އާޓިފިޝަލް ބީޗުގައި މާރާމާރީ ހިންގި 3 ބިދޭސީއެއް ޑިޕޯޓުކުރަން ނިންމައިފި
-
އެމީހުން ވަނީ ފުލުހުންގެ ބެލުމުގެ ދަށުން އިމިގްރޭޝަނާއި ހަވާލުކޮށްފައި
-
އިމިގްރޭޝަނުން ވަނީ މިފަދަ ޢަމަލުތައް ހިންގާ ފަރާތްތަކަށް އިތުރު ފުރުސަތެއް ނުދޭނެ ކަމަށް ވިދާޅުވެފައި
އާޓިފިޝަލް ބީޗުގައި ހުކުރު ދުވަހު ރޭ ބިދޭސީންތަކެއް ހިންގި މާރާމާރީއާއި ގުޅިގެން، މާރާމީރީގައި ޝާމިލްވި މީހުން ޑިޕޯޓްކުރުމުގެ މަސައްކަތް ކުރަމުންދާ ކަމަށް މޯލްޑިވްސް އިމިގްރޭޝަނުން ހާމަކޮށްފިއެވެ.
މިމައްސަލައާއި ގުޅިގެން ފުލުހުން ވިދާޅުވީ، މިމައްސަލަ ފުލުހުންނަށް ރިޕޯޓްކޮށްފައިވަނީ ހުކުރު ދުވަހު 20:30 ހާއިރު ކަމަށެވެ. އަދި މިމާރާމާރީ ހިނގިއިރު އެ މަންޒަރު ރެކޯޑު ކުރި ދިވެއްސަކާއިވެސް މާރާމާރީ ހިނގި ކަމަށް ފުލުހުން ވަނީ ވިދާޅުވެފައެވެ. މިމައްސައިގައި ހިމެނޭ މީހުން ފުލުހުންގެ ބެލުމުގެ ދަށަށް ވަނީ ގެންގޮސްފައެވެ.
އިއްޔެ (17/01/25) ގައި އާޓިފިޝަލް ބީޗު ސަރަހައްދުގައި ބިދޭސީންތަކެއްގެ މެދުގައި ހިނގި މާރާމާރީއަކާއި ގުޅިގެން ފުލުހުން ވަނީ 03 ބިދޭސީއަކު އިމިގްރޭޝަނާއި ހަވާލުކޮށްފައި. އަދި މި އެންމެން ވެސް ޑީޕޯޓުކުރުމުގެ މަސައްކަތް މިހާރު މިދަނީ ކުރަމުން. އާންމު މަސްލަހަތަށް ނުރައްކާވާ…
— Mohamed Shamaan Waheed (@ShamaanW) January 18, 2025
ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަހީދު މީސްމިޑީއާގައި ކުރެއްވި ޕޯސްޓެއްގައި ވިދާޅުވީ، ހުކުރު ދުވަހު އާޓިފިޝަލް ބީޗުގައި ބިދޭސީންތަކެއް ހިންގި މާރާމާރީއާއި ގުޅިގެން ފުލުހުން ތިން ބިދޭސީއަކު ހޯދާފައިވާ ކަމަށެވެ. އަދި މިހާރު އެމީހުން އިމިގްރޭޝަނާއި ހަވާލުކޮށްފައިވާއިރު، އެމީހުން ޑިޕޯޓްކުރުމުގެ މަސައްކަތް ކުރަމުންދާ ކަމަށް އޭނާ ވިދާޅުވިއެވެ. ޝަމްޢާން ވަނީ މިފަދަ ޢަމަލުތައް ހިންގާ ބިދޭސީންނަށް އިތުރު ފުރުސަތެއް ނުދޭނެކަމަށް ވިދާޅުވެފައެވެ.
މާރާމާރީ ހިންގުމުން 3 ބިދޭސީން ޑިޕޯޓްކުރުމުގެ މަސައްކަތް އިމިގްރޭޝަނުން ކުރަމުންދާއިރު، މިދިޔަ އަހަރު ޑިސެމްބަރުމަހުގެ ކުރީކޮޅުވެސް އާޓިފިޝަލް ބީޗުގައި ބިދޭސީންތަކެއް ވަނީ މާރާމާރީ ހިންގާފައެވެ. އެފަހަރުވެސް އެކަމުގައި އިސްކޮށް ހުރި ބިދޭސީ މީހާ ވަނީ ޑިޕޯޓްކޮށްލާފައެވެ.