އިޓަލީގެ ނާޕޮލީއަށް ކުޅެމުން އަންނަ ޖޯޖިއާގެ ހަލުވި ފޯވާޑް ކްވީޗާ ކްވަރަޝްކޭލިއާ ޓީމު ދޫކޮށްދާން އެދިއްޖެކަމަށް ކޯޗު އެންޓޯނިއޯ ކޮންޓޭ ބުނެފި އެވެ.
އިޓަލީގެ މީޑިއާތަކުން ބުނަނީ 26 އަހަރުގެ ކުޅުންތެރިޔާ ދާން ނިންމާފައިވަނީ ބޮޑު މުސާރައަށް ފްރާންސްގެ ޕީއެސްޖީ އަށް ކަމަށެވެ. އޭނާ އަށް މިހާރު ލިބެނީ ހަފުތާއަކު 33000 ޔޫރޯ އެވެ. ނަމަވެސް ޕީއެސްޖީ އަށް ސޮއިކޮށްފިނަމަ ހަފުތާއަކު 150000 ވުރެ ބޮޑު މުސާރައެއް ލިބޭނެ އެވެ.
އޭނާ ގަތުމަށް ޕީއެސްޖީން 80 މިލިއަން ޔޫރޯ ހޭދަކުރަން މިހާރުވަނީ ތައްޔާރުވެފަ އެވެ. ނަމަވެސް މިކަމާ މެދު ފްރާންސްގެ ޗެމްޕިއަން ޓީމުން ރަސްމީކޮށް އެއްވެސް އެއްޗެއް ބުނަން ވަނީ ދެކޮޅުހަދާފަ އެވެ.
އިންޓަމިލާނާއި ޗެލްސީ އަދި ޔުވެންޓަސް އަށް ވެސް ކޯޗުކޮށްދިން ކޮންޓޭ ބުނީ އޭނާ ޓީމާ ހަވާލުވިފަހުން މިވީ ހަ މަސް ދުވަހުގެ ތެރޭގައި ބެލީ ކްވަރަޝްކޭލިއާއަކީ ނަޕޯލީގައި އޭނާ ފެށި ޕްރޮޖެކްޓްގެ ބަތަލުކަމަށެވެ. ނަމަވެސް އެ އުއްމީދުތައް ފުނޑުފުނޑުވީ ކަމަށެވެ.
"އޭނާގެ ކޮންޓްރެކްޓް ޔަގީނުން ވެސް އަހަރުމެން އާކުރާނަން. އެކަމަކު ދެ ފަރާތް އެއްބަސް ކުރުވަން މިހާރު އަހަރެންނަށް ކުރެވޭނެ މާބޮޑު ކަމެއްނެތް. ހުންނަން ބޭނުންނުވާ ކުޅުންތެރިއަކު ބަހައްޓަން އަހަރެންނަށް ބާރެއް ނޭޅޭނެ. މިހާރު އެއޮތް ހުށަހެޅުމާ އެއްގޮތަށް ވިޔަފާރި ނުނިމިއްޖެނަމަ ކުޅުންތެރިޔާ ހީކުރާނީ އަހަރެން އެކަން ހުއްޓުވީއޭ. އެހެންވާކަށް ބޭނުމެއްނޫން،ކޯޗު ކޮންޓޭ
ކްވަރަޝްކޭލިއާގެ ވިދުން ގަދަވެގަތީ ނަޕޯލީން 2022 ވަނަ އަހަރުގެ އިޓާލިއަން ލީގު ކާމިޔާބު ކުރުމުންނެވެ. އެއަށްފަހު އެންމެ ފަހުގެ ޔޫރޯގައި ޖޯޖިއާގައި އޭނާ ދެއްކި ކުޅުމުގެ ސަބަބުންނެވެ. ނަޕޯލީ އަށް ލީގު ޓީމުގައި ތިބި މޮޅު ކުޅުންތެރިންގެ ތެރެއިން ވިކްޓަރ އޮސިމްހެން މިހާރު ވެސް ވަނީ ކުލަބު ދޫކޮށްގޮސްފަ އެވެ.