ސަރުކާރުގެ އަމާޒަށް ވާސިލުވުމަށް 450 މެގަވޮޓްގެ އިޢާދަކުރަނިވި ހަކަތަ ގާއިމުކުރަން ޖެހޭ: ވަޒީރު ޠާރިޤު
-
އެއް އަހަރު ދުވަހުގެ ތެރޭ 17 މެގަވޮޓް އިތުރުކުރެވިއްޖެ
-
އިޔާދަކުރަނިވި ހަކަތައަށް ބަދަލުކުރުމުގެ މަސައްކަތަށް ރައްޔިތުންގެ ފުރިހަމަ އެއްބާރުލުން ލިބޭ
ރައީސުލްޖުމްހޫރިއްޔާ ޑރ. މުހައްމަދު މުޢިއްޒު، ހަކަތައިގެ ސިޔާސަތާއި އެއްގޮތަށް ރާއްޖޭގައި ބޭނުންކުރާ ހަކަތައިގެ 33 އިންސައްތަ އިޢާދަކުރަނިވި ހަކަތައަށް ބަދަލު ކުރުމަށް، 450 މެގަވޮޓްހެ އިޢާދަކުރަނިވި ހަކަތަ ބޭނުންވާކަމަށް މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވަޒީރު، ޠާރިޤު އިބްރާހީމް ވިދާޅުވެއްޖެއެވެ.
ރައީސުލްޖުމްހޫރިއްޔާ މާޅޮސްމަޑުލު އުތުރުބުރީގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން އެއަތޮޅު އުނގޫފާރުގައި ޕީއެސްއެމް ނިއުސްއާއި ވާހަކަ ދައްކަވަމުން ތިމާވެއްޓާއި ހަކަތައާ ބެހޭ ވަޒީރު ޠާރިޤް އިބްރާޙިމް ވަނީ އިޢާދަކުރަނިވި ހަކަތައަށް ބަދަލުވުމަށް ސަރުކާރުން ކުރައްވަމުން ގެންދަވާ މަސައްކަތަށް އަލިއަޅުވާލައްވައި ވަޒީރު ވިދާޅުވީ، ރ. އަތޮޅަށް އެކަނި ބެލިނަމަވެސް، އެ އަތޮޅުގެ 3 ރަށެއް ފިޔަވާ އެހެން ހުރިހާ ރަށެއްގައި އިޢާދަކުރަނިވި ހަކަތައިގެ މަޝްރޫޢުތައް ކުރިއަށްދާ ކަމަށެވެ. އޭގެތެރޭގައި ސޯލާ ޕެނަލް ޖެހުމާއި، ބެޓަރި ހަރުކުމުގެ އިތުރުން އެނަރޖީ މެޖޭމެންޓް ސިސްޓަމްތައް ޤާއިމްކުރުމުގެ މަސައްކަތް އެކި ރަށްތަކުގައި ކުރިއަށްދާކަމަށެވެ. އެއާއެކު ރައީސުލްޖުމްހޫރިއްޔާ ވިދާޅުވި ގޮތަށް އެއަތޮޅު ވާދޫގެ ކަރަންޓު އެއްކޮށް އިޢާދަކުރަނިވި ހަކަަތައަށް ބަދަލުކުރުމުގެ މަސައްކަތް ފަށާފައިވާކަމަށް ވަޒީރު ވިދާޅުވިއެވެ.
ތިމާވެއްޓާއި ހަކަތައާއި ބެހޭ ވަޒީރު ވަނީ ރާއްޖޭގައި ބޭނުންކުރާ ހަކަތައިގެ 33 އިންސައްތަ 5 އަހަރު ދުވަހުގެ ތެރޭގައި، އިޢާދަކުރަނިވި ހަކަތައަށް ބަދަލުކުރުމަށް ރައީސްގެ ވަޢުދާއެއްގޮތަށް ކުރައްވަމުންގެންދަވާ މަސައްކަތަށް އަލިއަޅުވާލައްވާފައެވެ. އެގޮތުން އެމަނިކުފާނު ވެރިކަމާއި ހަވާލުވެވަޑައިގެންނެވިއިރު، ރާއްޖޭގައި ހުރީ އެންމެ 53 މެގަވޮޓުކަން ވަޒީރު ޠާރިޤު ފާހަގަކުރެއްވިއެވެ. ނަމަވެސް ސަރުކާރަށް 1 އަހަރު ވެފައިވާއިރު، މިހާރު އެއަދަދު 70 މެގަވޯޓަށް އިތުރުކުރެވިފައިވާކަމާށް ވަޒީރު ވިދާޅުވިއެވެ.
2028ވަނަ އަހަރު ނޮވެމްބަރަށް ހަކަތައިގެ ދާއިރާއިން ހާސިލްކުރަން ބޭނުންވާ އެއަމާޒާ އެއްގޮތަށް ކަންކަން ކުރުމަށް ސަރުކާރުން މިހާތަނާށް ހެދި ދިރާސާތަކުން ޖުމްލަ 450 މެގަވޮޓް ޤާއިމްކުރަން ޖެހޭކަމަށް ވަޒީރު ވިދާޅުވިއެވެ. އަދި މިއަމާޒު ހާސިލްކުރުމަށް ކެނޑިނޭޅި މަސައްކަތް ކުރަމުންދާކަން ވަޒީރު ފާހަގަކުރެއްވިއެވެ.
"މުޅިއަކު މިހާރު ހިސާބުތައް ދައްކާގޮތުން 450 މެގަވޯޓު ބޭނުންވޭ 33 އިންސައްތައަށް ދާކަމަށްވާނަމަ. އަޅުގަނޑުމެންނަށް އިރާދަކުރެވިއްޖެއިޔާ އަދި ކުރިއަށް މިއޮތް އަހަރުތަކުގެ ތެރޭގައި އިޢާދަކުރަނިވި ހަކަތަ ބޭނުންކުރުމުގެ މަސައްކަތްތަކާއިގެން ކުރިއަށްދެވޭނެ. އެކަންތަކަށް ހުރިހާ ރައްޔިތުންވެސް ސަރުކާރުންވެސް ދެއްވާ." ވަޒީރު ޠާރިޤް ވިދާޅުވިއެވެ.
މިހާރުވެސް އެކި މަރުހަލާތަކުގައި ރާއްޖޭގެ އެކި ސަރަހައްދުތަކުގައި 170 މެގަވޮޓްގެ އިޢާދަކުރަނިވި ހަކަތައިގެ މަޝްރޫޢުތައް ކުރިއަށްދާކަން ވަޒީރު ފާހަގަކުރެއްވިއެވެ. އެއާއެކު އިތުރު 50 މެގަވޯޓުގެ މަސައްކަތް މިއަހަރު ފަހުކޮޅު ފެށުމަށް ސަރުކާރުން މަސައްކަތް ކުރަމުންދާކަމަށް ވަޒީރު ޠާރިޤު ވަނީ ވިދާޅުވިއެވެ.
ރާއްޖޭގައި ބޭނުންކުރާ ހަކަތައިގެ ޖުމްލަ %33، އިޢާދަކުރަނިވި ހަކަތައަށް ބަދަލުކުރުމަށް އަމާޒު ހިފާފައިވާކަން ސަރުކާރުން އިއުލާން ކުރެއްވީ، ކޮޕް 28 ސަމިޓުގެ ތެރެއިންނެވެ. މިއީ އިޢާދަކުރަނިވި ހަކަތައިގެ ދާއިރާއިން ރާއްޖޭގައި މިހާރު ކުރެވޭ އެންމެ ބޮޑު އެއް މަސައްކަތެވެ. އަދި މިކަމުގެ ސަބަބުން ތެލަށް ކުރާ ޚަރަދު ކުޑަކުރެވި، ދައުލަތުގެ މާލިއްޔާއިން ބޮޑު ޚަރަދުތަކެއް ސަލާމަތް ކުރެވޭނެ ކަމަށް ސަރުކާރުން ޤަބޫލުކުރައްވައެވެ.