ބެލްޖިއަމްގެ ގައުމީ ފުޓްބޯޅަ ޓީމުގެ ކޯޗު ޑޮމެނިކޯ ޓަޑެސްކޯ މަގާމުން ވަކިކޮށްފިއެވެ.
2023 ވަނަ އަހަރު ޓީމާ ހަވާލުވި އިޓަލީގެ ކޯޗު މަގާމުން ވަކިކުރިއިރު އެއްވަނަ ކީޕަރު، ރެއާލް މެޑްރިޑްގެ ތިބައޫ ކޯޓުއާ ވަނީ އޭނާގެ ކޯޗުކަމުގައި ހުއްޓައި ގައުމީ ޓީމަށް ނުކުޅެން މާކުރިން ނިންމައިފަ އެވެ. މިދިޔަ އަހަރުގެ ޖޫން މަހު ބޭއްވި ޔޫރޯ ފުޓްބޯޅަ މުބާރާތުގައި ކޯޓުއާ ނުކުޅުނީ ވެސް މިހެންވެ އެވެ. ކޯޗާއި އޭނާއާ މައްސަލަ ޖެހުނު ސަބަބެއް ނޭނގެ އެވެ. ނަމަވެސް ބައެއް މީޑިއާތަކުން ބުނަނީ ޓީމުގެ ކެޕްޓަންކަން ކޯޓުއާ އަށް ނުދީ ކެވިން ޑެބްރޫނޭ އަށް ދިނުމުން މައްސަލަ ގޯސްވީ ކަމަށެވެ.
ބެލްޖިއަމްގެ ކޯޗުކަމުން އުމުރުން 39 އަހަރުގެ ޓަޑެސްކޯ ވަކިކުރީ 2026 ވަނަ އަހަރުގެ ވޯލްޑްކަޕް ނިމެންދެން ގައުމީ ކޯޗުކަމުގައި އޭނާ ބަހައްޓަން ނިންމައި އެގްރީމަންޓް އާކުރިތާ ދެ މަސް ދުވަސް ފަހުންނެވެ.
އޭނާގެ ކޯޗުކަމުގައި ނަތީޖާތައް މާ ރަނގަޅެއްނޫނެވެ. ޔޫރޯގެ ދެ ވަނަ ބުރުން ކެޓީ އެވެ. އެއަށްވުރެ ބޮޑަށް ފާޑުކިއުން އަމާޒުވާން ފެށީ ނޭޝަންސް ލީގުގައި ސެޕްޓެމްބަރު މަހު ފްރާންސް އަތުން ބަލިވުމުންނެވެ. މި މެޗަށް ފަހު ޓީމުގެ ކެޕްޓަން މެންޗެސްޓާ ސިޓީގެ ކެވިން ޑެބްރޫނޭ ވެސް ވަނީ ކޯޗަށް ފާޑުކިއުން އަމާޒުވާގޮތަށް ވާހަކަ ދައްކައިފަ އެވެ.
ބެލްޖިއަމްގެ ފުޓްބޯޅަ ފެޑަރޭޝަނުގެ ސީއީއޯ ޕީޓާ ވިލެމްސް ވިދާޅުވީ ޓަޑެސްކޯގެ ކޯޗުކަމުގައި އެންމެ ފުރަތަމަ ދުވަސްކޮޅު ނަތީޖާތައް ނުކުތީ ވަރަށް ރަނގަޅަށް ކަމަށެވެ. ނަމަވެސް ފަހުން ކަންކަން ބަދަލުވެދިޔައީ ކަމަށާއި ޓަޑެސްކޯ ކޮށްދިން މަސައްކަތަކަށް އޭނާ އަށް ޝުކުރުވެރިވާ ކަމަށެވެ.
ބެލްޖިއަމް ދެން އެންމެ އަވަހަށް ކުޅެން ޖެހޭނީ ނޭޝަންސް ލީގުގެ ޕްލޭއޯފްގައި މާޗު މަހުގެ 20 އާއި 23 ވަނަ ދުވަހު އެވެ. މި މެޗުގައި ޓީމަށް އިރުޝާދިނުން އެންމެ ގާތް އެއް ކޯޗަކީ ސްކޮޓްލޭންޑްގެ ރޭންޖާސްގެ ކޯޗު ޕިލިޕް ކްލެމެންޓް އެވެ.