ރައީސް ޔަޤީންކަންދެއްވީ 12 އަހަރުން ކިނޮޅަހަށް ނުގެނެވުނު ތަރައްޤީ ގެނެސްދެއްވާނެކަމަށް

ރ. ކިނޮޅަހުގެ ތަރައްޤީއަށް ކުރަންހުރި ގިނަ މަސައްކަތްތައް މިއަހަރު ކުރިއަށްގެންދަވާނެކަމަށް ވިދާޅުވެ، އެރަށުގައި ތަރައްޤީގެ ގިނަ މަޝްރޫޢުތަކެއް ހިންގާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ. މި ޔަޤީންކަން ރައީސް ދެއްވީ ކިނޮޅަހު ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ކިނޮޅަހު ރައްޔިތުންނާ ބައްދަލުކުރުމަށް ބޭއްވި ޖަލްސާގައި އެރަށު ކައުންސިލްގެ ރައީސް އަޙްމަދު ޙުސައިން ވަނީ ރަށުގެ ހުރި އެކި މައްސަލަތަކަށް އަލިއަޅުއްވާލައްވާ ކަންބޮޑުވުން ފާޅުކޮށްފައެވެ. އެގޮތުން އެރަށުގައި ފާއިތުވި 12 އަހަރު އެއްވެސް ސަރުކާރަކުން ކުޅިވަރުގެ ދާއިރާއިން އެއްވެސް ސަމާލުކަމެއް ދީފައިނުވާކަމުގެ ކަންބޮޑުވުން ކައުންސިލްގެ ރައީސް ފާޅުކުރެއްވިއެވެ. އަދި ކުޑަކުދިންނާއި އާއިލާތަކަށް ހިތްހަމަ ޖައްސާލާނެ ޕާކް އަދި އެނޫންވެސް ވަސީލަތްތަކެއް އެރަށުގައި ޤާއިމްކޯށްދީފައިނުވާކަން ކައުންސިލްގެ ރައީސް ފާހަގަކުރެއްވިއެވެ. އަދި ސްކޫލުގެ ޖާގައިގެ ދަތިކަމާއި ހުރި މައްސަލަތައްވެސް ތަފްސީލްކުރެއްވިއެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ކޮނޮޅަސް ތަރައްޤީގެ ރޮނގުން ބާކީ ނުވާނެކަމުގެ ޔަޤީންކަން ދެއްވާފައެވެ. ރައީސް ވިދާޅުވީ، ކިނޮޅަހު ތަރައްޤީއަށް ކުރަންހުރި ކަންކަމުގައި ކުލަ ޖައްސައިދީ ޢަމަލީގޮތުން ކުރިއަށްގެންދަވާނެކަމުގެ ޔަޤީންކަން ދެއްވާކަމަށެވެ.

ރައީސް ވިދާޅުވީ އެމަނިކުފާނުގެ ސިޔާސަތުގައި އެއްވެސް ތަފާތެއްނެތި ކުދި އަދި ބޮޑެތި އާބަދީތަކުގައި ޕާކްތައް ހެދުމަކީ ތަރައްޤީއަށް މުހިންމު އަދި އިސްކަންދެއްވާކަމެއްކަަމަށެވެ. ހަމައެކަނި ބޮޑެތި ޢިމާރާތްތަކެއް އައުމަކީ ދެމެހެއްޓެނިވި ތަރައްޤީ ނޫންކަމަށާއި، ތުއްތުކުދިންނާ އާއިލާތަކަށް ފަސޭހަ ހިތްހަމަޖައްސާނެ ތަންތަންވެސް ހުންނަންޖެހޭކަމަށް ރައީސް ވިދާޅުވިއެވެ.

ރައިސް ވިދާޅުވީ މިއަހަރުގެ ބަޖެޓުގައި އިޖްތިމާޢީ ކަންކަމަށް އިސްކަންދެއްވާކަމަށާއި، ޚާއްޞަކޮށް ދުޅަހެޔޮކަމަށް ބޭނުންވާ ކަންކަން ތަރައްޤީކުރުމަށް ބަޖެޓުގައި ޖާގަދީފައިވާކަމަށެވެ. އެހެންކަމުން މިއަހަރު ކިނޮޅަހުގައި ޕާކެއް ތަރައްޤީކޮށްދެއްވާނެކަމަށާއި، އަދި ކުޅިވަރުގެ ވަސީލަތްތައްވެސް ޤާއިމްކުރުމަށް މަސައްކަތްކުރައްވާނެކަމަށް ރައީސް ވިދާޅުވިއެވެ.

އެރަށުގައި ކުޅިވަރު ތަރައްްީކުރުމަށް ކުރީގެ ސަރުކާރުތަކުން އިސްކަން ނުދިނުމަކީ ހިތާމަހުރިކަމެއްކަން ފާހަގަކުރައްވާ ރައީސް ވިދާޅުވީ ރައްޔިތުން ބޭނުންވާ ފެންވަރުގައި ފުޓްސަލް ދަނޑާއި ފުޓުބޯޅަ ދަނޑު ތަރައްޤީކުރައްވާނެކަަށެވެ. އަދި ހޭންޑްބޯޅަ ކުޅުންވެސް ރާއްޖޭގައި ބާރު ދުވެލީގައި ކުރިއަރައިގެން އަންނާތީ، ކިނޮޅަހުގައިވެސް އެފަދަ ހޭންޑްބޯލް ކޯޓު ތަރައްޤީކުރުމަށް މަސައްކަތްކުރައްވާނެކަމަށް ރައީސް ވިދާޅުވިއެވެ.

ރައީސްގެ ވާހަކަފުޅުގައި، ޖީލެއް ބިނާކުރުމަށް ތަޢުލީމީ އިންފްރާސްޓްރަކްޗަރއަކީ މުހިންމުކަމެއްކަމަށް ވިދާޅުވިއެވެ. އެގޮތުން ތަޢުލީމީ ވަސީލަތްތަކާއެކު ކިޔަވައިދިނުމުގެ ފެންވަރު ރަނގަޅުވާންވެސް ޖެހޭކަމަށާއި، ކިނޮޅަހު ސްކޫލްގެ ތަރައްޤީއަށް ޕްލޭން ހަދައި، ކްލާސްރޫމާއި، ހޯލާއި، ފާޚާނާތައް ހިމެނޭހެން ހުރިހާ ވަސީލަތެއް ހަމަކޮށްދިނުމަށް އިސްކަންދެއްވާނެކަމަށް ރައީސް ވިދާޅުވިއެވެ. އޭގެތެރެއިން ގިނަ ކަންކަން މިއަހަރުގެ ތެރޭގައި ފުރިހަމަކޮށްދެއްވާނެކަމަށް ރައީސް ވިދާޅުވިއެވެ.

"ހަމައެއާއެކު ސިއްޙީ ދާއިރާ. ބަޖެޓުގައި އިސްކަންދެނީ ތަޢުލީމާ ސިއްޙީ ދާއިރާއަށް. ކޮންމެ ރައްޔިތަކީވެސް އަޅުގަނޑަށް ހަމަހަމަ، އަދި މުހިންމު. ސިއްޙީ ޚިދުމަތް އެއްފެންވަރެއްގައި ލިބިފައި އޮންނަންވާނެ. މިރަށު ސިއްޙީ މަރުކަޒުގައިވެސް ކުރަންޖެހޭ ކަންކަން އެބަހުރި. އަލަށް ހިންގާ މަޝްރޫއުތަކުގެތެރެއިން އެކްސްޓެންޝަން ޢިމާރާތް އަޅާދޭނަން. އަދި އެމްބިއުލާންސްގެ ފެނަރުވެސް ދަށްކަމަށް އަޑުއެހިން، އެހުރިހަމަކާއެކު ސިއްޙީ ދާއިރާއަށް މިރަށުގައި ތަރައްޤީ ގެނެސްދޭނަން." ރައީސުލްޖުމްހޫރިއްޔާ ވިދާޅުވިއެވެ.

ރައީސް ވިދާޅުވީ މިއަހަރު ރާއްޖޭގެ ހުރިހާ ރަށެއްގައި ފުރިހަމަކުރުމަށް ކަނޑައަޅާފައިވާ ކަންކަމުގެ ތެރޭގައި އޭޓީއެމްތައް ގާއިމްކުރުމާއި، ކުނި މެނޭޖުކުރުމާއި، ފުލުހުންގެ ޚިދުމަތް ޤާއިމްކުރުން ހިމެނޭކަމަށެވެ. އެހެންކަމުން ފުލުހުންގެ ޚިދުމަތް މިއަހަރު ކިނޮޅަހުގައި ގާއިމްކުރާނެކަމަށް ރައީސް ވިދާޅުވިއެވެ. އަދި ލޯކަލް ޓޫރިޒަމް ކުރިއަރުވަން އެފަދަ ޚިދުމަތްތައް މުހިންމުކަން ފާހަގަކުރައްވާ ރައީސް ވަނީ އެކަމަށް ހިތްވަރުދީ، އެކަމަށް އެހީތެރިކަން ސަރުކާރުން ދޭނެކަމަށްވެސް ވިދާޅުވެފައެވެ.

"އެކަމަށް އެހީތެރިވުމުގެ ގޮތުން ސަރުކާރުން ލޯކަލް ޓޫރިޒަމް ފަށާ ސަރަހައްދަށް ފެނާ ނަރުދަމާ ގުޅައިދޭނަން." ރައީސުލްޖުމްހޫރިއްޔާ ވިދާޅުވިއެވެ.

ރައީސް ވިދާޅުވީ މުޅި ރާއްޖެއަށް ލައިބްރަރީގެ ޚިދުމަތް ފުޅާކުރުމަށް ބޭނުންވާކަމަށާއި، މުޅި ރާއްޖެއަށް ތަރައްޤީ ގެންނައިރު ސިކުނޑި ނުވަތަ ވިސްނުންވެސް ތަރައްޤީވާންޖެހޭކަމަށެވެ. އަދި ޤައުމިއްޔަތު ދިރުވާ އާލާކުރުމަށްވެސް ލައިބްރަރީ މުހިންމުކަމަށާއި އެހެންކަމުން، މުޅި ރާއްޖެއަށް ޕަބްލިކް ލައިބްރަރީ ފުޅާކުރާނެކަމަށް ރައީސް ވިދާުވިއެވެ.

ކިނޮޅަހުގެ ތަރައްޤީއަށްހުރި ގިނަ ކަންކަން މިއަހަރު ޢަމަލީ މަސައްކަތް ފެށި، ބާކީ މަސައްކަތް އަންނަ އަހަރު ކުރިއަށްދާނެކަމުގެ ޔަޤީންކަން ރައިސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވިއެވެ.