ޕާކިސްތާނުން އަމިއްލަ ގައުމުގައި ކުޅޭއިރު، އެ ޓީމު ބަލިކުރަން އަބަދުވެސް އުނދަގޫވާނެ ކަމަށް ވެސްޓް އިންޑީޒްގެ ކެޕްޓަން ކްރައިގް ބްރަތުވެއިޓް ބުނެފިއެވެ.
ޕާކިސްތާނާއެކު ކުޅޭ ޓެސްޓް ކްރިކެޓްގެ ދެ މެޗަށް އެ ގައުމަށް މިހާރު ގޮސް ތިބި ވެސްޓް އިންޑީޒްގެ ކުޅުންތެރިންނަށް އެންމެ އުނދަގޫވާނީ ޕާކިސްތާނުގެ ދަނޑުތަކަށް ފަރިތަނުވުން ކަމަށް ކެޕްޓަން ބުންޏެވެ.
"ޕާކިސްތާނަކީ އަބަދުވެސް ބަލިކުރަން އުނދަގޫ ޓީމެއް. ދެން މިއީ ހުދު އަހަރެންވެސް ޕާކިސްތާނަށް އައި ފުރަތަމަ ފަހަރު. އެހެންވީމާ ދަނޑުތަކުގެ ހާލަތާއި ފެންވަރެއް ނޭނގެ. މީގެ ސަބަބުން އަމިއްލަ ގައުމުގައި ކުޅޭއިރު ޕާކިސްތާން ބަލިކުރަން އުނދަގޫވާނެ،" ކްރައިގް ބުންޏެވެ.
މާދަމާ ފަށާ ޓެސްޓް ސީރީސް އަށްފަހު ވެސްޓް އިންޑީޒް ނިންމާފައިވަނީ ޕާކިސްތާނުގެ ބައެއް ކުލަބުތަކާއެކު ޕްރެކްޓިސް މެޗުތަކެއް ކުޅުމަށެވެ.
"އަހަރުމެން މި ތިބީ ވަރަށް އުފަލުން. އެއީ ޕާކިސްތާނަށް އާދެވެމުން. މި ޓީމުގެ ވަރަށް ގިނަ ކުޅުންތެރިންނަށް މިއީ މުޅިން އައު މާހައުލެއް. ޕާކިސްތާނަކީ އަމިއްލަ ގައުމުގައި އަބަދުވެސް ވަރަށް ވަރުގަދަ ގައުމެއް،" ކަރައިގް ބުންޏެވެ.
އޭނާ ބުނީ ޓީމުގެ ތައްޔާރުވުންތައް ރަނގަޅު ކަމަށާއި، ޕާކިސްތާނުގެ އިންތިޒާމުތަކާ މެދުވެސް ހިތްހަމަޖެހޭ ކަމަށެވެ.
ޕާކިސްތާން މިހާރު ތައްޔާރުވަމުން ދަނީ އަންނަ ފެބްރުއަރީ މަހު އެ ގައުމުގައި ފަށާ ޗެމްޕިއަންސް ޓްރޮފީ ކްރިކެޓް މުބާރާތަށެވެ.