ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ފައިސާއިން ކުރީގެ ރައީސް ބައްސާމް އަދީލް ޖަލީލް ގަނެފައިވާ ދެ ޕެންޓްހައުސް އަތުލުމަށް ހުޅުމާލޭ މެޖިސްޓްރޭޓް ކޯޓުން ނެރުނު އަމުރުގެ މައްސަލަ ބަލައިނުގަންނަން ހައި ކޯޓުން ނިންމައިފިއެވެ.
ހުޅުމާލޭ މެޖިސްޓްރޭޓް ކޯޓުގެ އަމުރުގެ ދަށުން ބައްސާމުގެ ދެ ޕެންޓްހައުސް ހަ ދުވަހުގެ ތެރޭގައި ހުސްކުރަން އަންގާފައިވަނީ މިދިޔަ އަހަރުގެ ސެޕްޓެމްބަރު މަހުގެ ތެރޭގައެވެ. މުއްދަތު އިތުރުކޮށްދޭން ބައްސާމުގެ ފަރާތުން ފުލުހުން އެ ނިންމުން ބަލައެއްނުގަތެވެ.
ބައްސާމްގެ ފަރާތުން ހުޅުމާލޭ މެޖިސްޓްރޭޓް ކޯޓުގެ އަމުރު ވަނީ ހައި ކޯޓުގައި އިސްތިއުނާފު ކޮށްފައެވެ. އޭރު ހައި ކޯޓުގެ ރަޖިސްޓްރާ އެ މައްސަލަ ބަލައިނުގަތުމުން އެ މައްސަލަ ފަނޑިޔާރުންގެ މަޖިލީހުގެ ރިވިއުއަށް ބައްސާމް ވަނީ ހުށައަޅާފައެވެ. އެ މައްސަލާގައި އިއްޔެ ހައި ކޯޓުން ނިންމީ ރަޖިސްޓްރާގެ ނިންމުމަށް ބަދަލެއް ގެންނަންޖެހޭ ސަބަބެއްނެތް ކަމަށެވެ.
ފަނޑިޔާރު މުޙައްމަދު ނިޔާޒުގެ ރައުޔުގައި ވިދާޅުވެފައިވަނީ އެ އަމުރުގެ މައްސަލަ ފުރަތަމަ ހުށަހަޅަން ޖެހޭނީ އަމުރު ނެރުނު ދަށު ކޯޓަށް ކަމަށާއި، އިސްތިއުނާފުކުރަން ޖެހޭނީ ރިވިއުކުރި ގޮތަށް ކަމަށެވެ. ފަނޑިޔާރު ވިދާޅުވީ އިސްތިއުނާފު ކޮށްފައިވާ އަމުރު ރަނގަޅު ނޫންކަމަށް ދެކި، އެ ނިންމުން ރިވިއުކުރަން ބައްސާމްގެ ފަރާތުން ދަށު ކޯޓަށް ހުށަހަޅައި، އެކަމުގައި އެ ކޯޓުން ގޮތެއް ނިންމާފައިވާ ކަމަށެވެ. އެހެންކަމުން ދެން އިސްތިއުނާފު ކުރާނަމަ، ކުރަން ޖެހޭނީ ރިވިއުކޮށް ނިންމި ގޮތް ކަމަށްވެސް ވިދާޅުވިއެވެ.
އެހެންވެ، ރަޖިސްޓްރާގެ ނިންމުން ރަނގަޅު ކަމަށް ކަނޑައަޅާފައިވަނީ އެ ދެ ފަނޑިޔާރުންގެ އަގުލަބިއްޔަތުންނެވެ. ނަމަވެސް ހައި ކޯޓުގެ އިސް ފަނޑިޔާރު މުޙައްމަދު ޝަހީދުގެ ރައުޔުގައި ވަނީ ރަޖިސްޓްރާގެ ނިންމުން ބާތިލުކުރަން ޖެހޭ ކަމަށެވެ.
ފަނޑިޔާރު ވިދާޅުވީ މަނީ ލޯންޑްރިން އާއި ޓެރަރިޒަމް ފައިނޭންސް ކުރުން ހުއްޓުވުމުގެ ގާނޫނުގެ ދަށުން އަޅާ ވަގުތީ ފިޔަވަޅު ނިމުމަކަށް ގެންނަން ކޯޓަށް ހުށަހެޅިދާނެ ކަމަށް ބަޔާންކޮށްފައިވާއިރު، އެއީ ކޮން ކޯޓެއްކަން ބުނެފައިނުވާ ކަމަށެވެ. އެހެންކަމުން އިސްތިއުނާފު ކުރާ ފަރާތަށް އިސްތިއުނާފު ކުރުމުގެ ހައްގު ހަނިކޮށްފައިނުވާތީ އެ މައްސަލަ ބަލައިގަންނަން ޖެހޭ ކަމަށް އިސް ފަނޑިޔާރު ވިދާޅުވެފައިވެ އެވެ.
ފުޓްބޯޅަ ކްލަބްތަކަށް ދިމާވި މާލީ ހާލަތުން އަރައިގަތުމަށް ފީފާއިން އެފްއޭއެމަށް ދޫކުރި ލޯނު ފައިސާއިން ބައްސާމް ދެ ޕެންޓްހައުސް ގަނެފައިވަނީ ކޮވިޑް-19 ގެ ދުވަސްވަރު ތެރޭގައި ކަމަށް ފުލުހުން ވަނީ ތުހުމަތުކޮށްފައެވެ.