އެމެރިކާއިން ހައްޔަރު ކުރުމުގެ އަމުރު ނެރެފައިވާ މަދޫރޯ ވެނެޒުއެލާގެ ރައީސް ކަމުގެ ތިންވަނަ ދައުރަކަށް

ވެނެޒުއެލާގެ ރައީސް ނިކޮލަސް މަދޫރޯ އެ ޤައުމުގެ ރައީސް ކަމުގެ މަޤާމުގެ ހުވައި ކުރައްވައި، ތިންވަނަ ދައުރަކަށް އެ މަޤާމާ ޙަވާލުވެ ވަޑައިގަންނަވައިފިއެވެ. ވެނެޒުއެލާގެ ރައީސް ކަމުގެ މަޤާމާ ތިންވަނަ ދައުރަކަށް މަދޫރޯ ޙަވާލުވެ ވަޑައިގަންނަވާފައި މި ވަނީ، އޭނާ ހައްޔަރު ކުރުމުގެ އަމުރެއް އެމެރިކާއިން ނެރެފައިވާ ދަނޑިވަޅެއްގައެވެ. އަދި، އޭނާ ހައްޔަރުކޮށްގެން އެމެރިކާއާ ޙަވާލު ކުރާ މީހަކަށް ދޭނެ ކަމަށް ކަނޑައަޅާފައިވާ ފައިސާގެ އިނާމުގެ އަދަދު ބޮޑު ކޮށްފައިވާ ދަނޑިވަޅެއްގައެވެ.

ވެނެޒުއެލާގެ ރައީސް ކަމުގެ މަޤާމާ މަދޫރޯ ފުރަތަމަ ޙަވާލުވެ ވަޑައިގަތީ 2013ވަނަ އަހަރުއެވެ. އެއަށް ފަހު، ފާއިތުވި 12 ވަރަކަށް އަހަރު އޭނާ ކުރައްވާފައިވާ ވެރިކަން ފާހަގަ ކުރެވިފައި ވަނީ އިޤުތިޞާދީ ގޮތުންނާއި އިޖުތިމާޢީ ގޮތުން ވެނެޒުއެލާއަށް ބޮޑު ކާރިސާއަކާ ކުރިމަތިލާން ޖެހުނު ވެރިކަމަކަށެވެ. ވެރިކަމުގެ ތިންވަނަ ދައުރަކާ އޭނާ ޙަވާލުވެ ވަޑައިގަންނަވާފައި މި ވަނީ، އިސްތިޢުފާ ދެއްވުމަށް ފަހު ވެރިކަމާ ފެޔަށް ޖެހިވަޑައިގެންނެވުމަށް ބައިނަލްއަޤުވާމީ މުޖުތަމަޢުން އޭނާއަށް ގޮވައިލަމުންދާ ވަގުތެއްގައެވެ.

ވެރިކަމުގެ ތިންވަނަ ދައުރެއް މަދޫރޯ ކަށަވަރު ކުރައްވާފައި ވަނީ ޖުލައި މަހު ބޭއްވި ރިޔާސީ އިންތިޚާބު ކާމިޔާބު ކުރައްވައިގެންނެވެ. ނަމަވެސް، އެ އިންތިޚާބުގެ ނަތީޖާ އޮޅުވައިލާފައިވާ ކަމުގެ ތުހުމަތުތައް ވަނީ ޢާންމުވެފައެވެ. އިންތިޚާބުގައި ވާދަކުރި އިދިކޮޅު އިއްތިޙާދުން ބުނީ، އިންތިޚާބުގައި ކާމިޔާބީ ހޯއްދަވާފައި ވަނީ އެ އިއްތިޙާދުގެ ކެނޑިޑޭޓު، އެދްމުންދޯ ގޮންޒާލޭޒް ކަމުގައެވެ. އެމެރިކާއިން ވެސް ޤަބޫލު ކުރަނީ އެ ގޮތަށެވެ. އިންތިޚާބުގެ ކަންކަން މޮނިޓަރ ކުރި ބައިނަލްއަޤުވާމީ ޖަމުޢިއްޔާތަކުން ވެސް ބުނީ އިންތިޚާބު ކުރިއަށް ގޮސްފައި ވަނީ ޑިމޮކްރެޓިކް ހަމަތަކާ ޚިލާފަށް ކަމުގައި ބުނެފައެވެ.

ނަމަވެސް، ވެނެޒުއެލާގެ އިންތިޚާބުތަކާ ބެހޭ އިދާރާގެ އިތުރުން އެ ޤައުމުގެ އެންމެ މަތީ ކޯޓުން ވަނީ އިންތިޚާބުގައި މަދޫރޯ ކާމިޔާބީ ހޯއްދަވާފައިވާ ކަމަށް ކަނޑައަޅާފައެވެ. އިންތިޚާބުގައި ވޯޓުލާފައިވާ ގޮތުގެ ތަފުސީލުތައް ހިމެނޭ، އެ ކަމަށް ބާރުދޭ ލިޔެކިޔުންތައް އިންތިޚާބުތަކާ ބެހޭ އިދާރާއިން ހާމަކޮށްފައެއް ނެތެވެ.

"

"މަދޫރޯ ވަނީ ބަޣާވާތެއްކޮށް، ޤާނޫނުއަސާސީއާ ޚިލާފުވެފައި. އެ ކަން ބަދަލު ކުރުމަށް ކުރަން ޖެހުނު ކޮންމެ ކަމެއް ކުރަންވީ ވަގުތު މި އޮތީ ޖެހިފައި،"

ވެނެޒުއެލާގެ އިދިކޮޅު އިއްތިޙާދުގެ ވެރިޔާ މަރީނާ ކޮރީނާ މަޗާދޯ

އިންތިޚާބުގެ ނަތީޖާ އޮޅުވައިލާފައިވާ ކަމަށް ކުރެވޭ ތުހުމަތުތަކާ ގުޅިގެން ވެނެޒުއެލާގައި ބޮޑެތި ހަމަނުޖެހުންތަކެއް ފެށުނެވެ. އަދި، އެ ކަމާ ގުޅިގެން ފުރާނައަށް ނުރައްކާވުމުން ގޮންޒާލޭޒް ވަނީ ޤައުމު ދޫކޮށް ސްޕެއިނަށް ދަތުރު ކުރައްވާފައެވެ. އޭނާގެ އިތުރުން އިދިކޮޅު އިއްތިޙާދުގެ ވެރިޔާ މަރީނާ ކޮރީނާ މަޗާދޯ ވަނީ ފިއްލަވާފައެވެ. ހަމަނުޖެހުންތަކާ ގުޅިގެން މަދޫރޯގެ އަމުރަށް އިދިކޮޅު އިއްތިޙާދުގެ ގިނަ މެންބަރުންތަކެއް ހައްޔަރަށް ގެންގޮސްފައިވެއެވެ.

"އެދްމުންދޯ [ގޮންޒާލޭޒް] އެންމެ ރަނގަޅު ދަނޑިވަޅުގައި އެނބުރި ޤައުމަށް ވަޑައިގަންނަވައި، ދުސްތޫރީ ހަމަަތަކުގެ މަތިން ރައީސް ކަމުގެ މަޤާމުގެ ހުވައި ކުރައްވާނެ. މިއަދު، އެދްމުންދޯއަށް އެނބުރި ވެނެޒުއެލާއަށް އައުމަކީ އެންމެ ރައްކާތެރި ގޮތެއް ނޫން. އަޅުގަނޑު އިރުޝާދު ދީފައިވާނީ އެ ގޮތަށް، ސަބަބަކީ އޭނާގެ ނަޒާހަތްތެރިކަން ދަމަހައްޓަން ޖެހޭނެ، [މަދޫރޯގެ] ވެރިކަން ނިމެން ވަރަށް ގާތްވެއްޖެ، އަދި ޑިމޮކުރަސީ އަލުން އިޔާދަ ކުރެވޭނެ،" ވީޑިޔޯ މެސެޖެއްގައި މަޗާދޯ ވިދާޅުވިއެވެ.

"މަދޫރޯ ވަނީ ބަޣާވާތެއްކޮށް، ޤާނޫނުއަސާސީއާ ޚިލާފުވެފައި. އެ ކަން ބަދަލު ކުރުމަށް ކުރަން ޖެހުނު ކޮންމެ ކަމެއް ކުރަންވީ ވަގުތު މި އޮތީ ޖެހިފައި،" އޭނާ ވިދާޅުވިއެވެ.

ގޮންޒާލޭޒް އެނބުރި ޤައުމަށް ވަޑައިގަންނަވައިފި ނަމަ އޭނާ ހައްޔަރު ކުރާނެ ކަމުގެ އިންޒާރު މަދޫރޯގެ ސަރުކާރުން ވަނީ ދީފައެވެ. އަދި، އޭނާ ހައްޔަރު ކުރުމަށް އެހީތެރިވެދޭ ފަރާތަކަށް 100,000 އެމެރިކާ ޑޮލަރުގެ އިނާމެއް ވެސް މަދޫރޯގެ ސަރުކާރުން ވަނީ ހުށަހަޅާފައެވެ. "އަވަހަށް، ވަރަށް އަވަހަށް، އެ މީހުން ކޮންމެ ކަމެއް ކުރި ނަމަވެސް، އަޅުގަނޑުމެން އެނބުރި ވެނެޒުއެލާއަށް ގޮސް، މި ހިތާމަވެރި ކަމަށް ނިމުމެއް ގެންނާނަން،" ގޮންޒާލޭޒް ވިދާޅުވިއެވެ.

މަދޫރޯގެ މައްޗަށް އެމެރިކާގެ ރައީސް ޖޯ ބައިޑަންގެ ސަރުކާރުން ވަނީ މަސްތުވާތަކެތި ޓްރެފިކު ކުރުމުގެ ދަޢުވާ އުފުލާފައެވެ. އޭނާ ހައްޔަރުކޮށް އެމެރިކާގެ ކަމާ ގުޅޭ އިދާރާތަކާ ޙަވާލު ކުރާ ފަރާތަކަށް ބައިޑަންގެ ސަރުކާރުން ކުރިން އޮތީ 15 މިލިޔަން އެމެރިކާ ޑޮލަރުގެ ފައިސާގެ އިނާމެއް ހުށަހަޅާފައެވެ. ނަމަވެސް، ބައިޑަންގެ ސަރުކާރުން މިހާރު ވަނީ އެ އަދަދު 25 މިލިޔަން އެމެރިކާ ޑޮލަރަށް އިތުރު ކޮށްފައެވެ.

މަދޫރޯގެ އިތުރުން ވެނެޒުއެލާގެ ދާޚިލީ ވަޒީރާއި ދިފާޢީ ވަޒީރާ ދެކޮޅަށް އެމެރިކާއިން ދަޢުވާ އުފުލާފައި ވަނީ 2020ވަނަ އަހަރުއެވެ. އެ ދަޢުވާތަކުގެ ތެރޭގައި މަސްތުވާތަކެތި ޓްރެފިކު ކުރުމުގެ އިތުރުން ކޮރަޕްޝަން ވެސް ހިމެނެއެވެ. ނަމަވެސް، މަދޫރޯ ވަނީ އެ ދަޢުވާތަކަށް އިންކާރު ކުރައްވާފައެވެ. އެމެރިކާއާ އެކު އިނގިރޭސިވިލާތާއި، ވިލާތުގެ އިއްތިހާދު (އީޔޫ)ގެ އިތުރުން ކެނެޑާއިން ވެސް ވަނީ މަދޫރޯއާއި އޭނާގެ ސަރުކާރާ ދެކޮޅަށް ދަތި ކުރުމުގެ ފިޔަވަޅުތައް އަޅާފައެވެ.

އެމެރިކާގެ ޚާރިޖީ ވަޒީރު އެންތަނީ ބްލިންކަން ވިދާޅުވީ، ވެނެޒުއެލާގެ ރައީސް ކަމުގެ މަޤާމުގެ އިތުރު ދައުރަކަށް މަދޫރޯ ހުވައި ކުރެއްވުމަކީ ޣައިރުޤާނޫނީ އަމަލެއް ކަމުގައެވެ. އަދި، އޭނާގެ ވެރިކަން އެމެރިކާއިން ބަލައިނުގަންނާނެ ކަމުގައެވެ. "ވެނެޒުއެލާގެ ރައްޔިތުންނާއި މުޅި ދުނިޔެއަށް ވެސް ޙަޤީޤަތް ވަރަށް ސާފު. 2024ވަނަ އަހަރު ބޭއްވި ރިޔާސީ އިންތިޚާބުގައި މަދޫރޯއަށް ނާކާމިޔާބުވެފައިވާ ކަން ވަރަށް ސާފު، އަދި ރައީސް ކަމުގެ މަޤާމަށް ވަކާލާތު ކުރުމަކީ އޭނާއަށް ލިބިގެންވާ ޙައްޤެއް ނޫން،" އޭނާ ވިދާޅުވިއެވެ.