ޔަމަންގެ އިންޖީނުގެއަކަށާއި ދެ ބަނދަރަކަށް ނިރުބަވެރި ޙަމަލާތަކެއް ޔަހޫދީންގެ އިސްތިޢުމާރީ ފައުޖުން ދީފިއެވެ. މިއީ، ޔަހޫދީންގެ ރަށްތަކަށް އަމާޒުކޮށް އަސްކަރީ ޑްރޯނާއި މިސައިލް ބޭނުން ކޮށްގެން ޔަމަންގައި ހަރަކާތްތެރިވާ ހަތިޔާރު އެޅި ޖަމާޢަތް، ޙޫޘީން ދީފައިވާ ޙަމަލާތަކުގެ ބަދަލު ހިފުމުގެ ގޮތުން ހިންގާފައިވާ ޖަރީމާއެކެވެ. ޙޫޘީން ބުނީ، ޔަހޫދީންގެ ޙަމަލާތަކުގައި އެކަކު ޝަހީދު ކޮށްލާފައިވާ ކަމުގައެވެ. އަދި، އިތުރު ނުވަ މީހަކު ޒަޚަމު ކޮށްލާފައިވާ ކަމުގައެވެ.
ރަތް ކަނޑުގެ އިތުރުން ޢަދަން ކަނޑާއި ބާބް އަލް-މަންދަބީ ކަނޑުން ދަތުރު ކުރާ އާގުބޯޓުފަހަރުގެ އިތުރުން ޒަޔަނިސްޓުންނާ ދެކޮޅަށް ޙޫޘީން އަސްކަރީ އޮޕަރޭޝަނެއް ފަށާފައި ވަނީ، 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހު ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީން ލާއިންސާނީ ޖަރީމާތަކެއް ފެށުމާ ގުޅިގެންނެވެ. ޙޫޘީންގެ އަމާޒަކީ ފަލަސްޠީނުގެ ރައްޔިތުންނާއި، މިނިވަން ކަމަށް ޖިހާދު ކުރަމުންދާ ޖަމާޢަތްތަކަށް ވާގިވެރިވުމެވެ. އަދި، ބޭނުމަކީ ޔަހޫދީ ފައުޖުގެ އަނިޔާވެރި ކަމަށް ނިމުމެއް ގެނައުމަށް ބާރު އެޅުމެވެ. މީގެ އިތުރުން، ޙޫޘީން ދަނީ ނުރައްކާތެރި މިސައިލާއި އަސްކަރީ ޑްރޯން ފަަދަ ހަތިޔާރު ބޭނުން ކޮށްގެން އިސްރާއީލުގެ ރަށްތަކަށް އަމާޒުކޮށް ޙަމަލާ ދެމުންނެވެ.
ޙޫޘީންގެ އެންމެ ފަހުގެ ޙަމަލާތަކުގެ ބަދަލު ހިފުމުގެ ގޮތުން އަސްކަރީ މަތިންދާބޯޓުތައް ބޭނުން ކޮށްގެން ޔަހޫދީ ފައުޖުން ބޮންއަޅާފައި ވަނީ ރަތް ކަނޑުގެ އައްސޭރިފަށުގައި އޮތް ރައުސު ޢީސާ ބަނދަރާއި ޙުދަޔިދާ ބަނދަރަށެވެ. މީގެ އިތުރުން، ވެރިރަށް ޞަންޢާގެ ޙުޛްޔާޛް އިންޖީނުގެއަށް ވެސް ބޮންއަޅާފައިވެއެވެ. ޢުމްރާން ޕުރޮވިންސުގެ ޙަރްފާ ސުފިޔާން އަވަށަށް ވެސް ޔަހޫދީ ފައުޖުން ނިރުބަވެރި ޙަމަލާތަކެއް ދިނެވެ.
ޙޫޘީން ބުނީ، ޔަހޫދީންގެ ޙަމަލާތަކުގައި ޝަހީދުކޮށްލާފައި ވަނީ ރައުސު ޢީސާ ބަނދަރުގައި މަސައްކަތް ކުރާ މުވައްޒަފެއް ކަމުގައެވެ. އަދި، އެ ތަނުގައި މަސައްކަތް ކުރާ އިތުރު ހަ މުވައްޒަފުން ޒަޚަމު ކޮށްލާފައިވާ ކަމުގައެވެ. އިތުރު ތިން މީހުން ޒަޚަމު ކޮށްލާފައި ވަނީ ޙުޛްޔާޛް އިންޖީނުގެއަށް ދީފައިވާ ޙަމަލާތަކުގައެވެ. އޭގެ ތެރޭގައި އެ ތަނުގައި ވަޒީފާ އަދާ ކުރާ މުވައްޒަފެއް ހިމެނެއެވެ.
ޔަހޫދީން ވަނީ ޔަމަނަށް ދީފައިވާ ޙަމަލާތަކާ މެދު ފަޚުރުވެރި، އެ ކަމުގެ ވާހަކަ ދައްކާފައެވެ. މި ގޮތުން، ޔަމަނުގެ ޢާންމު ރައްޔިތުންނާ ދެކޮޅަށް ހިންގާފައިވާ ޢުދުވާނުގައި 20 އަސްކަރީ މަތިންދާބޯޓު ބޭނުންކޮށް، 50އަށްވުރެ ގިނަ ފަނާކުރަނިވި ބޮމާއި މިސައިލް ބޭނުން ކޮށްފައިވާނެ ކަމުގައި ޔަހޫދީ ސިފައިން ބުންޏެވެ.
ކަނޑު ދަތުރުފަތުރުގެ ސަލާމަތީ ޚިދުމަތްތައް ފޯރުކޮށްދޭ އިނގިރޭސިވިލާތުގެ ކުންފުނި، އެމްބްރީން ބުނީ ޔަހޫދީންގެ ޙަމަލާތައް އަމާޒު ކޮށްފައިވާ ތަންތަނުގެ ތެރޭގައި ރައުސު ޢީސާ ބަނދަރުގައި ހުރި ތެޔޮ ރައްކާކުރާ ގުދަނެއް ހިމެނޭ ކަމުގައެވެ. އެއީ، އާގުބޯޓުފަހަރު ބަނދަރު ކުރާ ސަރަޙައްދާ ކައިރީގައި ހުރި ތަނެއް ނަމަވެސް، ޔަހޫދީ ފައުޖުގެ ޙަމަލާތަކުގައި އެއްވެސް އުޅަނދަކަށް ގެއްލުންވެފައި ނުވާ ކަމުގައި އެ ކުންފުނިން ހާމަކުރިއެވެ.
ޙަމަލާތަކާ ގުޅިގެން ތެޔޮ ފޯރުކޮށްދިނުމަށް އެއްވެސް ވަރަކަށް ހުރަސް އެޅިފައި ނުވާ ކަމުގައި ޙޫޘީ ސަރުކާރުގެ ތަރުޖަމާނު ހާޝިމް ޝަރަފުއްދީން ވިދާޅުވިއެވެ. ޔަހޫދީ ފައުޖުން ބުނީ، ޙުޛްޔާޛް އިންޖީނުގެއަކީ ޙޫޘީންގެ އަަސްކަރީ އޮޕަރޭޝަންތަކުގައި ބޭނުން ކުރާ މުހިންމު ތަނެއް ކަމުގައެވެ.
ފާއިތުވި 48ވަރަކަށް ގަޑިއިރުގެ ތެރޭގައި ޒަޔަނިސްޓުންގެ ރަށްތަކަށް އަމާޒުކޮށް ޙޫޘީން ނުރައްކާތެރި ޙަމަލާތަކެއް ދީފައިވެއެވެ. އެ ޙަމަލާތަކުގައި ތިން ޑްރޯން ބޭނުން ކޮށްފައިވެއެވެ. އެ ޙަމަލާތައް އަމާޒު ކޮށްފައި ވަނީ އިސްރާއީލުގެ ވެރިރަށް ތެލް އަވީވަށެވެ. ރަތް ކަނޑުގައި ހަރަކާތްތެރިވަމުންދާ އެމެރިކާގެ އަސްކަރިއްޔާގެ އަސްކަރީ މަތިންދާބޯޓު އުފުލާ މަނަވަރު، ޔޫއެސްއެސް ހެރީ އެސް ޓްރޫމަނަށް އަމާޒުކޮށް ޑްރޯން ޙަމަލާތަކެއް ދީފައިވާނެ ކަމުގައި ވެސް ޙޫޘީންގެ ތަރުޖަމާނު ޔަޙްޔާ ޤާސިމް ސަރީޢު ހާމަކުރެއްވިއެވެ.
ރަތް ކަނޑުގެ އިތުރުން ޢަދަން ކަނޑާއި ބާބް އަލް-މަންދަބީ ކަނޑުގައި ޙޫޘީން ހިންގަމުންދާ އަސްކަރީ އޮޕަރޭޝަނުގެ ދަށުން ދެމުންދާ ޙަމަލާތައް އަމާޒު ކުރަމުން ދަނީ ޔަހޫދީންނާ ގުޅުން އޮތް އާގުބޯޓުފަހަރަށެވެ. އަދި، އިސްރާއީލަށް މުދާ އުފުލާ އުޅަނދުފަހަރަށެވެ. މީގެ އިތުރުން، ޔަހޫދީންގެ ޙިމާޔަތުގައި ތެދުވެ، ޔަމަނަށް ވައިގެ ޙަމަލާ ދެމުންދާ އެމެރިކާއާއި އިނގިރޭސިވިލާތުގެ އަސްކަރީ މަނަވަރުތަކުގެ އިތުރުން އެ ދެ ޤައުމާ ގުޅުން އޮތް އާގުބޯޓުފަހަރަށް ވެސް ޙޫޘީން ދަނީ ޙަމަލާތައް އަމާޒު ކުރަމުންނެވެ. މި ކަމާ ގުޅިގެން ޙޫޘީން ނައްތައިލާނެ ކަމަށް ބުނެ ޔަހޫދީން ވަނީ އިންޒާރު ދީފައެވެ.