ސްޕޯޓްސް ފިޝިން ކަނދުފަތިތައް ކައިރީގައި ދޮށީގެ މަސްވެރިކަން ކުރެވޭ ގޮތް ހަދައިފި

ވަދު ކަނދުފަތިތައް ކައިރިންވެސް ދޮށީގެ މަސްވެރިކަން ކުރެވޭ ގޮތަށް މަސްވެރިކަމާއި ބެހޭ އާންމު ޤަވާއިދު އިސްލާހުކޮށްފިއެވެ. މި އިސްލާހު ގެނެސްފައިވަނީ އެ ޤަވާއިދަށް ގެނެވުނު ދެވަނަ އިސްލާހުގެ ދަށުންނެވެ.

ދިވެހިރާއްޖޭގެ މަސްވެރިކަމުގެ ޤާނޫނުގެ ދަށުން ހަދައި ޢަމަލުކުރަންފެށި މަސްވެރިކަމުގެ އާންމު ޤަވާއިދަކީ 2020 ވަނަ އަހަރު ހެދި ޤަވާއިދެކެވެ. މި ޤާވާއިދު ފުރިހަމައަށް ތަންފީޒުކުރަން ފެށީ 2021 ވަނަ އަހަރު އެވެ. މި ޤަވާއިދަށް މިހާތަނަށް 2 އިސްލާހެއް ގެނެސްފައިވާއިރު، މި ޤަވާއިދުގެ ދަށުން ރާއްޖޭގެ މަސްވެރިކަމުގެ ހަރަކާތްތައް ހިންގޭނެ ގޮތްތަކާއި، މި ހަރަކާތްތައް ހިންގުމުގެ ތެރޭގައި ޤަވާއިދާއި ޚިލާފު ކަންކަން ވަނީ ބަޔާންކޮށްފައެވެ. މީގެއިތުރުން އެކަންކަމަށް ޖޫރިމައިނާތައްވެސް މި ޤަވާއިދުގެ ތެރެއިން ވަނީ ކަނޑައަޅާފައެވެ.

މި ޤަވާއިދަށް އެންމެ ފަހުން ގެނެވުނު އިސްލާހުތަކުގެ ތެރެއިން މަސްވެރިކަމަށް ރާއްޖޭގެ އެކި ސަރަހައްދުތަކުގައި އަޅާފައިވާ ކަނދުފަތިތައް ކައިރީ ހިނގޭނެ ހަރަކާތްތަކަށް ވަނީ ބަދަލު ގެނެސްފައެވެ. އެގޮތުން މުނިފޫހިފިލުމުގެ ބޭނުމަށް އަޅާފައިވާ އޮވާލިކަނދުފަތި ނުވަތަ ވަދުކަނދުފަތި ކައިރީ އެއް މޭލު ސަރަހައްދެއްގައި އަތުނަނު ބޭނުންކޮށްގެން ބޮޑު ކަންނެލީގެ މަސްވެރިކަން ކުރުމާއި ދޮށީގެ މަސްވެރިކަން ކުރުމަކީ މަނާކަމެކެވެ. ނަމަވެސް ޤަވާއިދަށް މިހާރު ގެނެސްފައިވާ އިސްލާހުން ޤަވާއިދުން އެބައި ވަނީ އުނިކޮށްފައެވެ. މިއާޢެކު މިހާރު ވަދުކަނދުފަތިތައް ކައިރީވެސް ދޮށީގެ މަސްވެރިކަން ކުރެވޭނެ ކަމަށް މަސްވެރިކަމާއި ބެހޭ ވުޒާރާއިން ވިދާޅުވެއެވެ.

ރާއްޖޭގެ ސަރަހައްދުގައި މަސްވެރިކަމަށް ހާޢްސަކޮށްގެން އަޅާފައިވާ ވަދު ކަނދުފަތިތަކުގެ ކައިރީގައި ހިންގޭނެ ހަރަކާތްތަކަށް ބަދަލު ގެނެސްފައިވީނަމަވެސް، އޮއިވާލި ނުވަތަ މަސް ކަނދުފަތިތަކުގައި ކައިރީގައި ހިންގޭނެ ހަރަކާތްތަކަށް ބަދަލު ގެނެސްފައި ނުވެއެވެ. އެ ކަނދުފަތިތައް ކައިރިން 3 މޭލު ސަރަހައްދެއްގައި ކުރެވޭނީ ދޮށީގެ މަސްވެރިކަން އެކަނިއެވެ. މީގެއިތުރުން މި ޤަވާއިދުގެ ދަށުން ކަނދުފައްޗަށް ގެއްލުންވާ ގޮތަށް އެއްވެސް ހަރަކާތެއް މި ސަރަހައްދުގައި ނުކުރެވޭކަމަށްވެސް ޤަވާއިދުގައި ބަޔާންކޮށްފައިވެއެވެ.

ޤަވާއިދަށް ގެނައި ދެވަނަ އިސްލާހުގައި، މި ޤަވާއިދުގެ ތެރޭގައި މީގެކުރިން މަސްވެރިންގެ ދަފްތަރެއް ހަދައި ބަލަހައްޓަން ޖެހޭ ގޮތަށް އޮތް ބައިވެސް ވަނީ އުނިކޮށްފައެވެ. މިކަމާއި ގުޅޭގޮތުން މަސްވެރިކަމާބެހޭ ވުޒާރާއިން ވިދާޅުވީ، އެ ބައި މަސްވެރިކަމުގެ އާންމު ޤަވާއިދުން އުނިކުރީ، މަސްވެރިންގެ ދަފްތަރުގެ މަސައްކަތް އެހެން ޤަވާއިދެއް ތެރެއިން ކުރަމުންދާތީ ކަމަށެވެ.

މަސްވެރިކަމުގެ އާންމު ޤަވާއިދަށް ސަރުކާރުން އިސްލާހުތަކެއް ގެނެސްފައިވާއިރު، ރާއްޖޭގެ ސަރަހައްދުގައި ދެ ވައްތަރެއްގެ ކަނދުފަތި އަޅާފައިވެއެވެ. އެއީ ދޮށީގެ މަސްވެރިކަމަށް ހާއްސަކޮށްގެން އަޅާފައިވާ އޮއިވާލި ކަނދުފައްޗާއި، މުނިފޫފިލުވުމުގެ ބޭނުމުގައި ކުރާ މަސްވެރިކަމަށް ހާއްސަކޮށްގެން އަޅާފައިވާ ވަދު ކަނދުފައްޗެވެ. ސަރުކާރުން ދަނީ މިވަގުތު ކަނދުފަތިތަކުގެ ޑިޒައިނަށް ބަދަލުގެ ގެނެސް ކަނދުފަތިތައް އިތުރަށް ރަނގަޅު ކުރެވޭނެ ގޮތްތައް ބަލަމުންނެވެ.