އަފްޣާނިސްތާނުގައި ވެރިކަން ކުރާ ނިރުބަވެރި ޖަމާޢަތް، ޠާލިބާނުންނާއި އެމެރިކާ ސަރުކާރާ ދެމެދު އަސީރުންތަކެއް ބަދަލުކޮށްފިއެވެ. މި ކަން ހާމަކޮށްފައި ވަނީ ޠާލިބާން ސަރުކާރުންނެވެ. އެމެރިކާއިން މިނިވަން ކޮށްފައި ވަނީ ނިރުބަވެރިކަމާއި މަސްތުވާތަކެތި އެތެރެ ކުރުމުގެ ކުށުގައި އެ ޤައުމުގެ ޖަލެއްގައި ޙުކުމް ތަންފީޒު ކުރަމުން ދިޔަ ޠާލިބާނުންގެ މެންބަރެކެވެ. އޭގެ ބަދަލުގައި ޠާލިބާނުން ވެސް ވަނީ އެމެރިކާގެ ދެ ރައްޔިތަކު މިނިވަން ކޮށްފައެވެ.
ޠާލިބާން ސަރުކާރުން ބުނީ، އެމެރިކާއިން މިނިވަން ކޮށްފައި ވަނީ އެ ޖަމާޢަތުގެ އިސް މެންބަރެއް ކަމުގައިވާ ޚާން މުޙައްމަދު ކަމުގައެވެ. އަދި، އޭނާ އެނބުރި އަފްޣާނިސްތާނުގެ ވެރިރަށް ކާބުލަށް ދަތުރު ކޮށްފައިވާ ކަމުގައެވެ. މުޙައްމަދު އުމުރު ދުވަހަށް ޖަލަށްލުމަށް އެމެރިކާގެ ކޯޓަކުން ޙުކުމް ކޮށްފައި ވަނީ 2008ވަނަ އަހަރުއެވެ. އެއީ، އެމެރިކާގެ ތާރީޚުގައި ވެސް، މަސްތުވާތަކެއްޗާ ގުޅުން ހުރި ނިރުބަވެރި އަމަލެއް ހިންގުމުގެ ކުށް ސާބިތުވެ، މީހަކާ ދެކޮޅަށް ޙުކުމް އިއްވާފައިވާ ފުރަތަމަ ފަހަރެވެ.
ޠާލިބާނުންގެ ޚާރިޖީ ވުޒާރާއިން ބުނީ، އެމެރިކާއާއި އަފްޣާނިސްތާނާ ދެމެދު އަސީރުން ބަދަލު ކޮށްފައި މި ވަނީ ދިގުލައިގެން ދިޔަ ފުޅާ މަޝްވަރާތަކަށް ފަހުގައި ކަމުގައެވެ. ޠާލިބާނުންނާއި އެމެރިކާއާ ދެމެދު ބޭއްވި މަޝްވަރާތަކުގައި މެދުވެރިއެއްގެ ދައުރު އަދާކޮށްފައި ވަނީ ޤަޠަރުންނެވެ.
މުޙައްމަދު ހައްޔަރު ކޮށްފައި ވަނީ 2006ވަނަ އަހަރު އަފްޣާނިސްތާނުގައި ހުއްޓައި، އެމެރިކާގެ އިސްތިޢުމާރީ ސިފައިންނެވެ. އެމެރިކާގެ ޑިޕާޓްމަންޓް އޮފް ޖަސްޓިސް (ޑީއޯޖޭ)ން ބުނީ، އޭގެ އެއް އަހަރު ފަހުން އެމެރިކާ ގެންގޮސް ޝަރިޢަތް ފަށާފައިވާ ކަމުގައެވެ. މުޙައްމަދާ ދެކޮޅަށް ޙުކުމް އިއްވާފައި ވަނީ އޭނާގެ އުމުރުން 38 އަހަރުގައެވެ. ޑީއޯޖޭން ބުނީ، އޭނާއަކީ ރޮކެޓު ފަދަ ނުރައްކާތެރި ހަތިޔާރު ބޭނުން ކޮށްގެން އެމެރިކާގެ އިސްތިޢުމާރީ ސިފައިން މެރުމަށް ޙަމަލާތައް ދެމުން ގޮސްފައިވާ މީހެއް ކަމުގައެވެ.
މުޙައްމަދުގެ ބަދަލުގައި ޠާލިބާނުންގެ ހައްޔަރުގައި ހުރި އެމެރިކާގެ ދެ ރައްޔިތަކު މިނިވަން ކޮށްފައިވާ ކަން އެ ޖަމާޢަތުގެ ތަރުޖަމާނު ޒަބީޙުﷲ މުޖާޙިދު ކަށަވަރު ކޮށްދިނެވެ. ނަމަވެސް، އެ މީހުންގެ ވަނަވަރު ޠާލިބާނުން ހާމަކޮށްފައެއް ނެތެވެ. މަޞްދަރުތަކުން ބުނީ، ޠާލިބާނުން މިނިވަން ކޮށްފައިވާ އެކަކަކީ ރަޔަން ކޯބެޓް ކިޔާ މީހެއް ކަމުގައެވެ. 2022ވަނަ އަހަރުން ފެށިގެން އޭނާ ހުރި ޠާލިބާނުންގެ ޖަލެއްގައި ކަމަށް އޭނާގެ ޢާއިލާއިން ހާމަކުރިއެވެ.
އެމެރިކާގެ ޓީވީ ސްޓޭޝަން، ސީއެންއެން، އަދި ނޫހެއް ކަމުގައިވާ ނިއު ޔޯކް ޓައިމްސުން ރިޕޯޓު ކޮށްފައިވާ ގޮތުގައި، ޠާލިބާނުން މިނިވަން ކޮށްފައިވާ ދެވަނަ މީހަކީ ވިލިޔަމް މެކްކެންޓީ ކިޔާ މީހެކެވެ. "އެމެރިކާގެ އެ އަމަލަކީ އިސްލާމީ ޢިމާރާތާއި [އަފްޣާނިސްތާނާއި] އެމެރިކާއާ ދެމެދު ގުޅުންތައް ބަދަހިކޮށް ކުރިއެރުވުމަށް އަޅާފައިވާ ބިނާކުރަނިވި ފިޔަވަޅެއްގެ ގޮތުގައި ޤަބޫލު ކުރަން،" ޠާލިބާނުންގެ ޚާރިޖީ ވުޒާރާއިން ނެރުނު ބަޔާނެއްގައި ބުންޏެވެ.
ޠާލިބާނުން މިނިވަން ކޮށްފައިވާ ކަމަށް ރިޕޯޓު ކޮށްފައިވާ ކޯބެޓަކީ 'ބްލޫމް އަފްޣާނިސްތާން'ގެ ނަން ދީފައިވާ މަދަނީ ޖަމުޢިއްޔާއެއް ހިންގާ މީހެކެވެ. އެއީ، އަފްޣާނިސްތާނުގެ ވިޔަފާރީގެ ސިނާޢަތް ކުރިއަރުވަން އެހީތެރިކަން ފޯރުކޮށްދެމުން ދިޔަ ކުންފުންޏެކެވެ. އޭނާ ހައްޔަރު ކޮށްފައި ވަނީ 2022ވަނަ އަހަރު ވިޔަފާރި ވިސާ އައު ކުރުމަށް ކާބުލަށް ކުރި ދަތުރެއްގެ ތެރެއިންނެވެ. ނިއު ޔޯކް ޓައިމްސުން ބުނީ، މެކްކެންޓީއާ ގުޅޭ މަޢުލޫމާތު ސިއްރު ކޮށްދިނުމަށް އޭނާގެ ޢާއިލާއިން އެމެރިކާ ސަރުކާރުގައި އެދިފައިވާ ކަމުގައެވެ.
ޠާލިބާނުންނާއި އެމެރިކާއާ ދެމެދު އަސީރުން ބަދަލު ކުރުމަށް އެއްބަސްވުމަކަށް އާދެވިފައި ވަނީ ކުރީގެ ރައީސް ޖޯ ބައިޑަންގެ ވެރިކަމުގެ ދައުރުގެ އެންމެ ފަހު ވަގުތުކޮޅުގައި ކަމަށް ސީއެންއެނުން ރިޕޯޓު ކުރިއެވެ. އެމެރިކާގެ 47ވަނަ ރައީސް ޑޮނަލްޑް ޓްރަމްޕް ހުވައި ކުރައްވައި، ވެރިކަމާ ޙަވާލުވެ ވަޑައިގަންނަވާފައި ވަނީ ޖަނަވަރީ 20ވަނަ ދުވަހުއެވެ.
ޠާލިބާނުންގެ ހައްޔަރުގައި އެމެރިކާގެ އިތުރު ދެ ރައްޔިތަކު އަދިވެސް ތިބި ކަމުގައި ރިޕޯޓުތައް ބުނެއެވެ. އޭގެ ތެރެއިން އެކަކަކީ މަތިންދާބޯޓު މެކޭނިކެއް ކަމުގައިވާ ޖޯޖް ގްލެޒްމަނެވެ. ދެވަނަ މީހަކީ، އެމެރިކާގެ ރައްޔިތުކަން ހޯދާފައިވާ މަޙްމޫދު ޙަބީބީއެވެ. ޙަބީބީ ހައްޔަރު ކޮށްފައި ވަނީ، ޠާލިބާނުންގެ ކުރީގެ ވެރިޔާ އަޔިމަން އަލް-ޟަވާހިރީ މަރައިލުމަށް އެމެރިކާއިން ދިން ޙަމަލާތަކުގެ ކުޑަ ވަގުތު ކޮޅެއް ފަހުން ކަމުގައި ނިއު ޔޯކް ޓައިމްސުން ރިޕޯޓު ކުރިއެވެ.