ވޮލީބޯޅައިގައި ރާއްޖެއަށް އިތުރު ކުރިއެރުން ހޯދޭނީ އިތުރަށް ވަސީލަތްތައް ގާއިމުކޮށް، މިހާރު ހުރި ވަސީލަތްތައް ރަނގަޅުކޮށްގެން ކަމަށް ވޮލީބޯލް އެސޯސިއޭޝަން އޮފް މޯލްޑިވްސްގެ ރައީސް މުޙައްމަދު ލަތީފް ވިދާޅުވެއްޖެއެވެ. ލަތީފް މިހެން ވިދާޅުވީ ޓީވީއެމް އިން ގެނެސްދިން "ހޭޔަންބޯ" ޕްރޮގުރާމުގައި ވާހަކަފުޅުދައްކަވަމުންނެވެ.
ވީއޭއެމްގެ ރައީސް ލަތީފް ވިދާޅުވީ މިހާރު މި ވަގުތަށްވެސް ވޮލީބޯޅައިން ހާސިލުކުރަން ބޭނުންވާ ލަނޑުދަނޑިތަކެއް އެބަހުރި ކަމަށާއި، އޭގެތެރޭގައި އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގެ ފައިނަލް ކުޅުމާއި، އަދި ސާފް ގޭމްސްގައި މެޑެލް ހޯދުމަކީ އެންމެ ބޮޑަށް ހާސިލުކުރަން ބޭނުންވާ ލަނޑުދަނޑިތައް ކަމަށެވެ. އަދި ސަރަހައްދީ ފެންވަރަށް ބަލާއިރު ރާއްޖޭގެ ވޮލީ އޮތީ ވަރަށް ރަނގަޅު ހިސާބެއްގައި ކަމަށާއި، އޮގެތުން ސަހައްދުން ރިހި މެޑެއްޔާއި، ބީޗް ވޮލީބޯޅައިން ރަން މެޑެލް ހޯދުން އެއީ ހާސިލުކުރެވުނު ބޮޑު ކުރިއެރުމެއް ކަމަށް ލަތީފް ވަނީ ވިދާޅުވެފައެވެ.
"ދެން މިހާރު އޮތް ލެވެލްއަށް ވުރެންވެސް ކުރިއަށް އަޅުގަނޑުމެންނަށް ދެވެން އެބައޮތް. އެކަމަކު ދެން އިތުރަށް ކުރިއަށްދެވޭނީ ވޮލީގެ އިންފަރާސްޓްރަކްޗާ ރަނގަޅުވެގެން" ލަތީފް ވިދާޅުވިއެވެ.
މީގެ އިތުރުން ލަތީފް ވަނީ ސަރުކާރުގެ އެހީތެރިކަމާއެކު ވޮލީ އެސޯސިއޭޝަނުން ހާސިލުކުރަން ބޭނުންވާ ލަނޑިދަނޑިތައް ކާމިޔާބުކުރެވޭނެ ކަމަށް ވިދާޅުވެފައެވެ.
ސަރުކާރުގެ އެހީއާއެކު ރާއްޖޭގެ ވޮލީ ކުރިއެރުވުމަށް ވީއޭއެމް އިން ގިނަ މަސައްކަތްތަކެއް ކުރަމުން އަންނައިރު، މިދިޔަ އަހަރު ރާއްޖޭގައި ވަނީ ވޮލީގެ ބައިނަލްއަގުވާމީ ގިނަ މުބާރާތްތަކެއް ބާއްވާފައެވެ. އެގޮތުން ނިމިދިޔަ އަހަރު ރާއްޖޭގައި ބައިނަލްއަގުވާމީ ތިން މުބާރާތެއް ބޭއްވުމަކީ ވޮލީއަށް ލބުނު ބޮޑު ކާމިޔާބެއް ކަމަށް ލަތީފް ވަނީ ފާހަގަކުރައްވާފައެވެ.