ޔަހޫދީ ދައުލަތާއި ޣައްޒާގައި ވެރިކަންކުރާ ޙަމާސާ ދެމެދު ވެފައިވާ ޢުދުވާން ހުއްޓައިލުމުގެ އެއްބަސްވުމުގެ ދަށުން ޙަމާސުން ރަހީނު ކޮށްފައިވާ އަސީރުންގެ ތެރެއިން ތިން މީހުން މިނިވަން ކޮށްފިއެވެ.
ޢުދުވާން ހުއްޓައިލުމުގެ އެއްބަސްވުމަށް ޢަމަލު ކުރަން ފަށާތާ މަދު ގަޑިއިރުތަކެއްގެ ތެރޭޭގައި ޙަމާސުން ރަހީނު ކޮށްފައިވާ އަސީރުންގެ ތެރެއިން ތިން މީހުން ރެޑް ކްރޮސާ ޙަވާލުކޮށް މިނިވަން ކުރުމަށް އެއްބަސްވުމުގައި ބަޔާން ކޮށްފައިވެއެވެ. އެ ޝަރުތާ އެއްގޮތަށް ޙަމާސުން މިހާރު ވަނީ ތިން އަސީރުން ރެޑް ކޮރޮހާ ޙަވާލު ކޮށްފައެވެ. ޙަމާސުން މިނިވަން ކުރި ތިން މީހުންނަކީ ވެސް އަންހެނުންނެވެ.
ތިން އަސީރުންގެ ބަދަލުގައި ޔަހޫދީންގެ ޖަލުތަކުގައި ތިބި ފަލަޞްޠީނުގެ ރައްޔިތުންގެ ތެރެއިން 90 ޤައިދީން ދޫކޮށްލުމަށް ވަނީ ނިންމައިފައެވެ. އެއީ ޙަމާސުން މިނިވަން ކުރާ ކޮންމެ އަސީރަކަށް 30 ޤައިދީންގެ މަގުންނެވެ. އޭގެ ތެރޭގައި 69 އަންހެނުންނާއި ޒުވާން ފުރައިގެ 21 ފިރިހެން ކުދިން ހިމެނެއެވެ.
ޢުދުވާން ހުއްޓައިލުމުގެ އެއްބަސްވުމުގެ ދަށުން އަސީރުން ބަދަލުކުރުމަށް ހަމަޖެހިފައިވަނީ ތިން މަރުޚަލާއަކަށް ބަހާލައިގެންނެވެ. ކޮންމެ މަރުޚަލާއެއް ވެސް 42 ދުވަހަށް ދެމިގެން ދާނެއެވެ. ފުރަތަމަ މަރުަޚަލާގައި ޙަމާސުން ޖުމްލަ 33 އަސީރުން ދޫކޮށްލުމަށް ހަމަޖެހިފައިވެއެވެ. މި މަރުޚަލާގައި ދޫކުރާނީ އަންހެނުންނާއި ކުޑަކުދިންނާއި އުމުރުން 50 އަހަރުން މަތީގެ މީހުންނެވެ. އޭގެ ބަދަލުގައި 2,000އަށް ވުރެ ޤައިދީން ޔަހޫދީން މިނިވަން ކުރާނެއެވެ. އެއްބަސްވުން ތަންފީޒު ކުރާ ފުރަތަމަ ދުވަހު ތިން އަސީރުން މިނިވަން ކުރުމަށް ފަހު ހަތްވަނަ ދުވަހު ޙަމާސުން އިތުރު ހަތަރު އަސީރުން ދޫކޮށްލާނެއެވެ. މިހެން ގޮސް ކޮންމެ ހަތް ދުވަހުން ތިން އަސީރުން ދޫކުރަމުން ދާނެއެވެ. ދިރިތިބި އަސީރުން ދޫކޮށް ނިމުމުން މަރުވެފައިވާ އަސީރުންގެ ހަށިތައް ރައްދު ކުރަން ފަށާނެއެވެ.
ޙަމާސުން ދެން އަސީރުން ދޫކުރުމަށް ހަމަޖެހިފައިވަނީ 25 ޖަނަވަރީ ވާ ހޮނިހިރު ދުވަހުއެވެ. އެ ދުވަހު މިނިވަން ކުރާނީ ހަތަރު އަސީރުންނެވެ.