އިނގިރޭސި ޕްރިމިއަރ ލީގުގެ އެއްވަނައިގައި އޮތް ލިވަޕޫލްއާ ދެކޮޅަށް ކުޅެ އެއްވަރުކުރުމުން ނޮޓިންހަމް ފޮރެސްޓުގެ ސަޕޯޓަރުން ހިފެހެއްޓުމެއްނެތި ޓީމަށް ތައުރީފު އޮއްސާލައިފިއެވެ.
އަމިއްލަ ދަނޑުގައި ރޭ ކުޅުނު މެޗު 1-1 ގެ ނަތީޖާއަކުން ނިމުމާއެކު ސަޕޯޓަރުން ވަނީ ކުޅުންތެރިންނަށް ވަރަށް ބޮޑަށް ސާބަހާއި ތައުރީފު ކޮށްފައެވެ.
ނޮޓިންހަމަކީ ނިމިދިޔަ ސީޒަނުގައި ކިރިޔަކިރިޔާ ރެލިގޭޓްނުވެ ދިޔަ ޓީމެކެވެ. ނަމަވެސް މި ސީޒަނުގައި އެ ޓީމު މިހާރު އޮތީ ލިވަޕޫލްގެ ފަހަތުން ތާވަލުގެ ދެވަނައިގައެވެ. އެއީ 21 މެޗުން 41 ޕޮއިންޓާއެކުގައެވެ. ލިވަޕޫލް އެއްވަނައި އޮތީ 20 މެޗުން 47 ޕޮއިންޓް ހޯދައިގެންނެވެ.
ނޮޓިންހަމަށް ރޭ ލަނޑު ޖަހައިދިން ކްރިސްވުޑް ބުނީ ތާވަލުގެ އެއްވަނައިގައި އޮތް ލިވަޕޫލާ އެއްވަރުކުރުމުން ޗެމްޕިއަންކަން ހޯދުމުގެ ރޭހުގައި ޓީމު އޮތް ކަމަށް ސަޕޯޓަރުން ދެކޭ ކަމަށެވެ. އަދި މުޅި ސިޓީގައި މިހާރު އޮތީ އުފާފާޅުކުރުން ކަމަށާއި، މި ސީޒަނުގެ ނަތީޖާތަކާމެދު އެންމެންވެސް ވަރަށް ހިތްހަމަޖެހޭ ކަމަށް އޭނާ ވަނީ ބުނެފައެވެ.
"އަހަރުމެންނަށް ޗެމްޕިއަންކަން ލިބިދާނެ ކަމަށް ގަބޫލުކުރާ މީހުން މިހާރު އެބަތިބި. ޚާއްސަކޮށް ލިވަޕޫލްއާ އެއްވަރުކުރުމުން އެ އުއްމީދު އިތުރަށް ބޮޑުވެފައިވަނީ. އެކަމަކު އަހަރެން ދެކޭ ގޮތުގައި ހަގީގަތް ގަބޫލުކުރަންވާނެ. އަހަރުމެން އަދި މިތިބީ އެމީހުންނަށްވުރެ މާދުރުގައި،" ވުޑް ބުންޏެވެ.
ލިވަޕޫލްގެ ކޯޗު އާނޭ ސްލޮޓް ރޭގެ މެޗަށް ފަހު ބުނީ ނަތީޖާ އާއި ކުޅުމާމެދުވެސް އޭނާ ވަރަށް ބޮޑަށް ނުތަނަވަސްވެފައިވާ ކަމަށެވެ.
"އަހަރެން އަބަދުވެސް ކުޅުންތެރިން ގާތުގައި ބުނަން ފަހަތުން އަރައި މޮޅުވާން ޖެހުމުން އެއީ ވަރަށް ބޮޑު ޕްރެޝަރެއް ކަމަށް. މި މެޗުގައި އެކަން ފެނިއްޖެ. މި މެޗުގައިވެސް އެމީހުން އަށްވަނަ މިނެޓުގައި ގޯލު ޖެހުމުން ދެން ކުރަންޖެހުނު މަސައްކަތް ވަރަށް ބޮޑު. އެއީ އެމީހުން ވަރަށް ވަރުގަދައަށް ކުޅުނު. އަދި ބޯޅައާއެކު ގޯލާ ކައިރިވާކަށް ކުޑަކޮށްވެސް ފުރުސަތެއްނުދޭ،" ސްލޮޓް ބުންޏެވެ.
އޭނާ އަދި ބުނީ ތަށި ހޯދުމަށް ލިވަޕޫލުން ނަތީޖާ ރަނގަޅުކުރަންޖެހޭ ކަމަށާއި، ޚާއްސަކޮށް އެއްވަރުވަމުން އަންނަ މެޗުތައް މިހާރު ގިނަވަމުންދާ ދިއުން ހުއްޓުވަން ޖެހޭ ކަމަށެވެ.