އެސްޓޯނިއާގެ ޑިޖިޓަލް އެޑްވައިޒަރީ ކައުންސިލާއެކު ރައީސުލްޖުމްހޫރިއްޔާ މުހިއްމު މަޝްވަރާތަކެއް ބާއްވަވައިފި

އެސްޓޯނިއާގެ ރައީސް ޑރ. އަލަރް ކަރިސް، އެމަނިކުފާނުގެ ޑިޖިޓަލް އެޑްވައިޒަރީ ކައުންސިލާއެކު ބޭއްވެވި ބައްދަލުވުމެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ބައިވެރިވެވަޑައިގެންފިއެވެ.

މި ބައްދަލުވުމުގައި އެސްޓޯނިއާގެ ޑިޖިޓަލް ޓްރާންސްފޮމޭޝަންގެ ދަތުރާއި ގުޅޭގޮތުން މަޝްވަރާކުރެއްވިއެވެ. އަދި ދިވެހިރާއްޖެއަށް އެކަމުން ލިބިދާނެ ފިލާވަޅުތަކާއި ގުޅޭގޮތުން ފުޅާ ދާއިރާއެއްގައި މަޝްވަރާކުރެއްވިއެވެ.

މި ބައްދަލުވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ރާއްޖެއިން ޑިޖިޓަލް ނިޒާމަކަށް ދިއުމަށް އެމަނިކުފާނު ގެންގުޅުއްވާ ތަޞައްވުރު ހިއްސާކުރައްވާފައެވެ. އަދި މި ތަޞައްވުރުގައި ޑިޖިޓަލް ޙައްލުތައް ފަސޭހައިން ލިބެން ހުރުމާއި، ދެމެހެއްޓެނިވި ގޮތެއްގައި އަދި ދިމާވެދާނެ ގޮންޖެހުންތަކަށް ކުރިމަތިލެވޭނެގޮތަށް ޤައުމުގެ މުސްތަޤުބަލު ބައްޓަންކުރުމަށް އަމާޒުކުރައްވާފައިވާކަން އެމަނިކުފާނު ފާހަގަކުރެއްވިއެވެ.

ރާއްޖޭގެ ޑިޖިޓަލް ވަސީލަތްތައް ތަރައްޤީކުރުމަށް ސަރުކާރުން އަހައްމިއްޔަތުކަން ދެއްވާކަމަށާއި، ކުރިއަށް އޮތްތަނުގައި މި ދާއިރާއިން އިތުރު ކުރިއެރުންތަކެއް ހޯދުމަށް މަސައްކަތްކުރައްވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.

މި ބައްދަލުވުމަކީ ދެ ޤައުމުގެ ދެމެދުގައި ޑިޖިޓަލް ދާއިރާގައި އޮތް ގުޅުން އިތުރަށް ބަދަހިކޮށް، ތަޖުރިބާ ހިއްސާކުރުމަށް ލިބުނު މުހިންމު ފުރުޞަތެއްކަން ސަރުކާރުން ފާހަގަކުރައްވައެވެ.

މި ބައްދަލުވުމުގައި ރާއްޖޭގެ ޓެކްނޮލޮޖީއާއިބެހޭ ވަޒީރު ޢަލީ އިޙްސާނާއި ޚާރިޖީ ވަޒީރު ޑރ. ޢަބްދުﷲ ޚަލީލްވެސް ބައިވެރިވެވަޑައިގަތެވެ.

އެސްޓޯނިއާއަކީ ޑިޖިޓަލް ޓެކްނޮލޮޖީގެ ރޮނގުން ދުނިޔޭގެ އެންމެ ކުރިއަރާފައިވާ ޤައުމުތަކުގެ ތެރޭގައި ހިމެނޭ އެއް ޤައުމެވެ. އެޤައުމުގެ ސައްތަ އިންސައްތަ ސަރުކާރުގެ ޚިދުމަތްތައް ދެނީ އޮންލައިންކޮށެވެ.