މާފަރު އެއަރޕޯޓަށް މިދިޔަމަހު 98 ޖެޓް

މިދިޔަމަހު މާފަރު އިންޓަނޭޝަނަލް އެއާޕޯޓަށް 98 ޖެޓް ޖެއްސިކަމަށް އެ އެއާޕޯޓު ހިންގަމުން އަންނަ އައިލެންޑް އޭވިއޭޝަން ސާވިސަސް ލިމިޓެޑުން ވިދާޅުވެއްޖެއެވެ.

މާފަރު އެއަރޕޯޓުގެ ރަންވޭ ފުޅާކުރުމުގެ މަސައްކަތް ކުރުމަށް މިދިޔަ ޖޫން މަހުން ފެށިގެން ސެޕްޓެންބަރު މަހަށް އެ އެއާޕޯޓު ބަންދުކުރިއެވެ. އަދި އެ މަސައްކަތަށްފަހު ބައިނަލްއަޤްވާމީ ދަތުރުތަކަށް މިދިޔަ އޮކްޓޫބަރު މަހު ވަނީ ހުޅުވާލާފައެވެ.

އައިލޭންޑް އޭވިއޭޝަނުން ވިދާޅުވީ ބައިނަލްއަޤްވާމީ ދަތުރުތަކަށް އަލުން ހުޅުވާލުމުން އަހަރު ނިންމާލާފައިވަނީ ފާހަގަކުރެވޭ ވަރުގެ ކުރިއެރުންތަކަކާއެކުކަމަށެވެ. އެގޮތުން މިދިޔަމަހު އެ އެއާޕޯޓަށް 98 ޕްރައިވެޓް ޖެޓް ޖައްސާފައިވާކަމަށް އެ ކުންފުނިން ވިދާޅުވެއެވެ.

އައިލޭންޑް އޭވިއޭޝަނުން ވިދާޅުވީ ޗުއްޓީ ދަތުރުތައް ފެށުމުގެ ކުރިން ރަންވޭ ފުޅާކުރުމުގެ މަޝްރޫއު ނިންމާލެވުމުން، އެއާޕޯޓުން ދޭ ހިދުމަތްތައް އިތުރަށް ފުޅާވެގެން ގޮސްފައިވާ ކަމަށެވެ.

އައިއޭއެސްގެ ޖެނެރަލް މެނޭޖަރު މުމްތާޒު އަލީ ވިދާޅުވީ ލިބިފައިވާ ކުރިއެރުންތަކަކީ އާ ގޮތްތަކާއި ފެންވަރު ރަނގަޅު ހިދުމަތްތަކެއް ދިނުމަށް އެއާޕޯޓުގެ މުވައްޒަފުން ކުރާ މަސައްކަތުގެ ނަތީޖާކަމަށެވެ. އަދި އަހަރީ މަސައްކަތްތަކާއި ޑިސެންބަރުމަހުގެ ތަފާސް ހިސާބުތަކުން ފެނިގެންދަނީ ވައިގެ ދަތުރުފަތުރުގެ މަރުކަޒެއްގެ ގޮތުގައި އެ އެއާޕޯޓުގެ މަގާމު އިތުރަށް ވަރުގަދަވަމުންދާ މަންޒަރު ކަމަށް އޭނާ ވިދާޅުވިއެވެ.

"އަޅުގަނޑުމެން ވާނީ އިތުރު ހިދުމަތްތަކެއް ތައާރަފުކޮށްފައި. އޭގެ ތެރޭގައި އެއްގަމުގެ ދަތުރުފަތުރުގެ ހިދުމަތްތައް ހިމެނޭ. އަދި މިހާރު އެޕްރަންގެ މަސައްކަތްތައް ކުރިއަށްދަނީ. އަޅުގަނޑުމެންގެ ފަސިންޖަރުންގެ ބޭނުންތައް އިތުރަށް ފުރިހަމަ ކުރުމަށް ޓަކައި އަޅުގަނޑުމެންގެ އެއާޕޯޓު ވަނީ ފުޅާ ދާއިރާއެއްގައި ބަދަލުތަކެއް ގެނައުމަށް ތައްޔާރުވެފައި" އައިއޭއެސްގެ ޖެނެރަލް މެނޭޖަރު މުމްތާޒު އަލީ ވިދާޅުވިއެވެ.

މަތީފަންތީގެ ގިނަ ރިސޯޓުތަކެއް ނ، ރ އަދި ބ އަތޮޅުގައި ހިންގަމުންދާއިރު، އެ ރިސޯޓުތަކަށް ޖެޓުތަކުގައި ރާއްޖެއަށް އަންނަ ފަތުރުވެރިން ބޭނުންކުރަނީ މާފަރު އިންޓަރނޭޝަނަލް އެއަރޕޯޓެކެވެ.

މާފަރު އެއަރޕޯޓު އިތުރަށް ތަރައްޤީކުރުމުގެ މަސައްކަތުގެ ދަށުން ރަންވޭއަށް 650 މީޓަރު އިތުރުކޮށް، ރަންވޭގެ ދިގުމިން 2800 މީޓަރަށް ވަނީ ބޮޑުކޮށްފައެވެ. މިއާއެކު ބައިނަލްއަޤްވާމީ އުދުހުންތަކުގައި ބޭނުންކުރާ ބޮއިންގ 777 މަރުކާގެ މަތިންދާބޯޓުތަކަށްވެސް ރަންވޭއަށް ޖެއްސޭނެއެވެ.