އިންޑިޔާ ކަނޑަށް އަތްގަދަކުރަން ވަރުގަދަ ވާދަވެރިކަމެއް އޮތް ކަމަށް އިންޑިޔާއިން ބުނެފި

އިންޑިޔާގެ ކަނޑުގެ ސަރަޙައްދަށް އަތްގަދަކުރަން ބާރުގަދަ ޤައުމުތަކުގެ މެދުގައި ވަރުގަދަ ވާދަވެރިވެރި ކަމެއް އެބައޮތް ކަމަށް ވިދާޅުވެ، އިންޑިޔާއިން އެންމެ އިސްކަމެއް ދީފައި ވަނީ ކަނޑުގެ ސިފައިންގެ ޤާބިލުކަން އެ ސަރަޙައްދުގައި އިތުރުކުރުން ކަމަށް، އެ ޤައުމުގެ ދިފާޢީ ވަޒީރު ރާޖުނާތު ސިންގ ހާމަކުރައްވައިފިއެވެ. ވަކި ޤައުމެއްގެ ނަން ސިންގ ވިދާޅުނުވި ނަމަވެސް، 370 އަސްކަރީ މަނަވަރާއެކު ދުނިޔޭގެ އެންމެ ބާރުގަދަ ކަނޑުގެ ސިފައިންގެ ފައުޖު އޮންނަ ޗައިނާގެ ޙަރަކާތްތަކަށް އިންޑިޔާއިން ފާރަވެރިވާ ކަމަށް މަސްރަޙް ދިރާސާކުރާ ފަރާތްތަކުން ބުނެއެވެ.

ހިމާލަޔާ ފަރުބަދަ ސަރަޙައްދުގައި ޗައިނާއާއި އިންޑިޔާ ސިފައިންނާ ދެމެދު 2020ވަނަ އަހަރުގެ ތެރޭގައި ހިނގި ކުރިމަތިލުންތަކުގައި އިންޑިޔާގެ 24 ސިފައިން މަރުވުމުން ދެ ޤައުމުގެ ގުޅުން އަދިވެސް އޮތީ ނުތަނަވަސްކަމެއްގެ ތެރޭގައެވެ. އަދި އެމެރިކާއާއި އިނގިރޭސިވިލާތުން އިންޑިޔާ ކަނޑުގައި އޮންނަ ފޯޅަވަހީގައި ހިންގާ އަސްކަރީ މަރުކަޒަކީ ވެސް އިންޑިޔާގެ ހިތްހަމަނުޖެހުން އޮތް ކަމެކެވެ.

"އިންޑިޔާ ކަނޑުގެ ސަރަޙައްދަކީ ކަނޑު މަގުން މުދާ އުފުލުމުގައި ދުނިޔޭގެ ވިޔަފާރީގެ މައި މަގެއް. އެހެންވީމާ، ސަރަޙައްދީ ގޮތުން މިއީ ވަރަށް މުޙިންމު ސަރަޙައްދަކަށް ވާތީ، މި ތަނަށް އަތްގަދަކުރުމުގެ ބައިނަލްއަޤުވާމީ ވަރުގަދަ ވާދަވެރިކަމެއް ދަނީ އުފެދެމުން،" އިންޑިޔާ ކަނޑުގެ ސިފައިންގެ ޚިދުމަތަށް ސަބްމެރިންއަކާއި ދެ އަސްކަރީ މަނަވަރު އިފްތިތާޙް ކުރުމުގެ ރަސްމިއްޔާތުގައި ސިންގ ވިދާޅުވިއެވެ.

އޭނާ ވިދާޅުވި ގޮތުގައި، އިންޑިޔާއިން ބޭރުގެ އެކި ޤައުމުތަކަށް ބޭރު ކުރާ މުދަލުގެ 95 އިންސައްތަ ދަތުރުކުރަނީ އިންޑިޔާ ކަނޑުގެ ސަރަޙައްދުންނެވެ. "މިފަދަ ޙާލަތެއްގައި، ކަނޑުގެ ސިފައިންގެ ބާރު ވަރުގަދަވުމަކީ އަޅުގަނޑުމެންނަށް އެންމެ މުޙިންމު ކަންތައް،" ސިންގ ވިދާޅުވިއެވެ.

އިންޑިޔާއިން ވަނީ 2030 ވަނަ އަހަރާ ހަމައަށް ކަނޑުގެ ސިފައިންގެ ޤާބިލުކަން 175 އަސްކަރީ މަނަވަރަށް އިތުރުކުރުމަށް އަމާޒު ހިފައިފައެވެ. އެ މަނަވަރުތައް ބަނުމަށް އިންޑިޔާގައި އުފައްދާ ތަކެއްޗާއި އާލަތްތަކަށް ޙާއްޞަ އިސްކަމެއް ވަނީ ދީފައެވެ. ނަމަވެސް، ޗައިނާއާ ބަލާއިރު، މި ފަދަ ޤާބިލުކަން ކުޑަވުމުގެ ސަބަބުން، އިންޑިޔާއަށް އަހަރަކު ބަނދެވެނީ ހަތަރު މަނަވަރެވެ. އޭގެ ބަދަލުގައި، ޗައިނާއިން އަހަރަކު 14 އަސްކަރީ މަނަވަރު ބަނދެ، ޚިދުމަތަށް ނެރޭ ކަމަށް މަސްރަޙް ދިރާސާކުރާ ފަރާތްތަކުން ބުނެއެވެ.