އިނގިރޭސި ޕްރިމިއަރ ލީގުގައި ރޭ މެންޗެސްޓާ ސިޓީއާ ދެކޮޅަށް ކުޅުނު މެޗުގެ ފަހު ވަގުތުގައި ބްރެންޓްފަޑުން ޖެހި ދެ ލަނޑާއެކު 2-2 ގެ ނަތީޖާއަކުން ދެ ޓީމު އެއްވަރުވެއްޖެއެވެ.
ރަށުން ބޭރުގައި ސިޓީން ކުޅުނު މި މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ކާމިޔާބު ކުރެވިފައިނުވި ނަމަވެސް، ދެވަނަ ހާފުގެ ކުޅުން ފެށުނުތާ 21 ވަނަ މިނިޓުގައި ފިލް ފޯޑެން ވަނީ ލަނޑެއް ޖަހައި ސިޓީއަށް ކުރި ހޯދަދީފަ އެވެ. އަދި މެޗުގެ 78 ވަނަ މިނިޓުގައި ފޯޑެން ވަނީ އިތުރު ލަނޑެއް ޖަހައި ދެ ޓީމުގެ ދެމެދުގައިވާ ފަރަގު ބޮޑުކޮށްފައެވެ.
މި މެޗުގައި ސިޓީއަށް ލިބުނު ހުސް ފުރުސަތުތަކުގެ ބޭނުން އެދެވޭ ގޮތުގައި ނުހިފި ވަނިކޮށް، ބްރެންޓްފަޑުގެ ޔޯން ވިސާ ވަނީ މެޗުގެ ފުރިހަމަ ވަގުތު ހަމަވާން 8 މިނިޓަށް ވެފައިވަނިކޮށް ލަނޑެއް ޖަހައި އެ ޓީމުގެ އުންމީދުތައް އައުކޮށްދީފައެވެ. އަދި މެޗުގެ އިތުރު ވަގުތުގެ ކުޅުމުގައި ކްރިސްޓިއަން ނޯގާޑް ވަނީ އިތުރު ލަނޑެއް ޖަހައި، މެޗުގެ ނަތީޖާ އެއްވަރުކޮށްފައެވެ.
އަދި އޭގެ ތިން މިނިޓް ފަހުން ބެރެންޓްފަޑަށް ވަނީ މެޗުން ތިން ޕޮއިންޓް ހޯދުމަށް ރަނގަޅު ފުރުސަތެއް ލިބިފައެވެ. އެގޮތުން ބްރަޔަން އެމްބެއުމޯއަށް ރަނގަޅު ފުރުސަތެއް ލިބުނު ނަމަވެސް، އޭނާއަށް ލަނޑެއް ކާމިޔާބުކުރެވިފައެއް ނުވެއެވެ.
މި ނަތީޖާއާއެކު ތާވަލުގެ ދިހަވަނައިގައި މިވަގުތު އޮތް ބްރެންޓްފަޑަށް 21 މެޗުން ލިބިފައިވަނީ 28 ޕޮއިންޓެވެ. އަދި އެންމެ ފަހުގެ ޗެމްޕިއަން ސިޓީއަށް 21 މެޗުން 35 ޕޮއިންޓް ލިބިފައިވާއިރު، އެ ޓީމާއި އެއްވަނައިގައި އޮތް ލިވަޕޫލްއާ ދެމެދު 12 ޕޮއިންޓުގެ ފަރަގެއް އެބައޮތެވެ.