ޙައްޖާއި ޢުމްރާއާ ބެހޭ ވަޒީރުގެ ދަޢުވަތަކަށް ވަޒީރު ޝަހީމް ސަޢުދީއަށް ވަޑައިގެންފި
-
ވަޒީރުގެ މިދަތުރުފުޅުގެ ތެރެއިން މިއަހަރުގެ ޙައްޖު އެގްރީމެންޓްގައި ސޮއިކުރައްވާނެ
-
1446 ވަނަ އަހަރުގެ ޙައްޖު މައުރަޒުގައި ވަޒީރު ބައިވެރިވެވަޑައިގަންނަވާނެ
އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ސަޢޫދީ ޢަރަބިއްޔާއަށް ވަޑައިގެންފިއެވެ.
ވަޒީރު ޝަހީމް ސަޢުދީ ޢަރަބިއްޔާއަށް ކުރައްވަމުން ގެންދަވާ ދަތުރުފުޅަކީ އެ ޤައުމުގެ ޙައްޖާއި ޢުމްރާއާ ބެހޭ ވަޒީރު ޑރ. ތައުފީޤު ރަބީޢާގެ ދަޢުވަތަކަށްކުރައްވާ ދަތުރުފުޅެކެވެ.
އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ ވަޒީރުގެ މިދަތުރުފުޅުގައި ރާއްޖެއާއި ސަޢުދީ އަރަބިއްޔާއާ ދެމެދު ކޮންމެ އަހަރަކުވެސް ޤާއިމުކުރާ ޙައްޖު އެގްރީމެންޓްގައި ސޮއިކުރައްވާނެ ކަމަށެވެ. އަދި ޙައްޖާ ބެހޭ ވަޒީރާ ބައްދަލުކުރައްވައި މުހިންމު މަޝްވަރާތަކެއްކުރައްވާނެކަމަށެވެ. އަދި ސަޢުދީގެ ޙައްޖާބެހޭ ވުޒާރާއިން ބާއްވާ 1446 ވަނަ އަހަރުގެ ޙައްޖު މައުރަޒުގައިވެސް ވަޒީރު ޝަހީމު ބައިވެރިވެވަޑައިގަތުމަށް ހަމަޖެހިފައިވާކަމަށްވެސް އެ ވުޒާރާއިން ވިދާޅުވިއެވެ.
ދިވެހި ޙައްޖާޖީންގެ އިންތިޒާމްތައް ރަނގަޅުކޮށް، ހަރުދަނާކުރުމަށްޓަކައި ދިވެހި ސަރުކާރުން އަބަދުވެސް ގިނަ މަސައްކަތްތަކެއް ކުރެއެވެ. އަދި ރާއްޖެއަށް ލިބޭ ޙައްޖު ކޯޓާގެ އަދަދު އިތުރުކުރުމަކީވެސް ސަރުކާރުގެ ބޮޑު އަމާޒެކެވެ. އެގޮތުން ރާއްޖޭން މީހުން ޙައްޖަށް ފޮނުވުމަށް ލިބޭ ކޯޓާގެ އަދަދު 2000 އަށް އިތުރުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެކެވެ.