ރައީސް ދެއްވީ ރަސްގެތީމު ކައުންސިލުން އެދުނު ކަންކަމަށް ރަނގަޅު ހައްލެއް ހޯއްދަވައިދެއްވާނެ ކަމުގެ ޔަގީންކަން

ރ. ރަސްގެތީމު ކައުންސިލުން ފާހަގަކުރެއްވި ކަންކަމަށް ރަނގަޅު ހައްލެއް ހޯއްދަވައިދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.

އެމަނިކުފާނު މިޔަގީންކަން ދެއްވީ މިހާރު މާޅޮސްމަޑުލު އުތުރުބުރިއަށް ކުރައްވަމުން ގެންދަވާ ދަތުރުފުޅުގެ ތެރޭން އެއަތޮޅުގެ ރަސްގެތީމު ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި މުއައްސަސާތަކުގެ އިސްވެރިންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

މިބައްދަލުކުރެއްވުމުގައި އެރަށުގެ ތަރައްޤީއަށް ބޭނުންވާ މުހިންމު ކަންކަމާގުޅޭގޮތުންވަނީ މަޝްވަރާކުރައްވާފައެވެ.

މިބައްދަލުކުރެއްވުމުގައި ކައުންސިލުން ވަނީ ރަށުގެ ތަަރައްޤީއަށް ބޭނުންވާ މުހިންމު ކަންކަން ރައީސުލްޖުމްހޫރިއްޔާއާ ހިއްސާކުރައްވާފައެވެ. އެގޮތުން ރަސްގެތީމުގެ ބަނދަރުގެ މައްސަލައަށް ހައްލެއް ހޯދައިދެއްވުމަށާއި، ރަށުގެ ކަރަންޓު ވިއުގަ މަރާމާތުކޮށްދެއްވުމަށާއި، ފެނާއި ނަރުދަމާގެ ކަނެއްޝަންގެ މައްސަލަ ހައްލު ކޮށްދެއްވުމަށް އެދިވަޑައިގެންނެވިއެވެ.

މީގެ އިތުރުން، ރަސްގެތީމު ސްކޫލުގެ ޖާގައިގެ ދަތިކަން ހުރުމާއެކު، އިތުރު ކުލާސް ރޫމްތަކާއެކު، މަލްޓި ޕާޕަސް ހޯލެއް ޤާއިމުކޮށްދެއްވުމުގެ މުހިންމުކަންވެސް އެ ރަށު ކައުންސިލުން ފާހަގަކުރެއްވިއެވެ. އަދި ރަށުގައި ކުޑަ ކުދިންގެ ޕާކެއް އޮތުމުގެ މުހިންމުކަންވެސް ރަސްގެތީމު ކައުންސިލުން ފާހަގަކުރެއްވިއެވެ.

‎މިބައްދަލުކުރެއްވުމުގައި ރައީސުލްޖުމްހޫރިއްޔާ ވިދާޅުވީ ކައުންސިލުން ފާހަގަކުރެއްވި ކަންކަން ބައްލަވައި ރަނގަޅު ޙައްލެއް ގެނައުމަށް މަސައްކަތްކޮށްދެއްވާނެކަމަށެވެ.

‎މިބައްދަލުކުރެއްވުމުގައި ރައީސުލްޖުމްހޫރިއްޔާގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ ރަސްގެތީމުގެ ތަރައްޤީއަށް ކުރިއަށްގެންދާ މަޝްރޫޢުތަކުގެ އެންމެ ފަހުގެ މަޢުލޫމާތުތައް ޙިއްޞާކުރައްވާފައެވެ.