40 އަހަރަށް ފަހު އެމެރިކާގެ ރައީސް ހުވައިކުރެއްވުމުގެ ރަސްމިއްޔާތު ބޭރުގައި ނުބާއްވަން ނިންމައިފި

ގަދަފިނީގެ ސަބަބުން އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް މަޤާމުގެ ހުވައި ކުރެއްވުމުގެ ރަސްމިއްޔާތު އެމެރިކާގެ ޤާނޫނުހަދާ މަޖިލިސް ކެޕިޓަލް ބިލްޑިންގގެ އެތެރޭގައި ބާއްވަން ނިންމައިފިއެވެ.

ޓްރަމްޕް ވިދާޅުވީ، ފިނިގަދަވުމުގެ ސަބަބުން އެއްވެސް މީހަކަށް ގެއްލުމެއް ލިބެން ބޭނުން ނުވާ ކަމަށެވެ. "އެހެންކަމުން، ހުވައި ކުރުމުގެ ރަސްމިއްޔާތާއި ބަޔާން އިއްވުމާއި އެހެނިހެން ޙަރަކާތްތައް، ކެޕިޓަލް ބިލްޑިންގގެ އެތެރެއަށް ބަދަލުކުރުމަށް އަޅުގަނޑު ވާނީ އަންގާފައި،" ޓްރަމްޕް ވިދާޅުވިއެވެ.

މިއީ ފާއިތުވި 40 އަހަރުގެ ތެރޭގައި އެމެރިކާގެ ރައީސަކު ހުވައި ކުރެއްވުމުގެ ރަސްމިއްޔާތު، މަޖިލީހުގެ އިމާރާތުގެ އެތެރޭގައި ބާއްވާ ފުރަތަމަ ފަހަރެވެ. 1985 ވަނަ އަހަރު، ރޮނަލްޑް ރޭގަން ހުވައި ކުރެއްވުމުގެ ރަސްމިއްޔާތު ކެޕިޓަލް ބިލްޑިންގގެ އެތެރޭގައި ބާއްވަން ޖެހުނީ ވެސް ފިނަގަދަވުމުގެ ސަބަބުންނެވެ.

އަންނަ ހޯމަ ދުވަހު ޓްރަމްޕް ހުވައި ކުރެއްވުމުގެ ރަސްމިއްޔާތު ބާއްވާ ގަޑީގައި، ފިނިހޫނުމިން މައިނަސް 7 ޑިގްރީސް ސެލްސިޔަސްގައި ހުންނާނެ ކަމަށް ވަނީ ލަފާކޮށްފައެވެ. ޓްރަމްޕް ވިދާޅުވެފައިވާ ގޮތުގައި، އެ ރަސްމިއްޔާތު ކުރިއަށްދާ ވަގުތު، ކެޕިޓަލް ބިލްޑިންގއާ އިންވެގެން އޮންނަ ކެޕިޓަލް ވަން އެރީނާގައި ބޮޑެތި ސްކްރީންތައް ބަހައްޓައި އެ ތަނުގައި ރަސްމިއްޔާތު ބެލުމުގެ އިންތިޒާމް ވަނީ ހަމަޖައްސައިފައެވެ. އަދި ހުވައި ކުރެއްވުމަށްފަހު ބޭންޑާއި ޕެރޭޑުގެ ޙަރަކާތް ވެސް މި ފަހަރު އޮންނާނީ އެ އެރީނާގައި ކަމަށް ޓްރަމްޕް ވިދާޅުވިއެވެ.

ޓްރަމްޕް ހުވައި ކުރެއްވުމުގެ ރަސްމިއްޔާތު މަޖިލީހުގެ އިމާރާތުގެ އެތެރޭގައި ބާއްވާތީ ރަސްމިއްޔާތު ބަލަން ޖަމަވާ މީހުންގެ ޢަދަދު ކުރީގެ ރަސްމިއްޔާތުތަކާ އަޅައި ކިޔުމުގެ ފުރުޞަތެއް މި ފަހަރު ނުލިބޭނެއެވެ. 2017 ވަނަ އަހަރު، ޓްރަމްޕްގެ ހުވައި ކުރެއްވުމުގެ ރަސްމިއްޔާތުގައި ބައިވެރިވި މީހުންގެ ޢަދަދު، ކުރީގެ ރައީސް ބަރެކް އޮބާމާ ހުވައި ކުރެއްވި ތަން ބަލަން ޖަމާވި މީހުންނަށްވުރެ މަދު ކަމަށް ބައެއް މީޑިޔާތަކުން ބުނުމުން، ޓްރަމްޕް ވަނީ ވަރަށް ބޮޑަށް ނުރުހުން ފާޅުކުރައްވައިފައެވެ.