ކަނޑަށް ތެޔޮ އެޅިއްޖެ ހާލަތެއްގައި އަމަލުކުރާނެގޮތުގެ ތަމްރީނު ޕްރޮގްރާމެއް ބާއްވައިފި

ކަނޑަށް ތެޔޮ އެޅިއްޖެ ހާލަތެއްގައި އަމަލުކުރާގެގޮތުގެ ތަމްރީން ޕްރޮގްރާމެއް ބާއްވައިފިއެވެ.

އޯޝަން ކަންޓްރީ ޕާޓްނަރޝިޕް ޕްރޮގްރާމް (އޯސީޕީޕީ) އިން ފަންޑުކޮށްގެން ކުރިއަށްގެންދިޔަ އޮއިލް ސްޕިލް އިމަޖެންސީ ރެސްޕޮންސް ޓްރެއިނިންގ ޕްރޮގްރާމް ނިމުމުގެ ރަސްމިއްޔާތު ބާއްވާފައިވަނީ ހުޅުމާލޭ މިނީ ސްޕޯޓްސް ކޮމްޕްލެކްސްގައެވެ. މި ރަސްމިއްޔާތު ޝަރަފުވެރިކޮށްދެއްވީ، އެމްއެންޑީއެފް ކޯސްޓްގާޑްގެ ކޮމަޑާންޓް، ބްރިގޭޑިއަރ ޖެނެރަލް މުޙައްމަދު ސަލީމްއެވެ.

އެމްއެންޑީއެފްގެ މެރިޓައިމް ޕޮލިއުޝަން ރެސްޕޮންސްގެ ޤާބިލުކަން އިތުރަށް ފުޅާކުރުމަށް މަގުފަހިކޮށްދޭ މި ޕްރޮގްރާމަކީ ޔޫކޭ ސަރުކާރުގެ ޑިޕާޓްމަންޓް އޮފް އެންވަޔަރަމަންޓް، ފުޑް އެންޑް ރޫރަލް އެފެއަރޒް، އަދި ދިވެހިރާއްޖޭގައި ހުންނަ ބްރިޓިޝް ހައިކޮމިޝަންގެ އެހީތެރިކަމާ އެކު ކުރިއަށް ގެންދިޔަ ތަމްރީނު ޕްރޮގްރާމެކެވެ.

މިމަހުގެ 5 އިން 16އަށް ކުރިއަށްގެންދިޔަ މި ތަމްރީނު ޕްރޮގްރާމުގައި އެމްއެންޑީއެފްގެ ހުރިހާ އޭރިއާ ކޮމާންޑްތަކަށް ނިސްބަތްވާހެން އެމްއެންޑީއެފް ކޯސްޓްގާޑުގެ 17 ސެއިލަރުންނާއި، ސްރީލަންކާ ކޯސްޓްގާޑުގެ 10 އޮފިސަރުންނާއި، އެންވަޔަރަމަންޓަލް ޕްރޮޓެކްޝަން އޭޖެންސީން 3 މުވައްޒަފުންނާއި، އެންވަޔަރަމަންޓް މިނިސްޓްރީން 2 މުވައްޒަފަކު ވަނީ ބައިވެރިވެފައެވެ.

މި ރަސްމިއްޔާތުގައި ވާހަކަދައްކަވަމުން އެމްއެންޑީއެފް ކޯސްޓްގާޑްގެ ކޮމަޑާންޓް، ބްރިގޭޑިއަރ ޖެނެރަލް މުޙައްމަދު ސަލީމް ވިދާޅުވީ ރާއްޖެއާއި ރާއްޖެ ކައިރީ ގައުމުތަކުގައި ކަނޑަށް ތެޔޮ އެޅުމުގެ ހަދިސާ ހިނގާފައިވާ ކަަމަށެވެ. އެގޮތުން މި ފަދަ ހާދިސާތަކަށް ދުރާލާ ތައްޔާރުވުމަކީ މުހިންމު ކަމެއްކަމަަށް އޭނާ ވިދާޅުވިއެވެ.

މުޙައްމަދު ސަލީމް ވިދާޅުވީ މި ހާދިސާތަކަށް ހޭލުންތެރިކަން އިތުރުކޮށް ޕްރޮގްރާމްތައް ހިނގުން މުހިންމުކަމަށެވެ. އެގޮތުން ރާއްޖޭގެ ނާޒުކު ތިމާވެށި ރައްކާތެރިކުރުމަށް މި ފަދަ ތަމްރީނު ޕްރޮގްރާމްތައް ހިނގުމަކީ މުހިންމު ކަމެއްކަމަށްވެސް ސަލީމް ވިދާޅުވިއެވެ.

"މި ފަދަ ހާދިސާތައް ގިނައިން ހިނގާފައި އެބަހުރި. އެހެންވީމައި ރާއްޖޭގެ ތިމާވެށި ރައްކާތެރިކުރުމަށް މިކަހަލަ ތަމްރީނުތައް ވަރަށް ބޭނުންތެރި،" އެމްއެންޑީއެފް ކޯސްޓްގާޑްގެ ކޮމަޑާންޓް، ބްރިގޭޑިއަރ ޖެނެރަލް މުޙައްމަދު ސަލީމް ވިދާޅުވިއެވެ.

މި ޕްރޮގްރާމުގައި، އިންޓަނޭޝަނަލް މެރިޓައިމް އޯގަނައިޒޭޝަން ލެވެލް 1، 2، 3 އާއި، އިންސިޑެންޓް ކޮމާންޑް ސިސްޓަމް 100، 200، 300 އާއި، އޭރިއަލް ސަރވައިލަންސްއާއި، ޝޯރލައިން ކްލީންއަޕް އެސެސްމަންޓް ޓެކްނިކުގެ ބައިތައް ވަނީ ކިޔައިދީފައެވެ. މި ޕްރޮގްރާމް ފުރިހަމަ ކުރި ފަރާތްތަކަަށް ވަނީ ސެޓިފިކެޓް ހަވާލުކޮށްފައެވެ.

މި ޕްރޮގްރާމް ނިމުމުގެ ރަސްމިއްޔާތުގައި އެންވަޔަރަންމެންޓް ޕްރޮޓެކްޝަން އެޖެންސީ (އީޕީއޭ) ގެ ޑައިރެކްޓަރ، އިބްރާހީމް ނަޢީމްއާއި، ޑިޕާޓްމަންޓް އޮފް އިންޓަނޭޝަނަލް ޑިފެންސް ކޯޕަރޭޝަން އެންޑް ޕޮލިސީ، ބްރިގޭޑިއަރ ޖެނެރަލް ޑރ. ޙުސައިން އިބްރާހީމްގެ އިތުރުން ކޯސްޓްގާޑްގެ ޕްރިންސިޕަލް ޑައިރެކްޓަރ، ކާނަލް މުޙައްމަދު ރިޒްމީ ވަލީދު ވެސް ވަނީ ބައިވެރިވެފައެވެ.