ސޫރިޔާއާ ދެކޮޅަށް ހުޅަނގުން އަޅާފައިވާ ދަތިކުރުމުގެ ފިޔަވަޅުތަކަށް ލުއިދިނުމާ ގުޅޭ ގޮތުން މަޝްވަރާ ކުރުމަށް ހުޅަނގާއި ޢަރަބި ޤައުމުތަކުގެ ވެރިން ބައްދަލު ކުރައްވައިފިއެވެ. މިއީ، ސޫރިޔާގެ ރައީސް ބައްޝާރް އަލް-އަސަދުގެ ވެރިކަން ނިމުމަކަށް ގެނެސް، ނިރުބަވެރި ޖަމާޢަތެއް ކަމުގައިވާ ހަޔިއަތު ތަޙްރީރް އަލް-ޝާމް (އެޗްޓީއެސު)ން އެ ޤައުމުގައި އިންތިޤާލީ ސަރުކާރެއް އެކުލަވައިލި ފަހުން ސޫރިޔާގެ މަސްރަޙާ ގުޅޭ ގޮތުން މަޝްވަރާ ކުރުމަށް ހުޅަނގާއި ޢަރަބި ޤައުމުތަކުގެ ވެރިން ބައްދަލު ކުރައްވާފައިވާ ފުރަތަމަ ފަހަރެވެ.
އަސަދުގެ ސަރުކާރު ވައްޓައިލާފައި ވަނީ ޑިސެންބަރު 8ވަނަ ދުވަހުއެވެ. ނިރުބަވެރި ޖަމާޢަތެއް ކަމުގައިވާ އެޗްޓީއެސްގެ ހަނގުރާމަވެރިން ވެރިރަށް ދިމިޝްޤަށް އެރުމާ އެކު، އަސަދު ވަނީ، އޭނާގެ ޢާއިލާއާ އެކު، ފިއްލަވައިގެން ރަޝިޔާއަށް ވަޑައިގަންނަވާފައެވެ. އަދި، މޮސްކޯގެ ޙިމާޔަތަށް އެދިވަޑައިގަންނަވާފައެވެ.
ސަޢޫދީ ޢަރަބިއްޔާގައި ބޭއްވި މަޝްވަރާތަކަށް ފަހު، ވިލާތުގެ ޤައުމުތަކުގެ ޚާރިޖީ ވަޒީރުން ވަނީ، ސޫރިޔާއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތަކަށް ލުއިދިނުމާ ގުޅޭ ގޮތުން އިތުރު މަޝްވަރާތައް ކުރުމަށް މި ހިނގާ ޖަނަވަރީ މަހުގެ ފަހުކޮޅު އިތުރު ބައްދަލުވުންތަކެއް ބޭއްވުމަށް ނިންމާފައެވެ.
ވިލާތުގެ އިއްތިހާދު (އީޔޫ)ގެ ޚާރިޖީ ސިޔާސަތާ ބެހޭ މުޝީރު ކާޔާ ކައްލާސް ވިދާޅުވީ، ސޫރިޔާގެ މަސްރަޙާ މެދު މަޝްވަރާ ކުރުމަށް އީޔޫގެ 27 މެންބަރު ޤައުމުގެ ޚާރިޖީ ވަޒީރުންގެ މެދުގައި ޖަނަވަރީ 27ވަނަ ދުވަހު އިތުރު ބައްދަލުވުމެއް ބޭއްވުމަށް ތާވަލު ކޮށްފައިވާ ކަމުގައެވެ. އެ ބައްދަލުވުން އޮންނާނީ ބެލްޖިޔަމްގެ ވެރިރަށް ބްރަސްލްސްގައެވެ.
ފިޔަވަޅުތައް އުވައިލުމަށް ގިނަ ޝަރުޠުތަކެއް
ރިޔާޟުގައި ނޫސްވެރިންނާ ވާހަކަފުޅު ދައްކަވަމުން އޭނާ ވިދާޅުވީ ސޫރިޔާގެ ހުރިހާ ދަރިފަސްކޮޅާއި ނަސްލުތަކާއި ގުރޫޕުތަކުގެ ބައިވެރިވުން އޮތް ސަރުކާރެއް ޤާއިމު ކުރުމަށް އެދިވަޑައިގަންނަވާ ކަމުގައެވެ. އަދި، އެ ސަރުކާރުން ނިރުބަވެރިކަމަށް ޖާގަ ދީގެން ނުވާނެ ކަމުގައެވެ. އަދި، އަންހެނުންނާއި އާބާދީމަދު ދަރިފަސްކޮޅުތަކުގެ ޙައްޤުތައް ޙިމާޔަތްކޮށް ރައްކާތެރި ކޮށްދިނުމަކީ އީޔޫގެ އެންމެ މުހިންމު އެއް ޝަރުޠު ކަމުގައެވެ. ސޫރިޔާއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތައް އުވައިލުމަކީ އީޔޫއަށް ދަތިކަމަކަށް ނުވާނެ ކަމުގައި ވެސް އޭނާ ވިދާޅުވިއެވެ.
ރިޔާޟުގައި ބޭއްވި ބައްދަލުވުމުގައި ސަޢޫދީ ޢަރަބިއްޔާގެ ޚާރިޖީ ވަޒީރު ފައިޞަލް ބިން ފަރްޙާން އަލް-ސުޢޫދު ވެސް ވަނީ ސޫރިޔާއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތަކަށް ލުއިދިނުމަށް ހުޅަނގުގެ ބާރުތަކަށް ގޮވައިލައްވާފައެވެ. "ދޭދޭ ގޮތުންނާއި ބައިނަލްއަޤުވާމީ މުޖުތަމަޢުން ސޫރިޔާއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތަކަށް ލުއިދިނުމާ ގުޅޭ ގޮތުން އަޅުގަނޑުމެން މަޝްވަރާ ކުރީމު، އެ ފިޔަވަޅުތައް ހިނގާހާ ހިނދަކު ސޫރިޔާގެ ރައްޔިތުންގެ އުންމީދުތައް ހާސިލެއް ނުކުރެވޭނެ، [ޤައުމު އަލުން] އާރާސްތުކޮށް ބިނާ ކުރުމަށް ހުރަސް އެޅޭނެ،" އޭނާ ވިދާޅުވިއެވެ.
ސަޢޫދީ ޢަރަބިއްޔާގައި ބޭއްވި ބައްދަލުވުމުގައި އެޗްޓީއެސުން ސޫރިޔާގައި ޤާއިމު ކޮށްފައިވާ އިންތިޤާލީ ސަރުކާރުގެ ޚާރިޖީ ވަޒީރު ޢާޛާދު ޙަސަން އަލް-ޝަޔިބާނީ ވެސް ބައިވެރިވިއެވެ. އޭނާ ވެސް ވަނީ ސޫރިޔާގެ އަހުލީހަނގުރާމައާ ގުޅުވައި އަސަދުގެ ސަރުކާރާ ދެކޮޅަށް ހުޅަނގުގެ ބާރުތަކުން އަޅާފައިވާ ދަތި ކުރުމުގެ ފިޔަވަޅުތައް އުވައިލުމަށް ތަކުރާރުކޮށް ގޮވައިލާފައެވެ.
ސޫރިޔާ އާރާސްތު ކުރުމުގައި ޢަރަބީންގެ އިސްނެގުން
އެ ބައްދަލުވުމުގައި ސަޢޫދީ ޢަރަބިއްޔާގެ އިތުރުން މިޞްރާއި، އެކުވެރި ޢަރަބި ޢިމާރާތް (ޔޫއޭއީ)އާއި، ޤަޠަރާއި، ބަޙްރަޔިނާއި، ޢިރާޤާއި، އުރްދުނާއި ލުބްނާންގެ އިތުރުން ތުރުކީވިލާތުގެ ޚާރިޖީ ވަޒީރުން ވެސް ބައިވެރިވެ ވަޑައިގެންނެވިއެވެ. އެ ބައްދަލުވުމުގައި ބައިވެރިވެ ވަޑައިގެންނެވި ހުޅަނގުގެ ޤައުމުތަކުގެ ވެރިންގެ ތެރޭގައި އެމެރިކާގެ ޚާރިޖީ ވުޒާރާގެ އަންޑަރސެކްރެޓަރީ ޖޯން ބޭސާއި، ޖަރުމަނުވިލާތުގެ ޚާރިޖީ ވަޒީރު އަނަލީނާ ބެއަރބޮކްގެ އިތުރުން އިނގިރޭސިވިލާތުގެ ޚާރިޖީ ވަޒީރު ޑޭވިޑް ލާމީ ހިމެނިވަޑައިގަންނަވައެވެ.
ރިޔާޟުގައި ބޭއްވި ބައްދަލުވުމަށް ފަހު ސަޢޫދީ ޢަރަބިއްޔާގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައި ވަނީ، ސޫރިޔާއާ ދެކޮޅަށް އަޅާފައިވާ ފިޔަވަޅުތަކަށް ލުއިދިނުމަކީ، ސޫރިޔާ އަލުން އާރާސްތު ކުރުމަށް ކުރަމުންދާ މަސައްކަތްތަކަށް އެންމެ ފައިދާކުރަނިވި ނިންމުމަށް ވެގެންދާނެ ކަމަށް ޤައުމުތަކުން އެއްބަސްވާ ކަމުގައެވެ. އަދި، ސޫރިޔާގެ އަލް-ޖޫލާންގެ އުސް ބިންތަކުގައި ޒަޔަނިސްޓު އިސްރާއީލުގެ ޔަހޫދީ ފައުޖުން ހިންގަމުންދާ އަސްކަރީ ހަރަކާތްތަކާ މެދު ސަޢުދީ ޢަަރަބިއްޔާގެ ބަޔާނުގައި ކަންބޮޑުވުން ފާޅުކޮށްފައިވެއެވެ.
ސޫރިޔާއާ ދެކޮޅަށް ހުޅަނގުން އަޅާފައިވާ ދަތި ކުރުމުގެ ފިޔަވަޅުތަކާ އެކު، އެ ޤައުމަށް މުދާ އިމްޕޯޓުކޮށް، އަދި އެކްސްޕޯޓު ކުރުމަށް ވެސް އޮތީ ހުރަސް އެޅިފައެވެ. އެއާ އެކު، ސޫރިޔާގައި ތަކެތީގެ އަގުތައް އިންތިހާއަށް އުފުލިފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ބުންޏެވެ. ޚާއްޞަ ގޮތެއްގައި، ކާބޯތަކެއްޗާއި ބޭސްފަރުވާގެ ސާމާނުގެ އަގުތައް އުފުލިފައިވާ ކަން މަސްރަޙު ދިރާސާ ކުރާ ފަރާތްތަކުން ފާހަގަކުރެއެވެ. މީގެ އިތުރުން، ކަރަންޓުގެ ޚިދުމަތް މެދުކެނޑުން ވަނީ ޢާންމުވެފައެވެ.