ސްޕެއިންގެ މަޝްހޫރު ރެއާލް މެޑްރިޑުގެ ރައީސްގެ މަގާމަށް އަނެއްކާވެސް ފްލޮރެންޓީނޯ ޕެރޭޒް ހޮވިއްޖެއެވެ.
ހަތް ވަނަ ދައުރަކަށް އޭނާ އިންތިހާބުވީ މި މަހުގެ ހަތް ވަނަ ދުވަހު ހުޅުވާލި އިންތިހާބުގައި ވާދަކުރަން ކުރިމަތިލީ އޭނާ އެކަނި ކަމަށްވުމުންނެވެ. މިހެންވެ 2029 ވަނަ އަހަރާ ހަމައަށް އަނެއްކާ ވެސް ޔޫރަޕުގެ އެންމެ ކާމިޔާބު ޓީމުގެ ރައީސްކަމުގައި ހުންނާނީ އޭނާ އެވެ.
ރެއާލް މެޑްރިޑަށް ޒައިނުއްދީން ޒިދާނާއި ބްރެޒިލްގެ ރޮނާލްޑޯ އާއި ޕޯޗުގަލްގެ ކްރިސްޓިއާނޯ ރޮނާލްޑޯ އާއި ރޮބާޓޯ ކާލޮސް އާއި ލުއިސް ފީގޯ އަދި ޑޭވިޑް ބެކަމް ފަދަ ތަރިން ގެންގޮސް އަބަދުވެސް ވަރުގަދަ ޓީމެއް އެކުލަވާލާ ޕެރޭޒަކީ މެޑްރިޑްގެ ވަރަށް ވަރުގަދަ ވިޔަފާރިވެރިއެކެވެ. އޭނާގެ އުމުރުން އަންނަ މާޗު މަހު 78 އަހަރު ފުރޭނެ އެވެ.
އޭނާ އަކީ ކުލަބުގެ ތާރީހުގައި އެންމެ ކާމިޔާބު އަދި އެންމެ ގިނަ ދުވަހު ރައީސްކަން ކުރި ފަރާތެވެ. އޭނާގެ ޒައާމަތުގައި ރެއާލް ވަނީ 67 ތަށި ހޯދައިފަ އެވެ. މީގެ ތެރޭގައި ފުޓްބޯޅައިން ހޯދި 37 ތަށި ވެސް ހިމެނެ އެވެ. މީގެ ތެރޭގައި ހަ ފަހަރު ޗެމްޕިއަންސް ލީގު ހޯދުން ވެސް ހިމެނެ އެވެ.
މި ފަހަރުގެ އިންތިހާބުގައި ޕްރޭޒް ރައީސްކަމުގައި ހުރުމަށް 1484 ވޯޓު ލިބުނެވެ. އޭނާގެ ނައިބް ރައީސަކަށް އިންތިހާބު ކޮށްފައިވަނީ އެޑުއާޑޯ ފެނާންޑޭޒް އެވެ.