފަހު އެ ފައިސާ ޚަރަދު ކުރަންޖެހޭނީ އުމްރާގެ ކަންކަމުގައި އެކަންޏެވެ. އެ ފައިސާ އިތުރު ކަމަކަށް ބޭނުންކުރުމާއި އިންވެސްޓް ކުރުންވެސް މަނާ ކަމަށް އުސޫލުގައިވެއެވެ. ނަމަވެސް ގިނަފަހަރަށް އުމްރާއަށް ދާ ދިވެހީންގެ ތެރެއިން ހާލުގައި ޖެހެނީ އުމްރާއަށްދާން ދައްކާ ފައިސާ، ކުންފުނިން އެހެން ކަންކަމުގައި ބޭނުންކުރުމުގެ ސަބަބުންނެވެ.

މިފަހަރުވެސް ކުންފުންޏެއްގެ ހަވާލުގައި އުމްރާއަށް ދިޔަ 24 ދިވެއްސަކު ހާލުގައި ޖެހުނެވެ. އަލް-ހިޖްރަ ޓްރެވަލް އެންޑް ޓުއާސް ޕްރައިވެޓް ލިމިޑެޓްގެ ހަވާާލުގައި ދިޔަ މި ދިވެހިން ހާލުގައި ޖެހުނީވެސް އުމްރާއަށް މީހުން ގެންދަން ނެގި ފައިސާ އެހެން ކަންކަމުގައި ބޭނުންކުރުމުން ކަމަށް، ޕީއެސްއެމް ނިއުސްއަށް ވަނީ މައުލޫމާތު ލިބިފައެވެ. އެންމެފަހުން އެ ފަރާތްތަކަށް އެހީތެރިކަން ފޯރުކޮށްދޭން ޖެހުނީ ސަރުކާރުންނެވެ.

އެ ކުންފުނީގެ އިތުރުންވެސް އިތުރު ބައެއް ކުންފުނިތަކުން އުސޫލާ ޚިލާފުވެފައިވާކަމަށް އިސްލާމީ ކަންކަމާބެހޭ ވުޒާރާއިން ވިދާޅުވެއެވެ. މިފަދަ އެކި ކަންކަމުގެ ސަބަބުން މީގެ ކުރިންވެސް އުމްރާއަށް ދިޔަ ދިވެހިން ހާލުގައި ޖެހިފައިވެއެވެ. ކޮންމެ ފަހަރަކުވެސް އެ ދިވެހިންނަށް އެހީތެރިކަން ފޯރުކޮށްދީ ރާއްޖެއަށް ގެންނަން ޖެހެނީ ސަރުކާރުގެ ޚަރަދުގައެވެ.

އުމްރާއަށް މީހުން ގެންދިއުމުގައި އަމަލުކުރަންޖެހޭ އުސޫލުގައިވާގޮތުން ކުންފުނިތަކުން އުމްރާއަށް ދާން ފައިސާ ދައްކާ މީހުންނަށް ވައިގެ މަގުން ދެކޮޅު ޓިކެޓާއި އުމްރާއަށް ގޮސްތިބޭ ދުވަސްވަރު އެ ކުންފުންޏެއްގެ ޢުމްރާ ޕެކޭޖުގައިވާ ގޮތުގެ މަތީން ހުރުމާއި ކެއިންބުއިމާއި އެއްގަމުގެ ދަތުރުތައް ހަމަޖައްސައިދޭންޖެހޭނެއެވެ.

މި އުސޫލާ ޚިލާފުވާ ކުންފުނިތަކާމެދު ފިޔަވަޅު އެޅުމުގެ ބާރު އިސްލާމީ ކަންތައްތަކާބެހޭ ވުޒާރާއަށް ލިބިގެންވެއެވެ. އެގޮތުން، މައްސަލައިގެ ކުޑަބޮޑުމިނަށް ބަލައި 1000 ރުފިޔާއާ 100،000 ރުފިޔާއާ ދެމެދުގެ އަދަދަކުން ކުންފުނި ޖޫރިމަނާކުރެވޭނެއެވެ. އަދި ހުއްދަ ނެތި އުމްރާއަށް މީހުން ގެންދާނަމަ ނުވަތަ ގެންދަން ފައިސާ ނަގައިފިނަމަ 100،000 ރުފިޔާ އާއި 500،000 ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެއެވެ.

މީގެއިތުރުންވެސް ހުއްދަ ހިފެހެއްޓުމާއި ހުއްދަ ބާތިލުކުރުމަކީވެސް ގަވާއިދާ ޚިލާފުވާ ކުންފުނިތަކާ މެދު އެޅޭނެ ފިޔަވަޅުތަކެކެވެ. އަދި ޖިނާއީ މައްސަލައެއް ނަމަ، އެ މައްސަލަ ތަހުގީގުކުރުމަށް ފުލުހަށް ހުށަހެޅުމާއި މަދަނީ މައްސަލައެއް ނަމަ އެޓަރނީ ޖެނެރަލްގެ އޮފީހަށް ފޮނުވުމަކީވެސް އަޅުއްވާނެ ފިޔަވަޅުތަކެވެ.

ކުންފުނިތަކުން ގިނަ ބައެއްގެ ފައިސާއާ ހަވާލުވާއިރު އެ ޒިންމާ ރަނގަޅަށް އަދާކުރެވޭނެކަން ކަށަވަރުކުރަންޖެހޭނެއެވެ. އަދި ގަވާއިދާ އެއްގޮތަށް އެ ފައިސާއަށް އަމާނާތްތެރިވެ، އުމްރާގެ މަތިވެރި އަޅުކަން އަދާކުރަންދާ ފަރާތްތަކަށް އެންމެ ފެންވަރު ރަނގަޅު ޚިދުމަތް ފޯރުކޮށްދޭން ޖެހޭނެއެވެ.

އުމްރާއަށް ދިއުމުގައި ފައިސާ ދައްކާއިރު އެ ފައިސާ ދައްކާ މީހާ ބަލަންޖެހޭ ކަންކަންވެސް އެބަހުއްޓެވެ. އެގޮތުން، ފައިސާ ދައްކާ ކުންފުންޏަކީ ހުއްދަ އޮތް ކުންފުންޏެއްކަން ކަށަވަރު ކުރުމާއި އެ ކުންފުނީގެ ތަޖުރިބާއަށް ބެލުމަކީ ތިމާގެ ރައްކާތެރިކަމަށް ކުރެވިދާނެ ކަމެކެވެ.