އިންޑިއާގެ ގައުމީ ކްރިކެޓް ޓީމުގެ ކުޅުންތެރިންނަށް މުސާރަ ދޭނެ އައު އޮނިގަނޑެއް އެކުލަވާލައި، ކުރިއަށްވުރެ ހަރުކަށި ގަވާއިދުތަކެއް ތައާރަފުކުރަން ނިންމައިފިއެވެ.
ބޯޑް އޮފް ކޮންޓްރޯލް ފޯ ކްރިކެޓް އިން އިންޑިއާ (ބީސީސީއައި) އިން އަލަށް ތައާރަފުކުރި އޮނިގަނޑުގައިވަނީ ކުޅުންތެރިން ވަކިވަކިން ދައްކާ ކުޅުމަށް ބެލުމަށްފަހު މުސާރަ ކަނޑައެޅުމަށެވެ.
މީގެ އިތުރުން ބޯޑުން ވިސްނަމުންދަނީ ކުޅުންތެރިންގެ އާއިލާތަކަށް ޓީމާއެކު ހޭދަކުރެވޭ ވަގުތުވެސް މަދުކުރުމަށެވެ. އެ ގޮތުން ދޮޅު މަސް ދުވަހުގެ މުބާރާތަކަށް ދާނަމަ އަނބިދަރިންނާއި ލޯބިވެރިންނަށް ކުޅުންތެރިންނާއެކު ހޭދަކުރެވޭނީ ގިނަވެގެން ދެ ހަފުތާ ކަމަށް ވަނީ ހުށަހަޅާފައެވެ. އެއަށްވުރެ ކުރު މުބާރާތެއްނަމަ ކުޅުންތެރިންނަށް އެ މީހުންގެ އާއިލާތަކާއެކު ތިބެވޭނީ ގިނަވެގެން ހަފުތާއަކަށެވެ.
މީގެ އިތުރުން ވަކިވަކި ކުޅުންތެރިން، އެ މީހަކު ބޭނުން ގޮތަކަށް ދަތުރުކުރުމުގެ ބަދަލުގައި މުޅި ޓީމު އެކުގައި ދަތުރުކުރުމަށާއި، ޚާއްސަކޮށް ބަހުގައި ކުރަންޖެހޭ ދަތުރުތައް އެކުގައި ކުރުމަށް ވަނީ ނިންމާފައެވެ. އަދި ދަތުރުތަކުގައި ވަކިވަރަކަށްވުރެ ގިނައިން ލަގެޖް ގެންދާނަމަ އެކްސެސް ދައްކަން ޖެހޭނީ އެ ކުޅުންތެރިއަކު އަމިއްލައަށް ކަމަށްވެސް ވަނީ ނިންމާފައެވެ.
މި ބަދަލުތަކާއެކު އެންމެ ބޮޑަށް ފާހަގަވާނީ އިންޑިއާގެ ކޯޗު ގޯތަމް ގަމްބީރުގެ މެނޭޖަރު އަމަލުކުރަންޖެހޭ ގޮތަށެވެ. އައު ބަދަލުތަކުގައިވާ ގޮތުން ކޯޗުގެ މެނޭޖަރު ވީއައިޕީ ބޮކްސްގައި ނުބޭންދޭނެއެވެ. އަދި ކޯޗާއި ޓީމާއެކު މެނޭޖަރަށް ބަހުގައި ދަތުރު ނުކުރެވޭނެއެވެ. އަދި ޓީމާއެކު އެއް ހޮޓަލެއްގައިވެސް މެނޭޖަރަށް ނުހުރެވޭ ގޮތަށް ބަދަލުކުރަން ވަނީ ހުށަހަޅާފައެވެ.
މި ގޮތަށް ނިންމަން ހުށަހެޅީ އިންޑިއާ އެންމެ ފަހުން ކުޅުނު "ބޯޑާ ގަވަޝްކަރް ޓްރޮފީ" މުބާރާތުގައި ނެރުނު ގޯސް ނަތީޖާތަކުގެ ސަބަބުންނެވެ. މި ބަދަލުތައް ގެނައުމަށް ފާސްކުރި ބައްދަލުވުމުގައި ޓީމުގެ ކެޕްޓަން ރޯހިތު ޝަރުމާ އާއި، ހެޑް ކޯޗު ގަމްބީރާއ، ޗީފް ސެލެކްޓަރ އަޖިތު އަރަގްކަރްވެސް ވަނީ ބައިވެރިވެފައެވެ.
އިންޑިއާއިން މިހާރު ތައްޔާރުވަމުން ދަނީ އަންނަ ފެބްރުއަރީ މަހު ޕާކިސްތާނުގައި ފަށާ ޗެމްޕިއަންސް ޓްރޮފީ މުބާރާތަށެވެ. އެ މުބާރާތުގައި އިންޑިއާގެ މެޗުތައް ކުޅޭނީ ދުބާއީގައެވެ. އެއީ ސިޔާސީ ކޯޅުންތަކުގައި ޕާކިސްތާނަށް ދާން އިންޑިއާ ސަރުކާރުން ހުއްދަ ނުދޭތީއެވެ.