ކޮޅިގަނޑެއްގެ އަސަރު ރާއްޖެ ސަރަޙައްދަށް، މުޅި ހަފްތާ މޫސުން ގޯސްވާނެ

ބޭ އޮފް ބެންގަލް ސަރަޙައްދުގައި އުފެދިފައިވާ ކޮޅިގަނޑުގެ އަސަރު މާދަމާއިން ފެށިގެން ރާއްޖެއަށް ކުރާނެކަމަށާއި މުޅި މި ހަފްތާ ރާއްޖެއަށް ވިއްސާރަވާނެކަމަށް ބެލެވޭކަމަށް މޫސުމާ ބެހޭ ޤައުމީ އިދާރާއިން ވިދާޅުވެއްޖެއެވެ.

މޫސުމާ ބެހޭ ޤައުމީ އިދާރާއިން ވިދާޅުވީ، ރާއްޖޭގެ ހުޅަނދު ދެކުނުން އުފެދިފައިވާ ކޮޅިގަނޑު ހުޅަނގަށް ޖެހި، ރާއްޖެ ސަރަޙައްދުގައި ބޯ ވިއްސާރަ ވިލާ އުފެދުމުގެ ފުރުޞަތު ބޮޑުކަމަށެވެ.

އެހެންކަމުން މާދަމާއިން ފެށިގެން މި ހަފްތާގެ ހޮނިހިރު ދުވަހުގެ ނިޔަލަށް ރާއްޖޭގެ ބޮޑު ބަޔަކަށް ވިއްސާރަކުރާނެކަމަށް ވަނީ ލަފާކޮށްފައެވެ. އަދި އެ މުއްދަތުގައި ބައެއް ހިސާބުތަކަށް ބޯކޮށް ވާރޭވެހުމާއެކު ގުގުރުމާ އަދި އާއްމުވައި ގަދަވެ ކަނޑުތައް ގަދަވާނެކަމަށް ބެލެވޭކަމަށް މޫސުމާ ބެހޭ ޤައުމީ އިދާރާއިން ވިދާޅުވެއެވެ.

މީގެއިތުރުން އުތުރާއި މެދުރާއްޖެތެރޭގެ ބައެއް ރަށްތަކަށް އުދައިގެ އަސަރުކުރުމުގެ ފުރުޞަތު އޮތްކަމަށްވެސް ވަނީ ލަފާކޮށްފައެވެ.

އެހެންކަމުން މޫސުމާ ގުޅޭގޮތުން މެޓުން ނެރޭ މޫސުމީ ސަމާލުތަކާ އިންޒާރުތަކަށް ސަމާލުވުމަށް މޫސުމާ ބެހޭ ޤައުމީ އިދާރައިން ވަނީ އިލްތިމާސުކުރައްވާފައެވެ. އަދި ގެއްލުން ކުޑަކުރުމަށް އަޅަންޖެހޭ ފިޔަވަޅުތަކަށް ދުރާލާ ސަމާލްކަން ދިނުމަސްވެސް ވަނީ އިރުޝާދު ދީފައެވެ.